Read Alladian JEREMIAH 25 Bible Online

JEREMIAH 25 - Alladian bible

JEREMIAH 25

¹Babilon lok roja Nebukadnejjar ke rojape ilendo dítak delo lang Judah lok rojape ituana Josiahke oo Jehoiakim ke Jirusalemlo toodí takpi kope roja idoem Judah ami takamke legape Jeremiah kelo RUUTUM ke agome pííto.

²Depeila kaaluna miri Jeremiah bí Jirusalemlo duuna takam emlang Judah amolo duuna tabungem poto:

³Judah lokke roja Amonke oo Josiahke dítak íying kolang angumnape roja ido delokke ila silo loope dítak takying annyi kolang tagum kope, RUUTUM bí ngome lulígla, ngo nolume aipakpe pobi bitídung, idola nolu edílote arope tatmang.

⁴RUUTUM me agér ibina kaaluna miri kídíem RUUTUMbí nolukíng melík tetelate nolu edíloteng aipe tatbimang, delokke aroe emla mííbipete kímang.

⁵Bulu nolume sikepe potíto: “Mipil-miyongpe nolu, atímana bedanglok gílat sulangkula noluke aimana séguem mepak sulangka. Depe imílo noluke abu kídí emlang nolume among ruubinam so agínpe nolu duuyar bomyé.

⁶Angu konke uyu kídíem agér ibila kumsu-joosula imapeka. Noluke agí písunamem dekepe ila, ngome aklíng momapeka. Nolu dekepe imayémílo ngo nolume itung-iréla imayé.”

⁷“Idola nolu ngok agomem tatmato, nolu agí alaglok písunamem kumsula ngome marmola, noluke teyolo nolu agísuei tong-aryangem laangasuto,” emla RUUTUM bí podung.

⁸Depeila Maglíngke RUUTUM bí sipe podung: “Nolu ngok agomem tatmanam legape,

⁹ngo línggíngdan telokke ami tabung emlang ngokke agérem ibina Babilon lok roja Nebukadnejjarme ngo langaayé. So amoso duuna ami takam teyololang among sokke dei-degong so duuna takamke teyolo ngo bulume mimakpe iyadope aamoyé. Ngo bulume apíírupe nyokyin moyé, delokke dekedem kaala agínpe reyubla míngge ayar gedope, lupu-lulé lukengpe iyar dope delokke agín legape nyokyarkunape idope imoyé.

¹⁰Bulu kelok ngo ashénam ngildud, miri adud-ayud, nyamram miri muudud atí takamem nyokmoyé. Bulu kérsin kote kayimayé, delokke aam kétpenam kote kaimayé.

¹¹Among tabusi rongngamna mooruk amope iyé. Delo opín tabude Babilon ke rojem dítak íying kínídko agér ibila yéyé.

¹²“Idola edílo dítak íying kínídde apíng yédí, ngo Babilon ami kídí emlang delokke rojem, buluke imem legape itung-iré yéku. Delokke dem amo demte agín legape moorukpe iyar moyéku.

¹³Buluke teyolo ngokke atímape ponam tabungem, kitab so atlíknam tabungem, Jeremiah kelok opín tabunglo kaalula pobinam tabung atímangem ngo ipíílíkmoyé.

¹⁴Bulume botteyana roje lang deddína opíne abílpe bomyéku. Bulu atírumape kape kísa itodí delok ayanem ngo buluk teyolo edorayéku.”

¹⁵RUUTUM Israelke Shédíbí ngome sikepe poto: “Ngokke alag so bomnam marlíng apongpe bííyamna bati sim laala ngokke nome lulígko opín takamem tííyin motoka.

¹⁶Edílo bulu sime tííyédí delo bulu ngegosula tumna kísa iyinyé. Kapeila buluke teyolo midu-mimagem ngo ruyinlíkyé.”

¹⁷Depeila ngo RUUTUM ke alaglok bati dem laala, bíkke lulígnam opín takamlo gíla, bulum tííyin moto.

¹⁸Jirusalem kelang Judah lokke doolung ami takam emlang roja kídí, delokke migom mite kídí takamem tííyinmoto. Depe igade bulu takam ami mirukpe iyinla ami takamke kangkolo reyub runam pelang tong-aryang ansu penam delokke amike amín kígenampe idokupe ito. Dekepe bulu silo loope yédung.

¹⁹Buluke méélamlo tíímín gepena opín-buange: migom mite roja kídíe, Ijipt lokke Pharaoh roja, bíkke ami kídíe lang migom-mite, delokke ruutum kídíe;

²⁰delo duumín gena mibo ami kídíe, Uj lokke roja tabungde, delokke Philistainke doolung - Ashkelon, Gaja, Ekron, delokke Ashdodlo dungkína ami kídíelang, doolung kídíke roja kídíe.

²¹Delokrongem, Edom, Moab delokke Ammon,

²²Tur kelang Sidonke roja kídíe, siyéng kékonke robenglo duuna roja kídíe;

²³Dedan, Tema, Buj delokke dumpong dumídem andengpe ngíngosuna ami takam;

²⁴Arabia lokke roja kídíe lang delo duuna mibo ami kídíke ruutum takame;

²⁵delok rongem Jimri, Elam, delo Mediake roja kídíe;

²⁶delokrongem línggíng telokke, anín lokkelang moote lokke akone tíírongem akone ila tani amoso dungkína opín-buang tabunge tííyinyé. Bulu takamke tííyin rongem Babilonlok rojaete bati delok tííyé.

²⁷“Depe irodem bulum sipe polangka: Maklíngke RUUTUM Israelke Shédíbí sipe podung, ‘Tíílangka, tíngírsula abat batlangka, gerep yimadupe oletlangka. Kapeila nolukelo ngo midu-mimagem melíkdak.’

²⁸Idola bulu nokke alag delok bati dem lamape tíímayémílo, bulum sipe lulangka, ‘Nolu tííperung aido emla Maglíngke RUUTUM bí podung.’

²⁹Kaalangka, ngokke amínem gena doolungdelo kerayalumpe ngo tong-aryangem langaadak. Iname nolumte asoope mesam yénía? Nolum kom emmumpe mesam mayé, kapeila tani amoso duuna opín takamlo ngo midu-mimagem melíkdak. Ralya yalumna RUUTUM bí sipe polendung.”

³⁰“Supak, sim kaalula lunam agom kídí sim buluke teyolo mirolpe lutat langka delokke sipe bulum lulangka: “RUUTUM bí kedonko lok uglenyé; bí agíke deena dungkolok érlenyé, yagorupe bík amo sokke mirupe lulenyé. Onggur ayém kéddud kísape, tani amoso duuna tabung teyolo bí yagorupe ngomlen bomyé.

³¹RUUTUM bí opín-buang takamlo, kebang lubomla, tani among duurí loope, ngomdudem takame tatpayé. Bí tani takamlo kebang baabomla, atímana takamem midu-mimaklo siyin moyé. Sikepe RUUTUM bí polendung.”

³²Maglíngke RUUTUM bí sipe polendung: “Kaatola! opín kon lokke opín konlo, tong-aryange kayin bomkai. Tani among duurí lokke gumnam botterungko mullenkai.”

³³Dekepe idí longe delo tani among sokke kéényung kon lokke kéényung kon loope mokanam ami simange doojé-dooyéngla dooyé. Bulum kabbom-rííbomla aipe yusila ina kamayé. Buluke simang takamde apom-apompe dooyinyé.

³⁴E mér kaabomna kídar, kapla rííla ilangka. Mér kídíke ruutum kídía, kédéng demullo ketgo tola. Nolum mokadí longe píídak, nolu olet yinla betmíkla, kédéng peking kísape iyé.

³⁵Mér kaabomna kídíde, dugge peko bedang kamayé; Mér kídíke ruutum kídíde, rusi sula duupí sugeko kamayé.

³⁶Mér kaabomna kídíke kapdud em tattola, mér ruutum kídíke ríídud em tattola; kapeila buluke yépomem RUUTUM bí atímape imodung.

³⁷RUUTUMke yagorupe markolok, eetet neyingpe duusuna, mér ekum kídíde bényinkai.

³⁸RUUTUMke yagorupe markolok, itung-iré nake mimak ibom kolok, myomur simyoe agí ketpom lok gílennam kísa, bí mepak kolok, asi among tabunge yépol amope ikai.