Read Alladian JEREMIAH 36 Bible Online

JEREMIAH 36 - Alladian bible

JEREMIAH 36

¹Josiah rojake oo Jehoiakim ke dítak appi nape Judah lokke rojape iduem, RUUTUM ke agome Jeremiah kíng pííto:

²“Josiahke roja ido delokke ila supak loope ingko-ingkona agomem ngo Israel legape lang Judah legape delokke abíd-abíd opín-buang teyolo, nome agom-aang polen bosula ido delokke ila ngo potodí, deke agom takamem no tídbumnam kitab kolo atkum langka.

³Judah ami kídí teyolo ngokke adír ilík penam kídíem, ami kídíe tatyin sula mipil-miyoope bulu aapí míílat sulangkula, buluke atímape yénam lok gílat sulangkula iduamílo, ngo buluke paab kídíemla atímangem mesam biyékuai.”

⁴Depeila Jeremiah bí Neriah ke oo Barukhme tomla, RUUTUM ke agomem bí pobila, dekedem Barukh bí títbumnam kitabkolo atkumto.

⁵Delo Jeremiah bí Barukhme poto, “Ngom lutumdung. Ngo RUUTUM ke Kumkeng Ekumlo gílayimang.

⁶Dekepeila no nyodí longe konem RUUTUM ke Kumkeng Ekumlo gíla, ngokke nom políkla nokke atkumnam RUUTUM ke agom kídíeme ami kídí takam tatkolo pori bilangka. Akonrupe Judah lokke doolung kídíke ami tatkolo rikan bilangka.

⁷Dekepe imílo, bulu tallangkula mipile atímana bedalok gíyimape, aapí míílat sulangkula RUUTUM kíng rogu kunamko kalangkukom iyékupe. Kapeila buluke teyolo RUUTUMke marla lunam kídísi botte aloodung.”

⁸Kaaluna Jeremiah ke pokampe Neriah ke oo Barukhbí ato-siro takam sim ito. Tídbumnam kitab delok bí ami kídí tatkolo Kumkeng Ekum delo pori bito.

⁹Judah ke roja Josiah ke oo Jehoiakim ke rojape dítak pilngo kolang poolo konangko iro delo Jirusalem lo duuna takam keralo lang Judah doolung lok aana tabung keralo doma-tíímape nyodí longeko ukum lento.

¹⁰Delo longe delo Kumkeng Ekum delokke Aní Eyab angko teyo danke, Shapanke oo Gemariah, banggoem atgebonape inake pírtek delok, ami takamke tatkolo Barukh bí Jeremiah ke agomem atlíknam tídbumnam kitab delok pori rikan bito.

¹¹Edílo tídbumnam kitab delok Shaphanke onam Gamariahke oo Mikaiahbí porinam dem tattodí,

¹²delo bí roja ekum delokke atgebonake agér iko pírtek delo aato. Bíkke aaduem atgebonape ina Elishama, Shemaiahke oo Delaiah, Akhborke oo Elnathan, Shaphan ke oo Gemariah, Hananiah ke oo Jedekiah, delokke abíd migom kídíe duuyindo.

¹³Barukhke tídbumnam kitab lok ami kídíem pori bonam tabungem, bíkke tatnamem migom kídí tabungem poyin birodem,

¹⁴bulu takam Kusike oo Shelamiah, Shelamiah ke oo Nethaniah, delokke Nethaniah ke oo Jehudime, Barukh kíng sim agom sim políkla lulígto: “Nokke ami kídíem pori binam tídbumnam kitab dem bomla aalangka.” Delo Neriahke oo Barukh bí tídbumnam kitab dem bomla buluke keralo aato.

¹⁵Delo bulu bíme, “So duula ngolum pori bika,” emla poto.

¹⁶Delo Barukh bí bulum poribito. Edílo bulu agom kídí tabungdem tattodí, bulu pesolok kaamín sula Barukhme poto, “Ngolu sim agom kídí sim rojalo popangpe aiyé.”

¹⁷Delo bulu, “Kape kísa no sim takam sim atla tone? Jeremiah bí nome pobitonía?” emla ííto.

¹⁸Delo Barukh bí “Aroe, bí ngom takam sim pobila ngo dekedem siyaying lok tídbumnam kitab so atto,” emla bulum pobito.

¹⁹Delo migom kídarde Barukhme, “Jeremiah nonyi menape gínyokla rusi sulangka. Sékote nonyike dungkuem kénpe aimang,” emla poto.

²⁰Banggoem atgebona Elishamake pírtek delo tídbumnam kitab dem migom kídíde mepala roja lokke kebang ipom delo aala rojadem takam legangem popa bito.

²¹Dem talla rojade Jehudime tídbumnam kitab dem laadope tomlíkto. Jehudi bí gíla banggoem atgebona Elishamake pírtek delok tídbumnam kitab dem laala, boma langkula roja kerang lolang bím daggo bomna mite-migom kídí keradelo rikan bito.

²²Dekepe idode dígínpe ila rojade bíkke dígín ekum aradelo eme partula delo duuduai, delokke de dítak lokke poolo konang page.

²³Edí-edílodí Jehudi bí kitab delokke abor angum mamílo appiko pori tone, delo rojade yoksik kolok rinam dem gatpakla emelo romto. Dekepe ila tídbumnam kitab dem apíírupe emelo romyinto.

²⁴Idola dekedem talla roja delang migom-mite kídíde pesola demangkom ankíla inam atí ségu-siyang kamato.

²⁵Elnathan, Delaiah, delokke Gemariah bulu tídbumnam kitab dem dekepe gatla emelo romlík madope rojadem rogulate, rojade buluke agomem atí tatbimato.

²⁶Delok ayanpe rojade bíkke oo kon Jerahmeel me, lekope Ajrielke oo Seraiah delokke Abdeelke oo Shelemiah kelo melíkla kakot atna Barukh melang kaaluna Jeremiah me umdope ukumlíkto. Idola RUUTUM bí bínyime rumnyokto.

²⁷Jeremiah ke políkla Barukh ke atla inam títbumnam kitab dem roja lokke emelo romrodem RUUTUM bí lekoda políktoku:

²⁸“Títbumnam kitab konko laalangkula Judah lokke roja Jehoiakim ke rompak tonam ngokke nome agom políknam takamem, kerang títbumnam delo atnam kídí tabungem lekoda atlangkuka.

²⁹Delok teyolo Judah lokke roja Jehoiakim me sim lupa langka, ‘RUUTUM bí sipe podung: No títbumnam kitab dem romla sipe poto, “Babilon lokke roje aala among-asi sime líípakla tanidak tarodak nyokyinmoyé emla kape atkane?”

³⁰Dekepeila Judah lokke roja Jehoiakim ke teyolo, RUUTUM bí sipe ludung: Nokke amíllok lenna otíng-oyin aralok sékote Dabid ke roja palengdem duubomna kamayé. Nokke simang dem luyulo elpakla longeme doonyi pamkie, yueme aapame ibomdope imoyé.

³¹Ngo nokke ome-oo takamem itung-iréyé, delokke nokke migom-mite tabungemte itung-iréyé. Kapeila nolang bulu botterupe paab ito. Ngo buluke teyolo lang Jirusalem lokke ami kídí teyolo, delokke Judah among lokke ami kídí teyolo ngokke itung-iré penam agom lunam takamem atel kote opak momape iyin líkyé. Kapeila bulu ngokke agomem tatmang.’ ”

³²Dekepeila Jeremiah bí títbumnam kitabko laalangkula Neriahke oo Barukhme bila, Jeremiah bí polík langkula, Judah ke roja Jehoiakim ke romtonam kerangke títbumnam kitab delo attuanam RUUTUMke agom takamem, Barukh bí atyin líktoku. Delok teyolote akamna agom ekekom ayorungko attem líktoku.