Read Alladian JEREMIAH 37 Bible Online

JEREMIAH 37 - Alladian bible

JEREMIAH 37

¹Babilon lokke roja Nebukadnejjar bí, Josiah ke oo Jedekiah me Judah lokke rojape imoto. Bí Jehoiakimke oo Jehoiashin ke ayanpe rojape ito.

²Idola, bíla bík migom kídíe, delokke bíkke ami kídíe sékote Jeremiah kíng políknam RUUTUM ke agomem arope tatbina kamato.

³Dekepe ituakom, Shelemiah ke oo Jehukal melang Maaseiah ke miripe ina oo Jephaniah me, “Ngoluke legape, RUUTUM ngoluke Shédí kíng kumbilangka,” emla roja Jedekiah bí lulígla Jeremiah kíng roguto.

⁴Dekepe ido delo Jeremiah bí asarpe ami kídílo madu-matok sulato; kapeila delo bím pateklo ummangada.

⁵Depeido delo Ijipt amo lokke Pharaoh rojake maglínge mimakpe gílenla, Jirusalemem mimakpe iangbomna Babilon lokke maglíng kídíde deme tatla, Jirusalem lok bulu mimak ipoomape gípootoku.

⁶Delo kaaluna Jeremiah kíng RUUTUM ke agome pííto:

⁷“RUUTUM Israelke Shédí bí sipe podung: Ngome kumdope roguna Judah ke rojeme sipe polangka, ‘Nome igulpe lenna Pharaoh rojake maglíngde agíke Ijipt among supe enlat suyéku.

⁸Delo Babilonke maglínge píílat sulangkula doolung sim mimakpe iyala, ikumla emepe rompakyé.

⁹RUUTUM ngo sipe podung, “Babilon kídíe ngolum mepala gíyéku,” emla no mííla agíem yatsumapeka. Bulu depe imayé.

¹⁰Nome mimak iyabomna Babilon maglíngdem no ikumnamko kadagakom, buluke notkolo tarí gena petome kadagakom, bulu gerep bomlangkula sim doolung sim emepe rípakyé.’ ”

¹¹Ijipt lokke maglíng aanam legape Babilon lokke maglíngde Jirusalemem mepala gíbong kaku.

¹²Delo agí erang ara sulokke agíke ekurang aduem paasudope, Jeremiah bí Benjamin amope enlento.

¹³Idola edílo bí Benjamin Eyab delo píídodí delo Hananiahke onam Shelemiah ke oo roja ekum sipaying lokke migompe ina Irijah bí, “No Babilon ami kídílo sangadung!” emla Jeremiah me umto.

¹⁴Delo Jeremiah bí, “Ma dekepe ima namoko, ngo Babilon amilo sanga mínmang,” emla poyansuto. Idola Irijah bí Jeremiahke agomem atí tatbimato. Delok ayanpe bí Jeremiah me umla migom kídílo aaboto.

¹⁵Bulu Jeremiah ke teyolo aklíla, banggo atgebona Jonathan ke ekum dem buluke patek ekumpe ipongko delo, bíme umla patek aralo tumto, delokke Jeremiah me demla mola ito.

¹⁶Jeremiah me among aralo pírtek ila iko kolo umlíkla deddína longeko pateklo tumto.

¹⁷Deddína longeko irodem roja Jedekiah bí Jeremiah me roja ekumlo aabo mopala bíme, “RUUTUM keelok agom atíko kaman?” emla íísito. Delo Jeremiah bí “Kadung. Babilon rojake alag aralo nome melígyé,” emla poyansuto.

¹⁸Delo Jedekiah rojame Jeremiah bí, “Nok teyolo ngo ingkona atímana koda itone? Nokke migom kídí teyolo demangkom ami kídíke teyolo ngome patek umbom penam agér kua ngo itone?

¹⁹Sim among simla nome, Babilon roje mimakpe iyabommayé, emla luna kaaluna miri kídíe koloda?

²⁰Idola supak ngok ruutum rojano agom sim tatbi langka. Nok keralo ngo sim rogudung: Ngome banggo atgebona Jonathan ke ekumlo melík kumapeka, deemamílo ngo elo siyé.”

²¹Delo Jedekiah roja bí, roja ekum kaabomna sipaying kídíke kebang ekum aradelo Jeremiah me duumo dope, delokke doolung delo burna ettínge kaduloope, loodípe burna ettíngko, dekena mopomlok Jeremiah me bitídope ukumlíkto. Dekepeila Jeremiah bí sipaying kídíke kebang ekum delo duuto.