Read Alladian JEREMIAH 23 Bible Online

JEREMIAH 23 - Alladian bible

JEREMIAH 23

¹“Ngokke aríklo yégona mér kídíem, yépit-yéyit sumola, nyokmola imona mér kaabomna kídí nolu yagorupe adír paayéku.

²Ngokke ami kídíem kaabomna ruutum kídíem, RUUTUM Israel ke Shédí ngo sipe ludung: Nolu ngokke mér kídíem monpan-monransula, yépit-yéyit sugomola, aipe kaabom mape inam legape, noluke atímana agér ikolok, noluk teyolo ngo itung-iréyéku.

³Ngokke monpan sutonam, mibo amolo mapit-mayit goona ngokke mér abíd kídíem, ngo agísue laadum suyin langkula, buluke mili parlangkula ayé éngku peko agíke among yéta sulo ngo bulum laangayéku.

⁴Ngo buluk teyolo, kaabomna ruutum kídíem parlík yéku. Delo bulu peso-ríanla, yényok-yésok golangkula iyimayé. RUUTUM ngo sikepe polendung.”

⁵RUUTUM bí podung, “Dabid ke opín lok deena aag ammumko ngokke saalen modíku longe píídak. De rojade kénnam lok yébola, ailok lang deenamlok among tabungem iboyé.

⁶Bíkke longe kídí delo, Judah elang Israele, ebín-ebon kumape aapíe eetetpe yéyéku. Delo bíkke amínem, RUUTUM Ngolum Mopítne, emla mínyé.

⁷“Depeila RUUTUM bí sipe polendung: Ijipt amolok, ‘Israelem laalen kuna RUUTUM ke turdu tetedem,’ emla ami kídíe pésuyém man-yimadí longe píídak.

⁸Idola delok ayanpe, ‘línggídan amo telok lang, mibo-miying amo rego takamlo yényok-poksok gongkolok Israelme laalenkuna RUUTUMke turdu tetedem,’ emla pésuyém mandíku longe arope píídakku. Delo longe kídí delo bulu arope agí amo sulo yésu yéku.”

⁹Kaaluna kídí legape: Ngokke aapí-aange opakkai, delokke along kídíete belengkai. RUUTUM ke deena agom kídí legape, ngo apong tííla tíngír suna, kísana amipe ikai.

¹⁰Among si abír-ayo ine alum yimang. sike sok legape, béénamem paala amosi erengkai, delokke neyi-neyange rukyinkai. Kaaluna miri kídíe atímalo yéyinkai; buluke pauar kídíem deemang amolo iyin líkkai.

¹¹“Kaaluna miri kídílo lang miri kídílo, Shédíme peso emnam kaimang. Ngokke Kumkeng Ekumlo deemang-amoem, kaapa berokkai,” sikepe RUUTUM bí polendung.

¹²“Depeila buluke bedang gípekode belapla, bulu delo oletla kaamo kolo nyokyinyé. Bulum ngo itung-iré langkula, tong-aryangem buluke teyolo ruulíkyé,” Sikepe RUUTUM bí polendung.

¹³“Samari telokke kaaluna miri kídílo, ngo belum runam ségueke kaapadung: Bulu Israel em gímem bola, Baal uyu lok kaalu agom ludung.

¹⁴Jirusalemke kaaluna miri kídí aralote, reyub runa atoem ngo kaapadung: Bulu megoo-yatgoola, abír-ayo ila paab ina kídíke alagem edíí modung, depeila bulu edílokom buluke atímalok aapí míílat sukumang. Bulu ngok keralo Sodom ami kísadung, delokke Jirusalem ke ami kídíe Gomorrah ami kísadung.”

¹⁵Depeila kaaluna miri kídar teyolo Ralya yalumna RUUTUM bí sipe ludung: “Ngo bulum kosaruna apimem domola, emo asiem tíímoyé. Kapeila Jirusalemke kaaluna miri kídílok ilenla, among tabunge Shédíme peso kaimape deemang-amoe bííyin gongkai.”

¹⁶Ralyayalumna RUUTUM bí sipe podung: “Noluke teyolo, kaaluna miri buluke kaalu agomem tatmapeka. Kapeila bulu nolum menam agomlo míída sumola, agí aapí sulok kaarí-kaanyoem pola, RUUTUMke aro nappalok lennem poge yimang.

¹⁷Ngome míípakna kídíem bulu, ‘Nolu aapí eetetpe yéyé namoko. RUUTUM bí sipe podung,’ emla metígoodung. Aapí tolna ami takam lote bulu, ‘Nolukíng atí adír píímayé,’ emla metígoodung.

¹⁸Idola sékoda RUUTUMke kebalo dagala agí amige kaasula, agí nyorunge tatsula, RUUTUMke agom ponam pagem, tatlang kaalang iton?

¹⁹Kaatola, dekepe atímape igape, buluke teyolo, RUUTUMke aklínge buklenla, meyat asarpe mutnyok bomyé.

²⁰RUUTUMke aapí míínamem apíípe ipímadem, bíkke marname edílokom gílat sukumayé. Angkupena longe kídí telo sim nolu airupe kényinyé.

²¹Ngo kaaluna bulum lulígmang, bulu agí míínampe pogo sudung. Ngo bulum lupo sumang, idola bulu agí míínampe kaalu agomem potígoodung.

²²Bulu arope ngokke kebang aralo daganam kuamílo, ngok ami kídílo, ngok agomem lubiduape. Delo ami kídíe buluke paab bedanglok, gílat sulangkula aimana agér kídíem iyimayai.”

²³RUUTUM bí sikepe podung: “Ngo mootenglo duumana, anín petomlo duuna Shédí kua?”

²⁴RUUTUM bí sikepe podung: “Ngokke kaapa mangko kolo sékoda rusi sulayén? Ngo talengemla amosim bííbom manía?”

²⁵RUUTUM bí sikepe podung, “Ngok amínlok, kaaluna bulu kaalu-polu yatna agomem podung, emla ngo tatdung. Bulu, ‘Ngo immangko maato, ngo immangko maato,’ emla lugoodung.

²⁶Edít longe koda, agí aapí-aanglok yatsunamem, metígoona kaaluna miri kídíde itílayén?

²⁷Baal uyume buluke abu kídíe kumsula ngome mitpan sunam kísa bulute dekepe megoo-yatgoomílo, ngome ngok ami kídíe mitpan suyé, emla buluke aralo yatna immang lok lutígoodung.

²⁸Immang kaanade immang kaanam petomem polangka, delokke sékodí ngok agomem arope tattone, bí míngkelok polangka. Ampe delang ambín arede akamía?

²⁹Ngok agome eme kísa imanía? Elíngem demmíkna arem martul kísa imanía?” Sikepe RUUTUM bí lulendung.

³⁰RUUTUM bí podung, “Sikepe ila, ngokke lok lenna agome emla pomínsuna yatna kaaluna miri kídí teyolo ngo aklí lendung.

³¹Arorupe, séko buludí agí míngkorpe posudula RUUTUM ke poname, emla yaddudí bulum ngo kangkidung.

³²Delok teyolo yatna immang mílílo potígona buluke teyolote ngo marlíngkai. De ami kídíde megoo-yatgoola ngok dengompe yésuna ami kídíem angu bedalok gímem modung. Ngo bulum edílote lulígmang delokke parlíkmang. Bulu ami kídí legape agér arolo aamang.” Sikepe RUUTUM bí ludung.

³³“Edílo ngok ami kídíke akone, demangkom kaaluna mirikone, demangkom Kumkeng Ekum lokke mirikone Jeremiah nome, ‘RUUTUM ke líímé agome ingkue?’ emla íngkíyédí, delo no bulume sipe polangka: Nolu RUUTUM ke ebínnam egetpe idung. RUUTUM bí nolum sipe podung, ‘Nolum ngo mepakyé.

³⁴Kaaluna kone demangkom miri kone demangkom akon-asage, RUUTUMke egede emnam gompil kídí sime manyémílo, deme ngo itung-iréyé, delokke bík erangemte itaksuyé.’

³⁵Dekepe agom podumem pemílo bulu mipil-miyongpe agíke angong demangkom edung-erangem, ‘RUUTUM bí ingkokoi poyan sudon, demangkom RUUTUM bí ingkokoi potone?’ emla lupo bosupe aido.

³⁶Idola buluke aralo, ‘RUUTUM ke egede,’ emla lubosupe aimang. Kapeila kerangke gomdupe mipil-miyonge lubo sukolok, agí agomde líímé agom kísape iyinsula, ngoluke Shédí, Maglíngke RUUTUM, turna Shédíke agomem loorí moimadung.

³⁷Jeremiah no kaaluna konem, ‘RUUTUM bí ingkokoi poyan sudon, demangkom RUUTUM bí ingkokoi potone,’ emla pomolangka.

³⁸Bulu ngokke lunamem tatmape, ‘RUUTUM ke egede,’ emla ludantete yémílo bulum sipe polangka:

³⁹‘Supak RUUTUM ngo nolum mitpan sukai. Ngokke keralok noluke buku kídíem ngokke binam doolungem itak sula nolum takam ngok keralok mooteng amolo monpakyé.

⁴⁰Agínpe mitpan suyimanam annying emlang idírnamem ngo noluke teyolo ruulíkyé.’ ”