Read Alladian JEREMIAH 26 Bible Online

JEREMIAH 26 - Alladian bible

JEREMIAH 26

¹Judah ke roja Josiah ke oo Jehoiakim ke rojape ití-sigo lendo delo RUUTUMke agome Jeremiah kíng sikepe pííto:

²“RUUTUM bí sikepe podung: RUUTUMke Kumkeng Ekum delokke kebang ipom gíída delo daga dola, Kumkeng Ekum delo kumsu kape emla Judah lokke doolung ami takam aana kídíem, ngokke nom lulíknam tabungem lubi langka, agom atel kote mepak mapeka.

³Dekedem talla bulu, buluke atímana bedang lok gílat sulang kukom iyépe. Depe imílo, buluke teyolo ngokke atímangem laalíkpe emla mííbomnam lok ngo míílat sulangkula ilík malado.

⁴Bulume RUUTUM bí sipe podung emla pobi langka: Noluke keralo ngokke ayon leebinamem igemape, ngokke agomem tatmape,

⁵delokke moodí-moodílo agínpe lulíknam kaaluna miri kídí agomem tatmayémílo, arope nolu edílokom aipe tatkí bimang,

⁶delo ngo sim Kumkeng Ekum sim Shiloh em inam kísa iyé. Delo sim doolung sim tani among ara sokke ami aralo pémín suyém amín mín-genampe imoyé.”

⁷RUUTUM ke Kumkeng Ekum delo dekepe Jeremiah ke agom ponam dem miri kídíe lang kaaluna kídíe delokke ami tabunge tatyinto.

⁸Edílo Jeremiah bí bulume, RUUTUM ke lulígnam tabungem poyin bitodí, delo miri kídíe lang kaaluna kídíe, delokke ami kídíe bíme umla luto, “No sipe aiyé!

⁹No kapeila RUUTUM ke amínem mínbom dola si Kumkeng Ekum si Shiloh kísape iyé, delokke si doolung si ami kaimape kumrukpe ila rongngamyé emkan?” Depe ido delo, Kumkeng Ekum delo deddíko bosi amie dumsuto.

¹⁰Edílo dem legadem Judah lokke migom kídíe tattodí, bulu roja ekum lok gílenla RUUTUM ke Kumkeng Ekum delo pííto. Delo pííla Kumkeng Ekum delokke Luuyab Aní delokke aatak delo bulu buluke duupekolo duuto.

¹¹Delo miri kídíe lang kaaluna kídíe migom kídí kelang bosi ami keradelo sikepe lukanto, “Si ami si doolung sokke atímang rego mílílo potídung, iname bíme mokape aido. Nolu agísue, agí nyorunglok bík agom lunam kídíem tatyinsune.”

¹²Delo Jeremiah bí bosi daadi ami kídar demlang migom kídí dem poto, “Noluke tatnam kídarde RUUTUMke doolung sokke atímana ikupenam legange lang Kumkeng Ekum sokke legangem ngokkíng lulíkname.

¹³Nolu RUUTUM noluke Shédíke agomem tatla, noluke akor-ayor ségu delokke bedu-beleng kídíem isi-imo sulangkuka. Depe imílo noluke teyolo RUUTUM bí ayang langkula tong-aryangem langaamayé.

¹⁴Ngo agí sidan noluke alag aralo kadung. Noluke míínampe, ainem lang jonna bedangem kaabom dola ngok teyolo itoka.

¹⁵Idola sim nolu mínggap gepe aido: Nolu ngom moka yémílo, nolu agísue noluke teyong lolang, doolung teyoso delokke so duuna ami takam teyolo sidum-dengepe yésunake yilíng bítre paabem laangasuyé. Kapeila sim agom kídí sim nolum pobodope arope RUUTUM min ngome melígtune.”

¹⁶Delo migom kídí delang doolung ami kídíde, miri kídí demlang kaaluna kídídem poto, “Sim ami sim moka dope kebang lupenam kamang. Kapeila bí, RUUTUM ngoluke Shédíke amínlok min sikena agom kídí sim podune.”

¹⁷Delo doolung kídí lokke miro ami ayokone darepla bosi daadike tatkolo poto,

¹⁸“Judah ke roja Hejekiah ke longe delo Moresheth lokke Mikah bí kaalu agomem luto. Delo bí Judah lokke ami takamem lukanto, ‘Sikepe Ralyayalumna RUUTUM bí podung: “ ‘Arík em aal gurnam kísa Jayonem guryé, Jirusalemem nyoruk uupom kísape iyé, Kumkeng Ekum si moonampe ikuna díítum kísape iyé.’

¹⁹“Delo Judah lokke Hejekiah roja lang Judah ami kídí aralo bím mokape ina katonía? Hejekiah bí RUUTUM me pesola bíkke ayangem mata matonía? RUUTUM kom aapí míílat sulangkula bíkke langa penam tong-aryangem langaamape imanía? Supak ngolu, ngoluke agísu teyolo atírumana tong-aryangem langa sulíkdak!”

²⁰(Kiriath Jearim lokke Shemaiah ke oo Uriah kom RUUTUM ke amín lok kaalu agom luna amikonpe ito. Bíkom Jeremiah ke kísa among sokke lang doolung sokke atímape ikupenam legangem kaalula lugoto.

²¹Edílo roja Jehoiakim lang bíkke mite- migom kídíe, delokke abíd doolung ruutum kídíe Uriah ke agomem tattodí, rojade bíme mokape matato. Idola Uriah dem tatsula, pesolok Ijipt amope dugnyok geto.

²²Idolate roja Jehoiakim bí Akhborke oo Elnathan me Ijipt amope lulígla, bíkkelo ami ayokote lutem líkla melíkto.

²³Bulu Uriahme Ijipt amolok umla roja Jehoiakim ke keralo aabotoku. Delo rojade bíme yoksalok paka mola bík simang dem moomem amiem yupomlo yuto.)

²⁴Idokom Shaphan ke oo Ahikam bí Jeremiah me igulla, ami kídíke alag aralo bíme moka momato.