Read Alladian JEREMIAH 2 Bible Online

JEREMIAH 2 - Alladian bible

JEREMIAH 2

¹RUUTUMke agome ngokkíng sikepe pííto,

²“Jirusalem ami takamke tatkolo, gíla sim polangka: Nokke mimum koope idungem, no ngome arorup míngkesula, ngonyike nyamram ití-igo delo nokke ngome yagorupe mííbomla, atí-sirí lelíkmangko amolok, delokke yépol mooruklo, ngokkíng gímín genamem, ngo míípasudung.

³Israel, no ngokke kerayalum siipí-siiyé legenam kísana deena opín kuai. Dekepe ila nome itung-iréna daadi takamlo, ngo kilii-ramli emlang atung-aréé em ruulík gooyinto. Sikepe RUUTUM bí polendung.”

⁴E Jakobke otíng-oyin kídía, Israelke opín-buang takame, RUUTUMke agomem tatgap langka.

⁵RUUTUMbí sipe podung: “Ngok keranglok mootengoope yédope noluke buku kídíe, ingkona imemkoda ngokkelo bulu kaapatone? Bulu agísu kídíe, loorímana mimang kídíem kumsugoola bulusu loorímape iyin sukai.

⁶Bulu edílokom sikepe íngkísumato, ‘Ijipt amonglok laalen langkula, yépol mooruk amonglok, olum supeko siyé kakolok, erengko amolok, kaamoko ago arunglok, ingkona amolok sékote gípala, aalat sukumadí, deke kídílok gíbola ina RUUTUM bí koloi?’

⁷Ngo bulume, siipí-siiyé miremko delokke moone amolo langaato. Idola bulu, ngokke bulum among binam dem belum-bekam ilíkla deemamoto.

⁸‘RUUTUM bí koloi,’ emla miri kídare íímato; ayonem yébona kídíete ngom kénmato. Kebang ruutumkídíe ngok mirupe ilento. Kaaluna miri kídíe agér kamana mimangem kumla, Baal uyu kelok kaalu agomem lutígooto.”

⁹“Depeila RUUTUM ngo lekoda noluke teyolo ngokke kebangem baabomyéku. Ngokke ajéngem buluke oten ome-oo kídí takamlope laabomyéku.

¹⁰Anggo danke Saipras amolo gíla kaatola, sanggodanke Kedar amolo ami melíkla, kangíng gootokala! Sike kísape ato-siroe kerapekai ikítonia?

¹¹Aro-siro malate angukon opín kídíe buluke uyu kídíem angu-arangpe imodunía? Idola ngok ami kídíe, buluke angun-abépe ngome kummape, agér kamana uyu mimangem kumlat bomkai.

¹²Depeila e talenga! Sim legasim kaala, míírí-míínyope mííla yirípedí langka.

¹³Kapeila ngok ami kídíe paab annyiko ito, turyarna asi sirung ngome mepak geyéla, atí agér bimana, asi sirung kootagoola bulu lorímangkai.”

¹⁴“Israelbí olen lokkai abílkope ola, amike béérangpe yénía? Dekemíl kapeila bí língang kosukan?

¹⁵Miru kídíe bíme myomur simyope ngírbomla, bík amongeme, moorukpe imola doolung takamem emepe ríyin goola, atí kayimadope byakruknampe iyinmokai.

¹⁶Sikepe iko teyolo, Memphis kelang Tahpanheske ami kídíete bíkke dumponglok uun dumlubem lubbínto.

¹⁷RUUTUM noluke agíke Shédíme, nolum bedalok gíbonem nolu agísue mepaksula, sim adír takam sim nolu agí dumpolo laalíksutung.

¹⁸Kape nolu Ijiptlo gíla, Nail korolok asi tíngkan? Kape nolu Assirialo gíla Euphrates korolok asi tíngkan?

¹⁹Noluke milí-hodong agére nolum dosuyéku; noluke ngok keralok gílat sukunamde nolum lusuyéku. Depeila ngome peso-ríanpe míímape, RUUTUM noluke Shédíme mepaksunam arede edítko atímange delokke kosane, sim nolu míngíngsula míílat sutokuka. Sikepe maglíngke RUUTUM ngo lulendung.”

²⁰“Konnying-mennyingkai Israel no, ngokke rumkílo duulímape, ngok agomem tatmape ngom kumsumape, mirolpe ilenla, kedonna díítum kídílo renggoola, rotne esing lerínglo uyuem kumgoola ipatsuto.

²¹Israel no ngokke, gairuna amíem laala lelíknam esinge, kapeila no ngokke mirolpe rolla lorímana yana esingpe ikane?

²²No agísueme deddína sabonem ilíksula írbín suduakom, nok deemang takotde ngok keralo kadung.

²³No agíem deemang ipaasumang emla, delokke no edíloteng Baal uyume kumsumang emla kapekísa lusulayén? Kaatola yiibelo nokke paab inamem; nokke paab séguem kangíng sukítoka. No dugdugna mime uut simonpe ila elo-belo duktí goonako.

²⁴No moonam lokke gado mime kísape yépol mooruklo yéyitsula, agí míínampe asar langgola, pamkilo sékote bíme itum lamape duggonako. Bím mamín gena milokongde ebínpe matí míntínam kamang kapeila moodílo bíme dengompe kaaríkrungsuyé.

²⁵E Israel angukon uyuem monmín gekolo agí alem apéé momapeka, agí línggungem pítíl momapeka. Idola no, ‘Ngo mibo-miyingke uyuem míídung, ngo buluke méélamlo gímín geyé delokke nokkíng gílat sukumayé,’ emla luyan sudung.”

²⁶RUUTUM bí sipe podung, “Kapekísa doppyonem umyém annying dudí deke kísape noluke roja kídíe lang kaaluna miri kídíe delokke miri kídíe, delokke Israel ami tabunge annyiyé.

²⁷Esingem abue emla delokke líídungem ane emla manna kídí nolu takam annyiyé. Kapeila nolu ngokkíng aalat sudum empemílo gílatla ikolok sikena annyingem paayé. Idola edílo nolu adír yékudí delo nolum aala ipítdokupe nolu ngome rogugutídung.

²⁸“Noluke agí písunam uyu kídíde ingkoloda? Noluke adírlo bulum aala ipít kímoto. Kapeila nolu edítko doolunge bojé dudí dekeko noluke uyu kídíekom bojédung.

²⁹Nolu ingko legang lok ngome akbomdun? Nolu takam kapeila ngokke mirolpe rollenkan?

³⁰Ngokke nolum kénsudope adír binam kídíde atí agérlo aamangkai. Nolu kangkén sumang. Ugna myomur simyope nolu, noluke kaaluna miri kídíem paka kayinto.

³¹Supakke siirum nolu, RUUTUM ke agomem tatkí bilangka: Ngo Israelke legape yépol mooruk amongkua? Demangkom yagorupe eerína kaamo amongkua? Kapeila ngok ami kídíe, ‘Ngolu asarpe maman sulado, nokkíng lekote aayimayé,’ emla lukan?

³²Mimum kooe agíke nog-tampilangem mitpan sudun? Nyamran ina mime agíke lungguem mitpan sudun? Idola sanam yimanam longe lokke ila ngok ami kídíe ngome mitpan sukai.

³³Bíírík-hamgomana mimete noluke séguem kaayil sukedope, míímín sukolo noluke erbomnam bedanglo nolu dukjing aloodung.

³⁴Nolu língangnem ummaduakom noluke ege kídílo, aatí-opan kídíke, atí kénmana kídíke iyyie kayindung. “Sikepe iko teyolote,

³⁵‘Ngo atí kénmang, RUUTUM bí ngoluke teyolo marmang,’ emla nolu ludung. Idola, ‘Ngolukíng paab kamang,’ emga legape ngo nolum kebang baabomyé.

³⁶Nolu kape, noluke bedang gíkoeme angu-angupe itíkan? Assiria kídíe kapekísa nolum yattodí deke kísape, Ijipt ete nolum yatyé.

³⁷Ijipt amonglok nolu dumponge rumkípe ila annyingla gílenyéku. Kapeila noluke míídíí bomnam kídíem RUUTUM bí mepakto. Depeila bulu nolum atí igul lamayé.”