Read Alladian JEREMIAH 35 Bible Online

JEREMIAH 35 - Alladian bible

JEREMIAH 35

¹Judah lokke roja Josiahke oo Jehoiakimke roja ido longe delo RUUTUMke agome Jeremiah kíng pííto:

²“No Rekab eralo gíla, Kumkeng Ekum lokke pírtek konlo bulume tomala tíídope aponglok bulume bilangka.”

³Depe lulígkolok ngo gíla Habajjiniahke onam Jeremiahke oo Jaajaniah melang bíkke bíro kídídem, delokke bíkke oo kídídem, bulum Rekab erang tabungem tomto.

⁴Bulum ngo Kumkeng Ekumlo aabo langkula, Shédíke ami Igdaliah ke oo Hananke oo kídíke dungko Kumkeng Ekum delokke pírtek konlo aabotoku. Buluke dungko pírtekde Kumkeng Ekum lokke ruutum konpe ina Shallumke oo Maaseiahke dungko pírtek kelang abíd-abíd migom kídíke dungko pírtek anínlo katuai.

⁵Delo bulum ngo duumopala apong kaglak bíísétna demlang bati kídíem bomala bulume apong tíídope, “Apong sim tíítola,” emto.

⁶Idola bulu poyansuto, “Ngolu apong tíímang. Kapeila ngoluke abu buku Rekab ke oo Jonadab me sipe lulígto, ‘No lang nokke otíng-oyine edílokom apong tíímapeka.

⁷Delokke no edílokom ekum mola, arík ila ali-ayé sidla, onggur bagan ila, among rela imapeka. Sikepe no edílokom imapeka. Idola agínpe tombu ekumlo duulangka. Depe imílo matígoona mibo ami kísa, no yéla deddína yénamem no turla yéyé.’

⁸Depeila ngoluke abu buku Rekabke oo Jonadabke luyilnamem ngolu apíípe iyar gedung. Ngolu agísue lang, ngoluke ome-oo delokke ngoluke mime kídíe edílokom apong tíngkímang.

⁹Ngolu edílokom ekum mola, arík ila, bagan ila, ali-ayé ilíkla ikímang.

¹⁰Ngoluke buku Jonadabke luyilem atel kote mepak mape ngolu tombu ekumlo duula iyar gedung.

¹¹Idola edílo Babilonke roja Nebukadnejjar bí ngoluk among sim mimakpe aabomtodí, buluke Babilon maglíng kídí loklang Siria maglíng kídílok dukpí sugepe Jirusalem so ngolu anggeto.”

¹²Delo RUUTUM ke agome Jeremiah kíng pííla sikepe poto:

¹³“Ralyayalumna RUUTUM Israelke Shédíbí sikepe podung: Judah kelang Jirusalem ke ami kídíem gíla sipe lulangka, ‘Ngok agomem tatla nolu kaayil sumanía?

¹⁴Rekab ke oo Jonadabke lulígnamem bíkke oo kídíe airupe igela silo pete atí asi-apong tíímang. Buluke buku kídíke agomem tatla silo loope asi-apong atí tíímang. Idola nolum ngo moodí-moodílo poyar tete late nolu ngok agomem tatmang.

¹⁵Ngokke kaaluna miri kídíem nolukíng metílíkdung. “Nolu mipile atímana bedalok gíyimape, agí-agíke bedu-belengem isi-simo sulangka. abíd-abíd uyuem kumsu goomapeka. Depe isi-simo sumílo, noluke buku kídí emla nolume ngokke binam amoso nolu duuyaryé,” emla bulu potíto. Idola nolu atí tatbimang, delokke ngok agomem deperung emla mííbimang.

¹⁶Rekab ke oo Jonadab ke otíng-oyine buluke abu buku lulígem edíírupe bomgap gedung. Idola si ami kídísí ngok agomem tatna kamang.’

¹⁷“Dekepeila Ralyayalumna RUUTUM Israel ke Shédí bí sipe ludung: Tattola Judah lokke ami kídí teyong lolang Jirusalemlo duuna mipil ami teyolo, ngokke lupa tonam itung-iré penam ato takamdem ngo langaayé. Ngo bulum deddípe potí late bulu tatna kamang; ngo tomlate bulu elíkna kamang.”

¹⁸Delo Rekab erang dem Jeremiah bí poto, “Sikepe Ralyayalumna RUUTUM Israelke Shédí bí podung, nolu noluke buku Jonadabke agomem aipe igedung. Nolu bíkke luyilnam tabungem atel kokom igemape imape takamem igap geyardung.

¹⁹Depe noluke igap gekolok, Ralyayalumna RUUTUM, Israelke Shédí ngo sipe podung, ‘Rekab ke oo Jonadab kelok lenna otíng-oyin aralo agínpe ngome agér ibina amiko kayérung.’”