Read Alladian JEREMIAH 34 Bible Online

JEREMIAH 34 - Alladian bible

JEREMIAH 34

¹Babilon lokke roja Nebukadnejjar lang bík maglíng kídíe delokke bíkke ruutumpe ibomnam among yéta takamke ami kídíde Jirusalem emla delokke dei-degonglo duuna doolung kídíem mimakpe idungem, RUUTUMke agome Jeremiah keelo pííto:

²“RUUTUM Israelke Shédíbí sikepe podung: ‘Judah lokke roja Jedekiah kíng gíla bím polangka, RUUTUM bí sipe ludung: Babilonke roja alag aralo sim doolung sim ngo melíkdak. Bí doolung sim emepe rílíkdak.

³No edílokom bíkke alag aralok dugnyok gelamayé, nome bí umyérung. No Babilonke rojeme agí amiglok kaasuyé, migmoe geríksula luposuyé. Nom Babilonpe umla gíboyéku.

⁴Idola E Jedekiah roja, RUUTUMke togesunamem tatsutola. Nok teyolo RUUTUMbí sipe podung: Nome yoksalok mokamayé.

⁵No ai-kampope siyé. Nokke roja itítnam, nokke abu kídíeme kapekísa arí namponem buluke simang teyolo ilíkla ami kídíe gai-gakope yutodí, deke kísape bulu nokke siyékuem nok simang teyolo arí namponem romlík bila, pengé lula aipe yuyé. “Uloi, E ruutumpe yébone!” emla ami kídíe dekepe emyé. Ngo agísue agom sim togesula RUUTUM ngo polen sudung.’ ”

⁶Sim agom kídar takam sim Judah lokke roja Jedekiah ke nyorunglo, Jirusalemlo Jeremiah bí poyin bito.

⁷Dekepe podu delo Babilon lokke rojake maglíng kídíde Jirusalem emlang Judah lokke abíd doolung kídíem mimak ibomto. Dekepe ido delo líísak etorpe torgosula ina Lakhish elang Ajekah doolung annyi petomde miru alag aralo aamangada, idola demte mirue gargo bomto.

⁸Abíl kídíeme ruutumpe yéyin sudokupe roja Jedekiah ke Jirusalem doolung ami kídílo daapong ibosudodem Jeremiah kíng RUUTUMke agome pííto.

⁹Delo mime-milope abíl kídíem, abíl bomna kídíe ruutum mokupe aito. Sékote Jihudi amiem abílpe bommo madope ayonem ibosuto.

¹⁰Depeila séko-sékodí daapongke ayonem elík bosutodí, bulu takame abíl kídíem mime-milope abílpe bomyimape ruutum tummotoku. Bulume sadínpe yémo dokupe takame tolík bosuto.

¹¹Idola méélamdem bulu aapíe míngkup-míílat langkula abíl kídíem, abílpe laayin aatoku.

¹²Delo Jeremiahme RUUTUM bí lulígto:

¹³“Sikepe RUUTUM Israel ke Shédíbí podung: ‘Ijipt amolo, noluke buku kídíke abílpe yéko amolok, ngo bulum laalen langkula daapongem ibosuto.

¹⁴Delo ngo sipe manto: Nolukíng abílpe Hibru aní-bírokone, kolíksuna kídíem dítak kínídnalo ruutumpe yésu molangkuka. Toodí takkéko agér ibirongeme dítak kíníd nana delo nolu ami deme apítpe melen langkuka!’ Idola noluke abu kídíe ngok agom-aangem aipe tatbi-kaabi tomang.

¹⁵Longko-loonyi araso nolu aapí-aange míílat sulangkula ngokke amig kaabape agérem ituai. Mipil nolu agí amike apítpe yékunamem elík bosuto. Nolu ngokke amín kako Kumkeng Ekum loote ngok keralo daapongko ito.

¹⁶Idola supak nolu aapíe gene-geo langkula, ngok amínem deema mokaku. Mipil-miyong nolu agí-agí abíl kídíem, mimedak milodak agí míínampe yédokupe sadín bipakula lekoda ijém-hiyém langkula abílpe iyin motoku.”

¹⁷“Depeila RUUTUM ngo nolum sipe ludung: Nolu ngok agomem tatmang. Nolu agí amisuem sadín bisu kumang. Iname supak ngo noluke legape midu-mimak, kilii-ramli adírem popa bidung. Noluke regoem kaala tani takam opín-buange peso-ríanpe mínggeyé.

¹⁸Séko amiedí ngok keralo daapong itula daapong ayonem ipíímape angu konpe ipatsula itodí, dekedem ngo rubílem tarong annyikope tekpala, tarong kídí delo korbongla gínam simang doona delok kísape imoyé.

¹⁹Daapong ibosudodem, Judah keelang Jirusalemke miro kídíe, kebang ekum ruutum kídíe, miro kídí elang among sokke ami takame tarong annyi kope teknam pénsam delok gíkok kokyinto.

²⁰Dekepe korboona kídídem, bulum matana miru kídíke alag aralo ngo melíkyé. Buluke simang kídíem asarlo yopna pettang kídí elang moonam lokke taro kídíe doyé.

²¹Ngo Judah lokke roja Jedekiah melang bíkke mite-migom takam bulum matana miru alaglo ruulíkyé, delokke supakke mimak ipoyimape tekíngpola ina Babilonke maglíng aralo kolígyé.

²²Ngo bulume ukumlíkyé. Ngo bulume aalat sumolangkula sim doolung sim mimak iyang moyéku. Bulu aabom langkula, ikumla, doolung sim emepe rípakyé. Ngo Judah lokke doolung kídíem sékote duuna kaimadupe rongngamna kumruk doolungpe iyinmoyé. RUUTUM ngo sipe polendung.”