Read Alladian JEREMIAH 3 Bible Online

JEREMIAH 3 - Alladian bible

JEREMIAH 3

¹RUUTUM bí podung, “Amikone agí mimeme mepaksupala, akon mimepe imo palangkula bí lekoda bomlat sulangkumayé. Depe imílo asi-amongde abíd-akat mayénía? Idola no notiipe, deddínem mííbo surongem, ngokkíng aalatsula yékunía?

²Millongko dííte teyo telo kaadu sutola! Nokke notiipe imangko kadunía? No bedu-bedalo, míínako kayéneya emla duutígoona notiipe igoola, yépol mooruklo Arab ami lokke tobomnam kísa itígoodung. Depeila nokke atímape, notiipe itígongkolok, no asi-amongem deemang mokai.

³Depeila pedongem omomato, delokke dígín aapamem aamomato. Idolate no notii migmope genako, delokke annying emnam anyongkote kamang.

⁴Idola supak no podung: ‘No ngokke abue, ngokke koo amélokkai no ngom ayane.

⁵No ngokke teyolo maryarmayé delokke agínke legape nok kaníngem mepaksuyé.’ Israel no atímana agérem itídula sikepe potídung.”

⁶Josiahke rojape idoeme RUUTUM bí ngome poto, “Míngkesumana Israelke inamem no kaaton? Bí díítum miyonglo renggoola, rotne miyong rumkílo notiipe igoodung.

⁷Sikepe irongem bí ngokkíng aalatsuyéku emla ngo míítuai, idola bí aalat sukumang. Bíkke loorímana bírme Judahteng kaato.

⁸Depeila ngo míngkesumana Israelme mekunam kakodem bila, bíkke notii agér igape bíme lupakto. Idolate bíkke loorímana bírme Judah bí dem kaalate atí peso emnam kamape, bíte gílenla abír-ayo mílílo idope ngo kaato.

⁹Israelke notiipe inamde Judahke amiglo améngonakope ila bí elíng kídílo, esing kídílo uyu kumgoola among sime deemang mokai.

¹⁰Sikepe irongemte Israelke loorímana bírme, Judah bí aro aapílok ngokkíng aalat sukumape irudung. Sikepe RUUTUM ngo polendung.”

¹¹RUUTUM bí ngome poto, “Míngkesumana Israel bí, míngkesumana Judah mempemílo deeyadung.

¹²Depeila sim agom sim Israel telo gígoola pogoolangka: E míngkeng kamana Israel, ngokkíng aalat sutokula, kapeila nok teyolo ngo agín legape marbom yimayé. Ngo asampe ayang kunako.

¹³Nokke atímang inamem, aroe emla togesulangka, RUUTUM nokke Shédíke mirolpe no ito. Nokke mibo-miying uyu kídílo, rotne esing rumkíng kídílo, kumgong sunamem delokke ngokke agomem tatmape inamem no togesulangka. Sikepe RUUTUM ngo polendung.”

¹⁴RUUTUM bí sipe podung, “Míngkeng kamana ami kídar nolu, aalat sulangkuka. Kapeila nolu ngokke. Ngo doolung miyolok midum atelpe delokke opín miyolok midum annyipe ullenla Jayonlo bomayéku.

¹⁵Delo, ngok aapí gekampe gela kénnam elang gyane kana amiko noluke ruutumpe ngo biyé.

¹⁶Delo longe kídí delo, edílo among delo noluke ami kídíe bojérupe paryékudí, ‘RUUTUM ke Daapong sonduge,’ emla ami kídíe agom dem pobo suyimayé. Kapeila dekem bulu mííyimayé delokke akoyangko píkupete, agér angkumayé.

¹⁷Delo longe kídí delo, Jirusalem me ‘RUUTUMke Palenge,’ emla ami kídíe luyinyé. Kapeila Jirusalemlo opín-buang daadie RUUTUM ke amínem rínggekape píídum suyinyé. Buluke atímana, tolna aapí ségulok, bulu yéyimayé.

¹⁸Delo longe kídí delo Judah erange lang Israel erange leko bosuyéku. Bínyi lekope línggíng among telok toklangkula buluke buku kídíem yéyar bomdope ngokke bisunam amonglo duubosuyéku.”

¹⁹Ngo agísue poto, “Ngo ashérupe Israel nom oope míísula, among takam lokke gaiyalumna delokke erbom yalumnam amongem bipe emla mííto. Ngok keralok gínyok kumape, ai-kampope yédola ngome no abue emla gogdope ngo míítuai.

²⁰Idola e Israel, milo keralo bíírík-hamgomana mime kísa, ngok teyolo no loorímangkai.

²¹Depeila míllongko díítum teyolo kapdud eke tatkai dekede Israelke rogula kapnam rííname. Kapeila bulu, RUUTUM buluke Shédíme mitpansula paab yénamlo yékai.

²²E míngkeng kamana ami kídíe, ngokkíng aalat sutokuka, ngo noluke loorímape yékunam kídí delok ipítyéku. “Nolu podung, ‘Aroe, ngolu RUUTUM kíng aadakku, kapeila no ngoluke Shédíe.

²³Ngolume ngoluke adi teyong kídílo mimang kumgoola inamde atí igulmato. Israelke legape petom RUUTUM ngoluke Shédí kelokmin igule aadune.

²⁴Idola annying paamona Baal uyume kumsunamde ngoluke buku-neku kídíke agér-anam tabungem, buluke mér alung emla rubamem, delokke ome-oo kídí takamem nyokyin moto.

²⁵Ngolu annyinglok ngemgíp gebangkai, delokke ngoluke bopol agére ngolum polum bomdakyika. Ngolulang ngoluke buku kídíe agínpe RUUTUM ngoluke Shédíke agomem tatmape paab ito; ngolu edíloteng bíkke lulígnamem igemato.’ ”