Read Alladian JEREMIAH 24 Bible Online

JEREMIAH 24 - Alladian bible

JEREMIAH 24

¹Babilonke roja Nebukadnejjar bí, Judah lokke rojape ituana Jehoiakim ke oo Jehoiashin melang, Jirusalem lokke mite-migom kídíem delokke yogmo ina, esing monyo, líísak pína, mimang atna, moi-muang ina, delokke ruula dekenem ijiina amiemlang abíd-abíd ijiina ami takamem Babilonpe umnyok bomrongkuem, RUUTUM bí ngome RUUTUM ke Kumkeng Ekum kerang delo donam tapang ayé bíína aapé annyiko kaarí kaanyolo lengkando.

²Aapékon delo gairupe minna, edíína ayé kado. Aapé konde dokan pemanam take-tarena ayé kado.

³Delo RUUTUM bí, “Jeremiah, no ingko koda kaadon?” emla íído. Delo ngo, “Donam tapang ayéke. Aina ayé kídísi ai alooneke delokke loorímana si dokan berok pemanameke,” emla poyansuto.

⁴Delo RUUTUM bí ngome poto,

⁵“RUUTUM Israelke Shédíbí sikepe podung: Babilon amope ngokke lupak tonam, Judah lokke umnyok bomkunam kídíem aina tapang ayé kísape ngo míídung.

⁶Kapeila buluke ainam legape ngok amige kaatí mínyé. Bulume ngo lekoda so amoso laangayéku. Ngo bulum bubín mape díílík yéku.

⁷Ngomino buluke RUUTUME emla bulu kénsudope ngo bulum ngome kénna aapí-aangem ruulík yéku. Bulu ngokke amipe iyéku, delokke ngo buluke Shédípe iyéku, kapeila bulu aro aapílok, ngokkíng míílat suyéku.

⁸“Idola dokan pete manam, loorímana donam tapang ayé delokke kísape, Jirusalem lok umngongnam delokke so amoso dungkína delokke Ijiptlo dunggona ami kídí demlang Judah ke roja Jedekiah melang bíkke mite-migom kídíem ngo imoyé.

⁹Buluke teyolo aimana tong-aryangko ngo bomayé. Dem tani amo sokke opín takame kaala reyubrupe mííyé. Depe míídola ami kídíe bulum luyé-luléla, luber-luyerla, lupu-luléla ingko-ingko amo lodí ngo bulum monpan suyédí, buluk yétíng takamlo bulume tong-aryang amipe lugeyé.

¹⁰Buluke buku kídí lolang bulume among binamlo bulu nyokyinma tete loope ngo buluke teyolo midu-mimak, dírí-keno, kilii-ramli atí siríem medan tete líkyé.”