Read Alladian JEREMIAH 18 Bible Online

JEREMIAH 18 - Alladian bible

JEREMIAH 18

¹Agom kídí si Jeremiah me RUUTUMke lulígname:

²“No kédéng peking pína ekum belo tokkaka; delo ngo, ngokke agom polík penamem políkyé.”

³Depe lulíg kolok ngo kédéng peking pína ekum delo tokla, amidem pípom kelong delo agér idupe kaato.

⁴Edílodí ami delokke píname loorímape iyédí bí angukonpe pílangkula ikup-ilatla pítoku.

⁵Delo RUUTUM ke agome ngokkíng píto:

⁶“E Israelke ami kídía píkup-pílatla peking pína sokke kísa ngo nolum ilamayénía? Pína sokke alaglo kédéng doona kísa nolu ngokke alag aralo, e Israel, kamanía?

⁷Edí-edílodí, opín konem demangkom among yétakonem, appírlok busanla, dírpakla demangkom nyokdope ngo lulen yédí,

⁸dekepe ngokke lutornam opínde, buluke atímalok aapí míílat suyékumílo, delo buluke teyolo itung-irédope, ngokke míílíknam atodem aamomape ngo itumyéku.

⁹Edí-edílodí, opín konem demangkom among yéta konem, ngo edíng dope kalenmola, demangkom siisamope emla lulen yédí, delo

¹⁰de ngok kangkolo atímape ila, ngok agomem tatmape ila iyémílo, ngokke ainam ato-siro míílíknam tabungdem ngo imayé.

¹¹Depeila Jirusalem lolang Judahlo duuna ami kídíem, RUUTUM bí sipe ludung emla sim polangka, ‘Kaatola! Ngo noluke teyolo noluke atung-aréé kupenam bedangko ruulendung, delokke aimape imopena séguko míílen bomdung. Depeila mipil-miyong nolu atímana bedang lok aapí míílat sulangkuka.’

¹²Idola bulu, ‘Deke agom kídíde ngolukelo agér aayimang. Ngoluke míídusupe ngolu yéyé, delokke mipil ngolu agíke aapí tolkam, atímana aang míngkorpe yéyin suyé,’ emla poyinyé.”

¹³RUUTUMbí sipe podung, “Opín-buang takamlo ínggong kílangka; sikena agomem tatkína kadunía? Reyubrunam agérko Israel kídíe ito.

¹⁴Lebanonke tapame, lííreng gééjong kídí delok nyokdunía? Dííte delok lenna ansiina sirung asi kídarde oojin kídunía?

¹⁵Idola ngokke ami kídíe ngome kénsuyimang. Bulu agér kamana uyu mimanglo arí namponem romgola, bedang akulok gílangkula buluke gítí-yétíng takamlo tupsu-tuprusula iyinkai. Dekede bulume mokutnam bedalok gímoyimape besuk-beruklok gímokai.

¹⁶Buluke asi-amode amike lupu-lulénakepe ila, among moopakpe iyé. Dem kaala ami takame kaarí-kaanyope kaala dumpong kídíe mamang kityé.

¹⁷Sanggodan lokke gumnam asar kísa ngo aabomla miru keralo bulume ipan-iran sulíkyé. Buluke tong-aryadí longelo ngo agí migmuem geka sumape ngok lamkuem bulum geka subiyé.”

¹⁸Ami kídí aralo sikepe lupo bosuto, “Kaju Jeremiahme atímangko ilaju. Ngolukíng miri kídarke ayon idong ngiitome, kénna kídíke poyile delokke kaaluna kídíke agome agínpe duuyaryé. Depeila kaju ngolu bíme agom atímanem luket líklaju, delokke bíkke agomem tayyi maju.”

¹⁹Delo ngo kumsuto, “E RUUTUM, ngokke kumnamem tatbika. Ngok teyolo gomnying luketna kídíke agomem tatlangka.

²⁰Ainem atímalok edo rayékunía? Idola bulu ngokke legape arung kongkai. Buluke teyolo nokke marname kaimadope, buluke legape ngo nok keralo dagabila, nome rogu bimanía?

²¹Sikepe ikolok bulume, delokke buluke ome-uem, dirí-keno lolang midu-mimaklo melíktoka. Buluke mime kídíem mime meyéng pelang, negenpe imolangka. Midu-mimaklo buluke abu-abíng kídí emlang buluke yaamé koo kídíem siyin molangka.

²²Buluke teyolo nokke menang asak mimak inem langaayém, buluke ekum koolelok kapnam-ríínamem tatmo dakyika. Kapeila bulu ngom umdope arung kongkai, delokke ngome batdope etku-eda gokai.

²³Idola E RUUTUM, buluke rukupla ngome mokape inamem no kéndung. Buluke uyu-suki agér belengem no asampe mepakmayika. Buluke paabem nok keralok no arkut bimapeka. Nokke aklídílo, nok keralo, bulume loojé-beyédupe no elletlangka.”