Read Alladian JEREMIAH 30 Bible Online

JEREMIAH 30 - Alladian bible

JEREMIAH 30

¹RUUTUM Israelke Shédíbí Jeremiah me sikepe lulígto:

²“Nom ngokke agom ponam tabungem kitab kolo atkum langka.

³Ngokke agí amisu, Israel melang Judah me abílpe mibo amolo duunyok gongkolok ipít lenlang kula buluke buku kídíem ngokke among binam so yébom dokupe, bulume langa díku longe pííyé.”

⁴Israel kelang Judah kídíke legape RUUTUM ke ponam agome sikesi:

⁵“Ngo peso-ríanla kapnam adud ko tatdung, de pesolok kapname, aapí eetet dola kapnammang.

⁶Íngkíla kaatola: Milokong amide koo gelayén? Dekemíl kapeila ngo ralna milokong tabungem, migmue yagorupe morukla mime lokke okii kinam kísa akiiem gomsula idupe takam mipilem kangkan?

⁷Reyub runam longe píídak, deme abíd longelo ruupe sulamang. De longede Jakob ke ankí-kenodí longe, idola bíme longe delok mopítyé.”

⁸Ralyayalumna RUUTUM bí sipe podung: “Delo longe delo buluke alínglo gin-genam kongkel dem taabínyé, bulume yéénana íkoli dem kokpakyé, delokke bulu mibo amike abílpe edílote iyi mayé.

⁹Delok ayanpe RUUTUM buluke Shédí ngome, delokke buluke legape ngokke ruulen bikupenam Dabid kíng lenna roja otíng konem bulu agér ibiyéku.”

¹⁰“E Jakob, ngok ami kídía peso mapeka, E Israel nolu adír mapeka. Mooteng amolok ngo nolum arorupe mopítyé, duunyok kolok noluke otíng-oyinem langaayéku. Delo Jakob bí atí peso kaimape eetetpe yéyéku, delokke sékokom irít-iketla ina kaimayé.

¹¹Ngo nolukíng yémín gela nolum mopítyé, ngokke nolume mibo ami aralo duupan sugo mola iko, mibo kídíem ngo nyokyin modak kukom, nolum ngo nyokyin momayé. Ngo nolum irít-iketla iyé, emmumpe mesam mayé, idola de deepítnam bedalok iyé. RUUTUM ngo sipe polendung.”

¹²Sikepe RUUTUM bí polendung, “Noluke tarí ríyingde géngku lamane, noluke tuppuk sunam dem ipí layimaname.

¹³Nolum sékote kaasina kamang, noluke tasut legape kuséréng kamang, nolum ipí peko bedang kaimang.

¹⁴Noluke magpéé tabunge nolum mitpan sukai, bulu noluke legape atí kaamang. Noluke paabe bojé aloola, imeme bojé aloola, miru amike itung-iréla ayang aapí kamape, inam kísa ngo nolum itung-iréto.

¹⁵Ipísuyi kupemanam tarí kinam dem, kape nolu kapgekan? Noluke botterupe imemla, paab bojé kolok sikepe ngo nolum ito.

¹⁶Idola nolum dona kídíem doyéku, noluk miru kídí emkom umnyokyé. Nolum líína kídíem lííyéku, nolum loorímape ina kídíem ngo edo rayéku.

¹⁷Idola ngo nolume amíl edíng molangkula, noluke tarí kídíem ipí píyin yéku. Kapeila nolume, ‘Mepaknam amie, Jayon bí sékote kaabom maname,’ emla miru kídíe ludung. RUUTUM ngo sikepe polendung.”

¹⁸RUUTUM bí podung: “Jakobke ekum kídíke miremem ngo remmo yéku. Bíkke ami kídíke duupom kídíem ngo ayayéku. Byakrukko doolung delo ngo aní doolungem ilen moyéku, líísak ekum kídíem lekoda angun moyéku.

¹⁹Deke deloge ashénam, yidgenam miri ludude lenyéku. Bulu mitu-horépe iyimape delok ayanpe, bulume ami pardokupe ngo ruuyéku. Ngokke utepooroe bulukíng kamín gela, erkígenam amipe bulu iyéku.

²⁰Lembíd longe kísa buluke ome-ue kayéku, delokke ngok keralo buluke opín-buang kídíe kayin yéku. Bulum irééna kídíem ngo edo rabiyéku.

²¹Buluke aralo bulum yébone lensu langkula, bulu ruutum kasuyéku. Ngokke tomyém bí ngok keralo dagayé. Arope emmíl séko amieda ngok keraso aapí miramla dagayén?

²²Bulu ngokke amipe iyéku, delokke ngo buluke Shédípe iyéku. RUUTUM ngo sikepe polendung.”

²³Kaatola, RUUTUMke aklíng marname gumnampe mullenla, atímana kídíke dumpong teyolo meyatpe yattok bomyé.

²⁴RUUTUMke yagorupe marnamde bík aapílo mííbomnamem apíípe ipíma tete loope aalat sukumayé, sim lega sime yékupenam longelo nolu kényin suyéku.