Read Alladian JEREMIAH 20 Bible Online

JEREMIAH 20 - Alladian bible

JEREMIAH 20

¹Edílo RUUTUM ke Kumkeng Ekum lokke miri botte yalumpe ibona, Immerke oo Pashhur bí, Jeremiahke kaalula agom lunam kídíem tattodí,

²bí Jeremiah me umla, demla, RUUTUM ke Kumkeng Ekum lokke teyong yangke Benjamin Eyab delo ikolilok yééla rínto.

³Longe kondem ikoli delok Jeremiah me Pashhurke taabín langkula idodem Jeremiah bíme luto, “RUUTUM bí nome Pashhur emla amín mínyimang, idola Magor-Missabib [1] emla mínlíkkai.

⁴Kapeila RUUTUM bí sikepe mandung, ‘Ngo nok agísu legapelang nok angong kídí legape nome reyubnam kope imoyé. Miri kídíem buluke miru yoksalok pakadupe nok agí amige kaasuyé. Babilon lokke roja alag aralo Judah ami takamem ngo ruulíkyé. Bulu ami kídíem Babilon elo abílpe bomyin kumayémílo yoksalok paka kayinyé.

⁵Ngo doolung sokke ekuserang takamem, aamli-ruuli, siipí-siiyé tabungem miru kídíke alag aralo ruuyin líkyé. Dekedem bulu líílangala Babilonpe bomyéku.

⁶Delokke Pashhur nolang nokke erang takamete Babilonpe enla amike pakne-pakbope yéyé. Delo nokke metíbomnam angong kídíela no agíe elo nyoklíkla nolume yunyok nyokyinyé.’ ”

⁷E RUUTUM no ngom yatla, ngo yatkosuto. No ngome ralyala, ngome ikumto. Longe ruubupe ami takame, ngome ngilkala, lupu-luléla lutíkai.

⁸Edí-edílodí ngome agom poyéne, delo ngo kapla-rííla, aimangemla nyokku penamem lupa bidung. depeila RUUTUM nokke agome, longe ruubupe, ngokke teyolo lupu-lulé emla lukaanamem kamodung.

⁹Idola edílo ngo, “RUUTUM me ngo míípa sumayé delokke bík amínpe agom luyimayé,” emla manyédí delo nokke agom kídíde, ngokke along ara belo nyulíkna, ngokke aapíso emepe írna ato kope idung. Ngo deddípe jémgap kílate, jémgap lamape itumsula madung.

¹⁰Ngo deddína, “Bím ripot laju, migomlo ripot laju,” emla luru bosunam agomem tatpadung. Ngokke rego mipííso reyubname píídung. Ngokke ngoojung angong kídíete, ngokke olet namem kaatadung. “Bíme yatkup ladope, depe irongem bíme umla, ngoluke edoem bík teyolo ralaju,” emla bulu lubosudung.

¹¹Idola RUUTUM no, miga-miramnape ngokkíng yémín gedung. Ngom ipusilééna kídíe ngome ikummayé; bulu takame tupsula olet letyinyé. Bulu iramla yagorupe annying paayé. Bulu agísuem ipusiléésula isunam dem edílokom bulu mitpan suyimayé, delokke de agínpe duuyaryé.

¹²E Ralya yalumna RUUTUM, no deena amieme delokke tanike aapí-aangem ika-darkala deepítbine. Ngokke legang takamem nokkíng melík yinto. Iname ngokke miru teyolo nokke edo rabi kunamem ngome kaamoika.

¹³RUUTUM ke legape miri lulangka. RUUTUM me yidge langka. Atímana alag aralok ipusiléénam amiem, bí mopítne.

¹⁴Ngome odí longedem ngo béédungku. Ngome ane akiilok olendo longede, utepooro kamana longekope ilangkuka.

¹⁵Ngokke abueme, “Koo ko olentung, de nokke oo ko,” emla ashéna legangem pobila bím ashémola imona ami teyong delo bééname kadakyika.

¹⁶Ayang atí kamape RUUTUM ke líípaknam doolung kísa de amide idak langkuka. Bí rokomem kila ulo gogdudem, delokke longe raadangem mimak adudem tattídak langka.

¹⁷Kapeila ngokke ane akiidem ngokke agope imomape, akii aralo bí ngome mokamato. Depe ituamílo, ngokke ane akiide ngokke agope iyai.

¹⁸Ngokke yénam tabungem annyingla yéyin loope yéyardope, delokke ankí-keno emla adírnamem kaatídope, kapei ngo ane akii lok olen kosutone?