Read Alladian JEREMIAH 21 Bible Online

JEREMIAH 21 - Alladian bible

JEREMIAH 21

¹Jedekiah rojabí, Malkhiahke oo Pashhur memlang Maaseiahke miripe ina oo Jephaniahme Jeremiah kíng agomko íngkídope lulígto.

²Bulu aala, “Ngoluke legape RUUTUMme tatkíto, kapeila Babilonke roja Nebukadnejjar bí ngolume mimak iyadak. RUUTUM bí kerape inam kísa ngolukepe irisinyo agérem ibila bíme mimak iyamape, gílat sudokupe imoyépe,” emla Jeremiah me poto.

³Delo RUUTUM ke agome Jeremiah kíng pííla, bulum bí poto, “Jedekiahme sim pobilangka,

⁴‘RUUTUM Israel ke Shédíbí sipe podung: Babilon rojeme mimak imínsudope nokke alag aralo mimak leemo monam tabungdem, nome rukup nadokupe ngo imodak. Dekede nome mimakpe, nokke doolung língkum etor luyulo gargo bomna Babilonke ami kídílo ngo ruulat líkyéku. Dem mimak ekurang tabungdem doolung raadang so ngo kumdum sumoyé.

⁵Ngo agísue, yagorupe aklíla, marla ralnarung lakbíng alagsi yamtar bomdola nok mirupe nome mimak moyé.

⁶Doolung araso duuna tanidak tarodak pesonam kilii-ramli lok mimakpe iyala bulu takam siyinyé.

⁷Depe irongem, RUUTUM bí sikep podung, Judah ke roja Jedekiah me delokke mite-migom kídíeme, delokke doolung ami takamem, séko buludí dírí-keno loklang kilii-ramli lok situng-singong kadí, dem tabungdem, nokke miru, Babilon ke roja Nebukadnejjar ke alag aralo ruuyin líkyé. Bí bulume asampe ayamayé, agí aapílok ayang yalen sula, yaman sula emmumpe memape yoksalok paka kayinyé.’

⁸“Sok teyoso ami kídíem sikepe polangka: ‘RUUTUM bí sipe podung, Kaatola, noluke keralo ngo sinam bedang kolang turnam bedangko leebitung.

⁹Doolung araso duuna kídíe miru yoksalok demangkom, dírí-kenolok demangkom kilii-ramlilok siyinyé. Idola mimakpe gargoona Babilon maglíng keralo séko buludí lenla agíem alag ígon suyédí, bulu turyé, bí agí yénamem mopít suyé.

¹⁰RUUTUM bí sipe ludung: Ngo doolung sim atímanem ilíkla ainem ipakpe emla deperung míílenkai. Doolung sim Babilon rojake alag aralo ruulík tobong. Bí emelok doolung sime gupak moyé.’ ”

¹¹“Sikesok teyolo, Judah lokke roja ekum-erangem sipe polangka: ‘RUUTUM ke agomem tattola;

¹²Dabid ke otíng-oyin kídía sikepe RUUTUM bí podung: “ ‘Loodípe deepítnam kebangem lulangka. Yatbomnam amiem yatnalok mopít langka. Dekepe imayémílo, noluke atímang legape ngokke aklínge emepe gulenla, dem eme dem sékote imitlayimayé.

¹³E Jirusalem, yiibe teyolo siisana dííte lííreng teyolo duula no sipe lusutuai, “Ngoluke mirupe séko saalayén? Ngoluke ruusi supomso séko saalayén?”

¹⁴Nokke atímape agér itonam legape, ngo nokke mirupe ikai. Nokke moonamem ngo eme rílíkla, ayir-agong tabung loope guyin dope, nom ngo itung-iré lenyé?’ Sikepe RUUTUM ngo lulendung.”