Read Alladian JEREMIAH 4 Bible Online

JEREMIAH 4 - Alladian bible

JEREMIAH 4

¹RUUTUM bí sikepe podung, “E Israel, nolu aalatsukupe míídumílo, ngokkíng aalat sulangkuka. Nolu ngom míngkesula ngokke belumnam mimang kídíem laapakkumílo,

²delo ngokke amínloge nolu pésubaayé. Delo opín daadi takame ngome bulume utepooro rulíkbidope roguyé, delokke bulu takame ngome yidgeyé.”

³Judah kelang Jirusalemke ami kídíem RUUTUM bí podung, “Noluke aal gurang mangko amolo gurlangka; tang kako amolo noluke amí kídíem lelíkmapeka.

⁴E Judah kelang Jirusalemke ami kídía, noluke aapí-aangem pídé sulangka, noluke daapong ayonem ngokkíng, noluke RUUTUM kíng aipe bomgap bosulangka. Nolu dekepe imamílo, ngok marname eme kísape ila nolum guyin aabomyé. Legade noluke atímana agér igape, edílo emede gulen yédí, sékote dem eme dem imit layimayé.”

⁵“Among lokke rego mipílo bikul mutgoola Judah lolang Jirusalemlo, menape elíng yapgo etor kako doolung kídílo dunyok anggela dumsudope gogying goolangka.

⁶Jayonlo gídope iyodem ilíklangka, adolmape menape dugpí sugelangka, kapeila RUUTUM ngo línggídan teloge, atírumape nyokmo penemlang reyubrunam adírem bomayé.

⁷Myomur simyoe agí duupomlok lenbomnam kísa, opín-buangem nyokmone tokdak. Judah amongem mokakape bí tokdak, Judah lokke doolung kídíe rongngam alooyé, kapeila sékote dekedelo turla duuna kamayé.

⁸“Judah teyolok RUUTUM ke yagorupe marname gíkumang iname, yagorupe kapla-rííla, ankí gasorem pogelangka.”

⁹RUUTUM bí sipe podung, “Delo longe delo roja kídíe lang mite-migom kídíe aapíe améyé. Miri kídíe mamamsuyé. Kaaluna kídíe míngkén-míngomayé.”

¹⁰Delo ngo poto, “E maglíngke RUUTUM, among sokke ami kídíem lang Jirusalemem, ‘nolu aapí eetet kayé,’ empala ngoluke línggu-puru kídílo yoksaem leelík bomdula no yatngéto.”

¹¹Longe píídak, edílo yépol mooruklok pamrena asare ami kídí teyolo mudabomyédí. Deme ami kídíem lukan biyé. Idola de ampeem mutbínna remelna asarmayé.

¹²RUUTUM ke lulíglok mudana asarde, dem pemílo pakyana asarko. Kapeila, RUUTUM ngo agísuei ami kídíke teyolo ngokke kebangem baalíkdung.

¹³“Kaatola, mirue doomug kísape aabomdak. Bíkke guré-gaari kídíde meyat asar kísadung, delo guré kídíde pemíem pemílo menayadung. Ngolukíng yagorupe adíre angkai! Ngolu nyokkai!

¹⁴E Jirusalem, nokke aapí delokke atímangem arbínsula menape mopísutola. Edít longe koda no aapí atímangem geyén?

¹⁵Dan luune loklang adi among Ephraim loge nyokkupenam legangem gogyinako kadung.

¹⁶Judah amiem lang Jirusalemem sim pokan goolangka: Judahke doolung takamke mirupe mooteng amolokke, sipaying maglíngke mimak togog gognamem tatkai, delokke aabomdak.

¹⁷Arík-anamem kaabomnam kísa bulu Jirusalemem gargoobomyé, kapeila bíkke ami kídíe ngok mirolpe rollento, Sikepe RUUTUM bí podung.

¹⁸Judah nokke atírumape yékor-yéyore delokke atímana ségue, sikena takamem bomasuto. Sikena adír lerísi nokke paab kídíe, dekede nok aangem ukésudung.”

¹⁹“E ngo míídírdung, ngo míídír aloodung! Ngo kinampe kiyam gedung. Ngok aapísi yagorupe kigela pogdung. Ngo asoope ilayimang. Kapeila ngo bikul muddudem tatto, ngo mimak adudem tatto.

²⁰Adír teyolo adírkone aala among tabusi rukyinkai. Amig kemír atellok, ngok dungkenge, ngokke tombu ekume nyokkai.

²¹Edíd longekoda ngo mimak idud emla bikul muddudem tattíyén?”

²²RUUTUM bí sipe podung, “Ngok ami kídíe ngome kénsumang. Bulu bopol rungeke. Bulu akor-siyor atí kasumana koo aména kísaneke. Bulu ainem ikénmang, idola atímanem ijing aloodung.”

²³Ngo tani amongem kaatoname de atí moi-muang kayimanape ido. Talengem ngo kaato, de atí angun kaimang.

²⁴Ngo adi amongem, dííte kídíem kaato, dekede tapgosula taronpe tondo.

²⁵Ngo kanggo sutoname tani kaapayimang, delokke taleng telok pettang kídíete deenyokkai.

²⁶Ngo kaatoname moone amongete, yépol moorukpe iyinla, doolung takamem nyokyinnape kaato. Kapeila dekede RUUTUM ke agí margí kolok dekepe iyinkai.

²⁷RUUTUM bí sipe ludung, “Asi among takamsi, yépol moorukpe iyinyé, idola ngo apíírupe nyokyin momayé.”

²⁸Depeila tani amonge ankí kenoyé, talenge kaamoyé, kapeila ngo polentobong delokke agomem laalat sukumayé. Ngo míílen tobong delokke mííne-míngo yimayé.

²⁹Guré maglíng kelang, ityi-epug bomna kídíke adud kídílok, doolung tabunge runyokgeyé. Ayokone ruakko moonam aralo, ayokone dííte lííreng kídílo rugonggeyé. Doolung takame byakruknampe iyinla, ami atelkote duuna kaimayé.

³⁰E Jirusalem, no ingkokoda idune, no nyokkai. Kape no gasor kampona gedune, delokke lunggu gekane? Kape no amigem molsukane? Atí agér bipemana leemoem no ilíksudung! Kapeila nok mííbosuname, nom mepakla nom mokape emla tobomdung.

³¹Ngo otí ogo olenna, okii kina mime kapdud kísanako tatto. De Jirusalemke ngakén-ngayén yimanam ngadude. Bík alage lakyadola, kapla-rííla sipe ludung, “Ngo gérmadak! Ngo mokapena keralo akén-ayén yimape igedung.” Matala kangkítoka! No midum atel kokom, jonnampe yéla aroem matala, inako kaapayémílo, ngo doolung dem asampe maab biyé.