Read Alladian JEREMIAH 41 Bible Online

JEREMIAH 41 - Alladian bible

JEREMIAH 41

¹Delo dítak delokke poolo kíníd nanalo, Elishama ke oten, Nethaniah ke oo, roja adong lok olennam delokke keralo roja lokke migom bottena kope ina Ishmael bí, midum íyingko gíbola Gobonor Gedaliah me kaarík supe Mijpahlo aato. Buluke lekope apim dobo sudungem,

²Ishmael lang bíkke gíbonam midum íyingde yokseme pusatsula Gedaliah me pakato.

³Delok teyo delo Mijpahlo Gedaliah kíng duumín gena Israel ami kídí takamemte pakato.

⁴Gedaliah me mokanam legangem tatmang adape longe kon delo,

⁵Shekem, Shiloh, delo Samari lok midum íying píínyiko Mijpahlo pííto. Bulu nammídem ngísula, ege galugem bétsula, amíl amoem tarí iket sula, ali-ayé amanem bomla Kumkeng Ekumlo arí namponem nyotlík kape emla aatuai.

⁶Bulume kaarík supe emla Nethaniah ke oo Ishmael bí Mijpah lo kapla ento. Bíkke bulume kaarík suduem, “Ahikam ke oo Gedaliah me nolu kaatolangka,” emla luposuto.

⁷Buluke doolung aradelo píírongem, Ishmael lang bík ami kídíde bulum mokala asi déérungkolo buluke simangem yopyin líkto.

⁸Idola buluke ara delok midum íyingkone Ishmael me roguto, “Ngolum moka mapeka; ngolukíng gehue, ayage, olib téle, delokke ngullange kadung. Dekedem ngolu arík kolo rumnyoktung.” Depe emkolok bí bulum mokamape turmoto.

⁹Ishmael ami simang kídí demlang Gedaliah ke simang dem asi déérung kolo yopyin líkto. Depe bíkke simang yoplíkko asi déérungde roja Asa ke koonam kuai. Asa bí Israel roja Baasha ke mimak ibomduem miru keralok iyasunape deme kootuai. Deme Nethaniah ke oo Ishmael bí simangpe gebíng líkto.

¹⁰Depe irodem Mijpah doolunglo abíd duuna roja ome kídí demlang abíd-abíd ami kídar dem Ishmael bí abílpe umyinto. Bulume kaabom dope sipaying maglíng ruutumpe ina Nebujaradan bí Gedaliah me kaabom dope parlíktuai. Ishmael bí bulum takam umla Ammon amope enbotoku.

¹¹Dekena aimana legangem, Johanan lang bíkke sipaying ruutum kídíde Ishmaelke inam tabungem tatto.

¹²Dekepeila dem tatla, bulu maglíngem gíbola, monbomla, Ishmael me pamín supe ento. Bulu Gibeon lokke bottena paatang anínlo Ishmael me píítoku.

¹³Edílo Ishmael ke umnam ami takamde Johanan melang bíkke sipaying kídídem kaatodí, bulu airupe ashéto;

¹⁴depe ashéla bulukíng dugaato.

¹⁵Idola Nethaniah ke oo Ishmael lang bíkke amilok midum píínyiko Johanan kelok dukpí sugela Ammon amolo dugnyok anggeto.

¹⁶Depe irodem Ishmael bí Gedaliahme mokarongem Mijpahlo duuna ami kídar, mime, milo, ome-oo, sipaying kídí, delokke kebang agérem igena kídí tabungem abílpe umyinla gíbo kunam ami takam, delokke ruutum yébokunape Johanan lang bíkke sipaying ruutum kídíde ito.

¹⁷Amo lokke Gobonorpe Babilon rojake parlíknam Gedaliah me mokanam legape bulu peso alooto.

¹⁸Depeila bulu Babilon amilok dugnyok gela Ijipt amope ennyokto. Buluke depe gínyokduem bulu Geruth Khimham emko Bethlehem anínlo dooto.