Read Alladian JEREMIAH 40 Bible Online

JEREMIAH 40 - Alladian bible

JEREMIAH 40

¹Ramah doolunglo, maglíng ruutum Nebujaradan ke Jeremiah me ilen rongkudem, RUUTUM ke agome Jeremiah kíng pííto. Judah among lokke ami kídí kelang Jirusalemke ami kídí aralo Jeremiah memte íkoli lok yééla Babilonpe umnyok bomdokupe umnam kídí aralo Nebujaradan bí kaapala, bí Jeremiah me ilentoku.

²Maglíngke ruutumde Jeremiah me kaarík surodem bí lupoto, “Sok among sokke tong-aryang penam legangem nokke RUUTUM bí kerapekai luto sutung.

³Supak RUUTUM bí agí lusunam agompe sike takam sim ito. Noluke ami kídíe RUUTUM ke keralo paab ila, bík agomem tatmala sikena tong-aryang adíre angkai.

⁴Idola silo nome, nokke alag delok íkoli yéngkolok, ngo nom mopítdung. No míído mílo Babilon elo ngokkíng enmín getokula, nom ngo aipe kaasiyé. Idola no mííma mílo no entímín kunam kamang. Kaatola among tabusi nok legape ayaa bidung. Nokke mííbang kolo no gítoka.”

⁵Deme porodem Jeremiah ke poyan supe emla idodem Nebujaradan potem toku, “Shaphan ke oten, Ahikam ke oo Gedaliah kíng gíla duumín gelangka. Bíme Judah kídíke doolung takamem kaabomdope Babilon ke roje Gobonorpe parlíktung. No bíkkíng duumín gelado demangkom nokke agí mííbasupe, nokke gípe kolo gísukala.” Depe emrongem maglíng ruutum de donam-tíínamem irubila aman emte bila Jeremiah me gímoto.

⁶Depeila Ahikam ke oo Gedaliah kíng Jeremiah gíla Mijpah doolulo bíkkíng lang ummape melíknam Jihudi ami kídí pénsamlo, Jeremiah bí duumín geto.

⁷Judah among lokke ayokon sipaying kídíe lang migom kídíe Babilon maglíngem umko sumape yényok geto. Babilon lokke roje Judah among legape Gedaliah me Gobonorpe parlíkto emnamem bulu tatto. Delok teyolote Judah among lokke mitu-soré, mimang-opanna, mime-milo delokke mimík miro ami takamem Babilonpe umla bomkumato. Deke takam dem kaasi-tatsi bidopete Gedaliah me parlíktung emlate bulu tatto.

⁸Depe tatla, Nethaniah ke oo Ishmael, Kareahke oo Johanan, Tanhumeth ke oo Seraiah, Netophathlo duuna Ephai ke oo kídíe, Maakah lokke Jejaniah lang buluke ami kídíe. Dekede Mijpah delo Gedaliah kíng píídum suto.

⁹Delo Shaphan ke oten Ahikam ke oo Gedaliah bulume torík sula, pésumola bulum lang buluke ami kídídem aapí-aang edíídope agom lubo suto: “Babilon kídí rumkílo duunam dem peso mapeka. Amoso ai-kampope dunga langkula Babilonke rojem agér ibilangka. Depe imílo nolu aiyé.

¹⁰Ngolu keelo Babilon lokke migom-mite aayém, ngo agíe nolu takamke legape Mijpah so duula bulum kaarík lupoem irík subiyé. Idola noludan noluke doolung dungang kukolo, arík ila, bagan ila, onggur alangem ikumla, siipí-siiyé, olib tél daadi takamem irusula ila aipe duulangka,” emla bulum takam poyilto.

¹¹Edílo Moab, Ammon, Edom, delokke abíd amolo duuna Jihudi ami kídíe mitu-mingong mipek amieme Judahlo mela, delokke Shaphanke oten, Ahikamke oo Gedaliah me buluke teyolo Gobonorpe parlíktung emla tattodí,

¹²bulu takam, buluke dunyok gongko among kídí delok píídumsuyin langkula, Mijpah doolung delo Gedaliah me kaarík suyin aato. Delo bulu duulangkula ali-ayé, asi-apongem jénamrupe ikum langkula ito.

¹³Sikepe irongem, Babilon maglínglo umko sumana Johanan lang abíd sipaying kídíke ruutum kídíde Mijpahlo aala Gedaliahme kaarík suto.

¹⁴Bulu aala bím luto, “Ammon lokke roja Balis bí, nome mokadope Ishmaelme melíktung, deme no kénsumanía?” Idola buluke agom dem Ahikam ke oo Gedaliah bí arope tatbimato.

¹⁵Delo Kareah ke oo Johanan bí ami tatmang kolo Gedaliah me, “Nethaniah ke oo Ishmaelme ngo gíla sékote kénmadope mokayé. Bím kapekísa nome moka moyén? Depe imílo yényok gopala nokkíng dumsukuna Jihudi amie lekoda yépan-yéran suyin yéku. Depe imílo Judah so yékína Jihudi ami takamlo mayangko ebíne bínyé dada, delokke mitu-mingong kídí si nyokyinyé,” emla poto.

¹⁶Idola Ahikam ke oo Gedaliah bí, “Dekepe atí imapeka. Ishmael ke teyolo nokke agom mannam si aromang,” emla lupakto.