Read Alladian JEREMIAH 29 Bible Online

JEREMIAH 29 - Alladian bible

JEREMIAH 29

¹Nebukadnejjar ke Jirusalem lok Babilon loope umnyok bomkunam, miri kídí, kaaluna kídí, migom-mite kídí delokke abíd ami kídílo rumkíngke agom kídísim shitipe atla kaalu miri Jeremiahke melíkname.

²Sim shiti sim, roja Jehoiashin melang, rani lok aneme, migom kídí emlang Judah ami kídíke doolung ruutum kídíem delokke atí-atí mistripe ina, moi-muang pína, delokke abíd kídíem Jirusalem lok umnyokla Babilonlo gíborongkuem atto.

³Sim shiti sim Jeremiah bí Judah lokke roja Jedekiah ke Babilon lokke roja Nebukadnejjar kíng kotokipe lulígnam Hilkiah ke oo Gemariah melang Shaphan ke oo Elasah bínyi kíng bilíkto. Shiti delo sipe atto:

⁴“Jirusalem lokke Babilonlo ngokke umnyokmola melíknam takamlo, Ralyayalumna RUUTUM Israelke Shédíbí sikepe podung:

⁵Nolu aipe ekum kumbosula eetet-monetpe duulík langka. Ríkséng arík ila, bagan ila delok lennem dola tíílangka.

⁶Dekedelo omum-nyameng ibosula ome-oo obosulangka; ome-uem nyamran ibilangka buluteng ome-oo kadope. Nolu milu-mibam langka; ami parmape imapeka.

⁷Ngokke nolum menyok líkko doolung legape ainem delokke unnotiem mata bilangka. Deke delokke unnoti penam legape RUUTUM kíng kumbilangka, depe imílo nolukom unnotiyé.

⁸Aroe, sikepe Ralyayalumna RUUTUM Israelke Shédí bí podung: Noluke ara delo aromana kaaluna miri emlang líímé tagil inem nolu yatko sumapeka. Buluke immang pobinam emte arope tatmapeka.

⁹Bulu ngok amínlok menam kaalunam agom mílílok potí goodung. Ngo bulum lulígmang.

¹⁰“RUUTUM bí sipe podung, ‘Babilon delo nolu dítak íying kínídko apíírupe duulík rongem, ngo nolukíng aala, ngokke togesunamem ipíínam legape nolum agíke asi-amoso ngo langaayéku.

¹¹Ngo petom noluke legape atíko mííbidung. De atíde noluke ainam legange, noluke loorí pemanam legamang. De atíde noluke lunnyi-nyampoke yékupenam lokke botterupe míída subom penamko.

¹²Depe irongem, nolu ngokkíng aala, ngome kumsu-joosula iyé, delokke ngo noluke kumnamem tatbiyé.

¹³Nolu aro aapílok apíípe edílo ngome matayédí, delo nolu ngome paarík suyé.

¹⁴Nolu ngom mapaayé, emla RUUTUM ngo arope podung. Ngo nolum umnyokla duumoko amo delok laalen yéku. Ngokke nolum mepit-meyitla mepan suko among, opín-buang tabunglok ngo laadum suyin yéku. Depe laadum suyin palangkula ngokke nolum monnyok lenko amoso nolum laayin aayéku.’

¹⁵“Babilon lo RUUTUM bí ngoluke legape kaaluna amiem ruulen sutung emla nolu polado.

¹⁶Idola Dabid ke roja palenglo duuna roja legang emlang doolung so enmín gemape duuna kídíke legangem RUUTUM bí sipe emdung:

¹⁷Arope sikepe Ralyayalumna RUUTUM bí podung: ‘Buluke teyolo ngo midu-mimagem, dírí kenoem delokke kilii-ramliem melíkyé. Dokan manam yarok- yasokna donam tapang ayé kísape ngo bulum imoyé.

¹⁸Ngo buluke teyolo midu-mimak, dírí-keno delokke kilii-ramliem monmín gemola tani among sokke ami takamke reyub rupe ansu gepenam amipe, delokke ami takamke belum-lumkengpe, lupu-lulé lukepe, ngokke bulum monlíkko ami kídí aralo bulume imoyé.

¹⁹Kapeila bulu ngokke agomem tatmaato,’ RUUTUM bí sipe podung, ‘Buluke teyolo ngokke kaaluna miri kídíem melíkla moodí-moodílo potí líkla ilate bulu tatmang. Nolu umnyoknam kídí nolute bulu kísa ngok agomem tatmato.’

²⁰“Dekepeila ngokke Jirusalem lokke Babilon lo umnyokla duunyokdope ruulíknam nolu RUUTUM ngokke agomem aipe tatgap langka.

²¹Ralyayalumna RUUTUM Israelke Shédí ngo, Kolaiah ke oo Ahab melang Maaseiah ke oo Jedekiahme, ngokke amínlok menam kaalu agomem lutí gonam legangem sipe podung: ‘Babilon lokke roja Nebukadnejjar ke alaglo bínyime ngo ummoyé. Noluke kangkolo bínyime bí mokayé.’

²²Dekepeila Judah lokke Babilonlo duunyok monam ami kídíe buluke aralo péyém, ‘Babilon rojake emelok romkanam Ahab delokke Jedekiah ke kísa RUUTUM bí nom imoyé,’ emla pélík dungai.

²³Kapeila bínyi kumrí donggong lokke méng kídí teyolo abír-ayo iko teyolote ngokke bínyim lulíg manam agomem, ngok amínlok menam hényipe megoola pogoodung. Ngo legasim aipe kéndung, delokke bínyik teyolo ngo agísue hakii bisudung. Sikepe RUUTUM ngo polendung.”

²⁴Nehelam doolung lokke Shemaiahme sim agom sim pobilangka:

²⁵“Ralyayalumna RUUTUM Israel ke Shédíbí sikepe podung: No agí amín lok Jirusalem lokke ami kídí emla miri Masseiah ke oo Jephaniah melang abíd miri kídíem shiti attung. Delo no Jephaniah me sipe potung,

²⁶‘Kumkeng Ekum dem kaabom dope Jehoiada ke ayanpe nome RUUTUM bí parlentung, delo supak no ruutum botteyalumne. Depe iname no kaaluna miripe iru gona bopol ami lenyémílo, deme no íkoli lok yééla arem kongkel lok alínglo píllíkla ilangka.

²⁷Supak pete noluke aralo kaaluna miripe lengkan supolna, Anathoth doolung lok Jeremiah me umla yéémanía?

²⁸Bíme itumpe aiyé, kapeila bí, “Ngolu deddína longeko pakne-pakbope delo duuyé, iname nolu ekum kumlíkla, ríkséng delokke baari ila, deke delok lennem dola-tííla aipakpe duulík toka,” emla Babilon so duuna ngolum agom biyatung.’ ”

²⁹Idola shiti dem miri Jephaniah bí, kaaluna Jeremiah me rikanbito.

³⁰Delo RUUTUM ke agome Jeremiah kíng pííto:

³¹“Umnyokla duumonam tabunglo sim agom sim polangka: Nehelam doolung lokke Shemaiah ke legangem RUUTUM bí sipe podung: Ngo atí lulígmape Shemaiah bí kaalu agom pola nolum yatto.

³²Yatga legape RUUTUM bí sipe ludung: Ngo Nehelam ke Shemaiah me ajéng iyé, delok teyolo bík ome-oo kídí loope ngo emmumpe mesam mayé. Ami kídí aralo bí petom yérísula bí attíng kayimayé. Ngokke ami kídí teyolo ngokke ainam agér ikupenamem bí kaapamayé. Kapeila bí ngokke mirupe idope ami kídílo aimana agomem lutígooto.”