Read Alladian JEREMIAH 27 Bible Online

JEREMIAH 27 - Alladian bible

JEREMIAH 27

¹Judah lokke roja Josiah ke oo Jedekiah ke roja ití-sigoem RUUTUM kelok Jeremiah kíng agome pííto.

²RUUTUM bí ngome sipe poto: “No esing lok jungoliko mola ayo rímolok aipe dem éédum sula nok alíng delo gebomto.

³Dekepe irongem Jirusalem so Jedekiah roja kíng, Edom, Moab, Ammon, Tur, delokke Sidon lokke kotoki aana kídílo, buluke roja kídíem podokupe sim agom sim no bulum lubi langka:

⁴‘Sikepe Ralyayalumna RUUTUM Israel ke Shédí bí noluke roja kídíem pobi dokupe ludung:

⁵Ngokke lakbíng annyi sokke botteruna pauar lok yamtar dula among sim, so yéna taniem, delokke taroem pílento. Sikesim ngokke agí míngkor supe, mííba sunamem ngo bidung.

⁶Supak Babilon lokke ngom agér ibina roja Nebukadnejjar ke alag aralo nolum takam ngo ruulíkyé. Moonam lokke taro kídíemte bík agomem tatdope ngo iyé.

⁷Amo yéta takame, opín-buang daadie bím lang bíkke oo kídíloope agér ibila bíkke amo yéta nyokkuma tete loope bíkke rumkílo yéyé. Delok rongem bíkke opín-odonge bulum pemílo pauar kayana kímte-remte yana roja kídíke alag aralo bulu yéyéku.’ ”

⁸“Idola ingko-ingko opínedí, demangkom amo yétedí Babilon ke roja Nebukadnejjarme agér ibimape demangkom alínge bíkke jungoliem gemayédí dem opín dem, dem amo yéta dem ngo midu-mimaklok, dírí-keno lok, kilii-ramlilok melígla Nebukadnejjar ke alage petyinma teteloope katímoyé.

⁹Depeila nolu, ‘Nolu Babilon ke roja rumkílo yémayé,’ emla noluke kaaluna kídíke, líímé kaanake, immang ponake, aid mirike, delokke moya-montrong ina kídíke agom ponam kídíem arope tatmem sumapeka.

¹⁰Noluke tatkolo bulu aro agom lumang. Buluke gomtílok nolu, nolume mooteng amolo umnyok kosuyé. Ngo nolume monnyokla nolu nyokyinyé.

¹¹Idola ingkona opíne, Babilon ke roja jungoliem ngemgíp gedola agí alínglo joolík sugela agér ibiyédí, dem opín dem ngo agí amolo arík-anam isula duusu dope imoyé. Sikepe RUUTUM ngo polendung.”

¹²Sim agom pak sim Judah lokke roja Jedekiah me ngo pokanto. Delo ngo poto, “Babilon ke rojake jungoliem ngemgíp gela no gela bím lang bík ami kídíem agér ibila itola; delo no turla duuyé.

¹³Babilon rojem, agér ibimana opín kídíem, among yéta kídíem, midu-mimaklok, dírí-kenolok delokke kilii-ramli lok aimape imoyé emla RUUTUM ke lugong aralo kapeda no lang nok ami kídíe sipene?

¹⁴Nolu nolume, ‘Babilon ke roja rumkílo nolu yémayé,’ emla kaaluna ami kídíke agomem tatmapeka. Kapeila bulu medung.

¹⁵RUUTUM bí sikepe mandung, ‘Ngo bulum lulígmang, bulu ngok amínlok menam agom podung.’ Depeila RUUTUM bí nolumlang dekepe kaaluna menam agom pona kídíem monnyokyé, delokke nolu takam nyokyinyé.”

¹⁶Depe irodem ngo miri kídí demla ami kídí tabudem poto, “RUUTUM bí sikepe podung: ‘Babilon elok Kumkeng Ekum sokke ekuserang kídíem menape bomyin aayéku,’ emla kaaluna ami agom kídíem tatmapeka. Bulu nolume menam agom pobidung.

¹⁷Buluk agom tatmape Babilon ke rojem agér ibilangka, delo nolu turla yéyé. Doolung si ingko legape nyokpene?

¹⁸Bulu arorupe kaaluna miri amie kemílo, buluke nappa delo arorupe RUUTUM ke agome kadumílo, Kumkeng Ekum sokke ekuserang kídí takam emlang Jirusalem ke delokke Judah ke roja dungko ekum lokke ato-siro takamem Babilonpe giimo kumadope bulu Ralyayalumna RUUTUM kíng rogutoka.

¹⁹Babilon lokke roja Nebukadnejjarke, Judah lok roja Jehoiakim ke oo Jehoiashin melang Jirusalemlo duuna delokke Judahlo duuna migom-mite kídíem Babilon pe umnyok bomdokuem doolung so bí,

²⁰bottena pírílna gaang kídíem, pitol lok pínam téngki bottenem, gaari kídí emlang Kumkeng Ekum sokke ekuserang ayoko giibom kumape menam kídíke teyolo,

²¹arope sikepe Maklíngke RUUTUM Israelke Shédíbí Jirusalem delokke Kumkeng Ekum delo lang roja ekum kídí delok ekuserang bomngong kunam legangem podung:

²²‘Deke tabung demte Babilonpe giibom yéku. Dekede, ngokke ipít díku longe teloope Babilon elo duuyarpoyé. Depe duurongem longeko ngo dekedem ipít langkula so boma langkula ami kídíemte amoso duumoyéku.’ ”