Read Alladian JEREMIAH 22 Bible Online

JEREMIAH 22 - Alladian bible

JEREMIAH 22

¹RUUTUM bí sikepe políkdo, “Judah ke roja ekumlo tokla sim ngiitom sim pobilangka:

²Dabid ke roja palenglo duuna Judah lok roja nolang migom-mite nolu delokke sok eyab kídí sok aana kídí nolu tatlangka;

³Jonna agér emlang aina agérem ilangka. Líítonam amidem líína delokke atímana alag aranglok mopítlangka. Mibo amiem, ane-abu kaimanem, mime-meyéngem, nolu atímana agér imape, delokke buluk teyolo milí-hodong agér ilíkmapeka. So moolop so dengompe yésunake iyyiem emmumpe líímapeka.

⁴Sim lulígnam kídísim nolu an-gapla igeyémílo, Dabid ke roja palenglo duunade, roja guré-gaari teyolo dukla, deddína mite-migomem gíbola delokke bosi maglíngem gíbola roja ekum luuyab kídarso gíkup-gílat sula gíyé.

⁵Idola nolu sim lulígnam kídí sim igemayémílo, ngo agísuem pésula mandung, si ekum kídarsi kumrukpe iyinyé.

⁶“Kapeila Judah ke roja ekum teyolo RUUTUM ke agom poname si: “Roja ekumde adi among Gilead kísa, delokke Lebanon ke dííte ponyuk kísa, ngok keralok kampo dagakom, ngo yépol among kísa, ami duuyimangko kumrukpe imoyé.

⁷Deme bénpak dokupe, ngo ami melíkdak. Bulu takam kampona sidar esing gaang kídíem teepakla, dekedem emelo romyinyé.

⁸“Deddína opín-buang lok ami kídíe sim doolung sim kaala enbong-gíbong dola íngkí bosuyé, ‘Sikena botteruna doolung konem RUUTUM bí kapei sikepakpe itone?’

⁹Depe íngkí bosupala sipe bulu lubosuyé, ‘Kapeila bulu, RUUTUM buluke Shédí kíng daapong ibosunam ayonem mepak geyéla angukon uyuem kumsu-joosula ikolok sikepe ikai.’ ”

¹⁰Noluke sikana roja Josiahke legape, kapla-rííla pengé lula imapeka. Delok ayanpe monnyok penam, bík oo Jehoahaj rojake legape yagorupe kapla-rííla ibomlangka. Kapeila bí edílokom aalat sukumayé, delokke agí amongem lekoda kaayi kumayé.

¹¹Agíke abuem rojape yétítkuna Judah lokke rojape ikuna, Josiah ke oo Jehoahajke legangem RUUTUM bí sikepe ludung, “Bí sokke gíkai, idola edílote aalat sukumayé.

¹²Bím gínyok boko amolo bí siyé, delokke sim amo sim bí edílote kaapang kumayé.”

¹³Bíkke ekumem deemalok mobíla, itung-iré lok ekum dem pírtek pírlen mola ila, delokke agérem imotula, agí ami kídíem agér ire atí bimape ina ami bí, reyub runam anka sunamem paayé.

¹⁴“Ngo líísak ekum botte runako mola, ekum teyolo deddína pírtek kídíe kala inako moyé” emsu pala, bí bortak dope kirkiem ila sidar esinglok, kirki ida sunana kídídem ila, yalína morípe dekedem molyin líkla ina bí, reyub runam anka sunamem paayé.

¹⁵Gairuna kampona sidar esing mílílok, gaina ekumem mokolok nome aiyana rojape imoyénía? Nok abuete donam-tíínam kamatonía? Bí aina delokke aina agérem ila, ato-siro takamlo bí utepooroe kato.

¹⁶Bí aatí-opanna kídí legape deepít kebangem baabito. Depeila bíkke ato takamlo, utepooroe kato. RUUTUMme kén-ga lokmin dekepe idune.

¹⁷Idola no agí petom sulo kaatí sula jonnam bedalok ato-siroem lamape, dengompe yésunake iyyiem biilen lentímola, lurít-luketloge delokke itung-iréloge, ato-siroem laala inato. Sikepe RUUTUM bí polendung.

¹⁸Dekepeila Josiah ke oo, Judah lokke rojape ina Jehoiakim ke teyolo RUUTUM bí sipe podung: “ ‘Ulo ngokke bíroa! Ulo ngokke bírmía!’ emla bulu bíme kabbom-rííbomyé. ‘Ulo ngokke ruutuma! Ulo ngokke roje!’ emla bíme bulu kabbom-rííbomyé.

¹⁹Gado lokke simangem kape kísa, doolung luyulo holenla yoppakla yududí, dekekísa bíme Jirusalem ke, doolung luyulo hopakla yuyé.”

²⁰Lebanonpe saala kabgong toka, Bashan amolo ulo goggo toka. Abarim amolo kapgong toka, kapeila nokke magpéé kídíem mimaklo ikum kumyintung.

²¹Nokke edíírupe míísudu delokai, ngo nome lutortuai, idola “Ngo tatmayé,” emla no lukai. Sikepe no siisang delokkai, ngok agomem tatmape yésasuto.

²²Nome kaabomna kídí takamem doi-asare mutbomyé, delokke nokke magpéé kídíem umnyok bomyé. Delo nokke atímang agér legape, no agísue annying sula ami takamke ngilkang kapompe iyé.

²³Lebanon lokke sidar esing lok gairupe ekum mola duuna no, mime okii kinam kísa edílo kiya bomyédí, delo no ayang kaapa dope yagorupe ankí-kenoyé.

²⁴RUUTUM bí sipe polendung, “Aropakpe ngo turna Shédípe idu tete delo, Judahke roja Jehoiakim ke oo Jehoiashin no ngokke lakbík alag sokke punna koosi kísape ituakom dem ngo ibín sula nom elpakyé.

²⁵Nokke peso bomnam, nome mokape emla mata tatína nokke miru, Babilonke roja Nebukadnejjar kílang bíkke Babilon maglíng kídíke alag aralo nome ngo ruulíkyé.

²⁶Ngo nomlang nom ona aneme, nonyike kénkí hényimanam, nonyim olen mangko mibo-miying amolo umnyok moyé. Delo nonyi silíkyé.

²⁷No deddípe kaalí dokukom no edílokom agí amolo aalang kumayé.”

²⁸“Jehoiashin bí, sékote mííyi manam kaapak kunam benmíkna kédéng peking kísa peya ikan? Kapeila bímlang bík ome-oo kídíem, buluke kénkí-pangkímanam mibo amolo umnyok bomkakune?”

²⁹E among, among, amonga! RUUTUMke agom ponamem tattola.

³⁰RUUTUM bí sikepe podung: “Si ami si edílokom ome-oo kamana kísa, bík yénamem edílokom unnoti madope runamko. Kapeila bíkke oo kídí aralok, sékote Dabid ke roja palengem duubomna kamayé, Judah amongem rojape ibola ina kamayé, delokke edíí-sirípe yéna kamayé.”