Read Alladian JEREMIAH 39 Bible Online

JEREMIAH 39 - Alladian bible

JEREMIAH 39

¹Jedekiah ke Judah lokke rojape dítak konang kolang poolo íyingko iduem, Babilon lokke roja Nebukadnejjar bí, bíkke maglíng tabungem aabola Jirusalemem mimak iyato.

²Delo Jedekiah ke rojape dítak íying kolang dítak atelko ido delokke poolo appi lokke longe konang delo, Jirusalemke líísak etorem bénla doolung delo aato.

³Dekepe Jirusalemem umrongem, Babilon lokke maglíng ruutum kídíde aala Raadang Eyab delo bulu palenglo dungaato. Buluk aradelo Nergal Sharejer, Samgar lokke Nebo Sarakim, delokke Nergal Sharejer emnam migom konkone, delokke abíd-abíd maglíng ruutum kídíe kato.

⁴Jedekiah roja lang abíd migom kídí delang Judah lokke sipaying kídíde, edílo Babilon maglíng ruutum kídídem kaatodí, delo bulu dugnyokto. Bulu yoh delo roja lokke bagan danlo duuna etor annyi pénsamke eyab delok gínyok lenla Arabahpe dugnyok geto.

⁵Idola Babilon maglíngde bulum monmín gela Jeriko yiibe delo pííputo. Bulu Jedekiah me umla Nebukadnejjar kelo gíboto. Dekepe ido delo Nebukadnejjar bí Hamath amo lokke Riblah emnam doolung kolo notko ila duuto. Delo Babilon roja Nebukadnejjar bí Jedekiah ke teyolo kebang lula,

⁶Riblah doolung delo Jedekiah ke agí amig kangko paklo, bíkke oo kídí emlang Judah lokke migom mite kídíem moka kayinto.

⁷Depe irongem Nebukadnejjar bí Jedekiah ke amig annyiem roobínla, arem íkolilok yééla Babilonpe bíme enbotoku.

⁸Babilon maglíngde, roja ekum kídí emlang doolung delokke ekum kídíem emepe romla, líísak etor, Jirusalem em gargoona kídídeme dempen-demremla iyinto.

⁹Depe irongem maglíng ruutum Nebujaradan bí Jirusalemlo dungkína ami kídí emlang, bíkkíng aalíksuna kídíem, delokke abíd-abíd ami molok kídíemte itaksula Babilonpe umnyok bomyintoku.

¹⁰Idola maglíng ruutum Nebujaradan bí atí kamana, yagorupe opanna ami kídíem Judah amolo duumola, bulum arík idope among emlang bagan ríkséng idope melíkto.

¹¹Maglíng ruutum Nebujaradanme Babilon lokke roja Nebukadnejjar bí Jeremiah ke legape sikepe ukumlíkto.

¹²“Bím laalen langkula aipe kaalangka. Bík teyolo atímana atí imapeka, delokke bí ingkoko koyédí, demangkom ingko agomko manyédí dem tatbila ibilangka.”

¹³Depeila maglíng ruutum Nebujaradan, migom bottena Nebushajban delokke migom ruutum akon Nergal Sharejer, delokke abíd maglíng ruutumkídíde,

¹⁴ami melíkla, sipaying kebang ekum delok Jeremiahme laalenla bíme Shaphan ke oten, Ahikam ke oo Gedaliah kíng bilíkto. Gedaliah bí ai-kampope agí ekumlo Jeremiah me melík langkula, bí agí ami aralo aipe duusutoku.

¹⁵Roja ekumem kaabomna sipaying kídíke kebang ekum delo Jeremiah ke duudungem bíkkíng RUUTUM ke agome pííto:

¹⁶“Gíla Kush ami Ebed-Melek me sipe polangka: Ralyayalumna RUUTUM Israel ke Shédíbí sipe podung, ‘Jirusalem doolung teyoso ingkona tong-aryang agomem ngo ilíkyé,’ emla lubi sutodí, deme jépe-rempenam ayanpe ngok agomem ipíí líkdak. Depe ilíkdí longe delo nok agí amige kaasuyé.

¹⁷Idola delo longe delo RUUTUM ngo nome mopítyé. Nokke peso bomnam ami kídílo nome melíkmayé.

¹⁸Nom ngo ipítyé. No mimaklo simayé, idola no dugpísuyé, kapeila no ngome míngkesuto. Sikepe RUUTUM ngo polendung.”