Read Alladian JEREMIAH 42 Bible Online

JEREMIAH 42 - Alladian bible

JEREMIAH 42

¹Delo Kareahke oo Johanan lang Hoshaiah ke oo Ajariah, delokke sipaying ruutum kídí delang mimé-horélok ila abu-abíng loope mimík-mirope Jeremiah kíng aala

²roguto, “Ngoluk rogunam sim no tatbila, RUUTUM ngoluke Shédí kíng mitu-mingong ngoluke legape kumbi langka. No agísue kaasudung, ngolu milu-mibamtuai, idola supak boséngooko turla yédung.

³Ngolu ingkolo gímíloi, delokke kape imíloi deme míngkén sumang, iname ngoluke bedangem pobidope RUUTUM me no kumbi langka.”

⁴Dem tatla, Jeremiah bulume poyansuto, “Noluke agom kídíeme ngo tatdung. Noluke rogunampe ngo RUUTUM ngoluke Shédí kíng kumbiyé. RUUTUMke ponam tabungem agom atel kote noluke keralok rumnyok mape nolum pokanbiyé.”

⁵Delo bulu, “Ngoluke legape RUUTUM ngoluke Shédíke nokkíng agom lulígnamem ngolu igemayémílo RUUTUM bí ngoluke teyolo aroloklang jonnam lok hakii bila kebang ibom daklangkuka.

⁶Nome ngoluke legape kumbidope emla rogulíknam RUUTUM ngoluke Shédíke agom-aangde ngoluke tatbaadope emyékom, demangkom tadbaamape iyékom no kumbi langka. Kapeila RUUTUM ngoluke Shédíke agomem ngolu tayyé mílo de ngoluke ainampe iyéku,” emla Jeremiah me poto.

⁷Looyingko doorongem RUUTUM ke agome Jeremiah kíng pííto.

⁸Depeila bí Kareahke oo Johanan melang sipaying ruutum kídíem, delokke omík-orope ami takamem bí gogdum suyinto.

⁹Depe buluke píídum surodem bí bulum poto, “Noluke ngome kumbidope rogu líknamem ngoluke RUUTUM, Israel ke Shédíbí sipe podung:

¹⁰‘Nolu agí amoso duusuyémílo, ngo nolum mitu-hoyungpe imomape parmoyéku. Ngo nolum edíípe díílíkyé, delokke bubín mayé. Kapeila ngokke noluke teyolo itung-irélíkla inamem kaasu langkula ngo ankídung.

¹¹Noluke supakke peso bomnam Babilonke rojeme nolu arope peso-ríanla igemapeka. Ngo podung, bím nolu pesomapeka. Kapeila ngo nolukíng yémín gedung, bíkke alaglok ngo nolum mopítyé.

¹²Ngo ayana Shédí komin, iname noluke teyolo bím ngo ayamola noluke amoso aapí eetetpe nolum duumoyéku.’

¹³“Sikepe iko teyolote nolu, RUUTUM noluke Shédíke agomem tatmape, ‘So amongso ngolu duumayé,’ emla delokke

¹⁴‘Ngolu midu-mimak adud-ayud tatmangko, delokke keno-tíílíng kamangko Ijipt amope tokyé,’ emmílo,

¹⁵mitu-mingong Judah ami kídí nolu, RUUTUM ngokke agomem tattoka: Sikepe Ralyayalumna RUUTUM Israelke Shédíbí podung, nolu Ijipt belo tokla duuperung emla mííyémílo,

¹⁶noluke peso bomnam mimage nolum pííbomyé, delokke tíílíng-kenoem noluke ansubomnamde delo nolum aabomyé, delokke beloi nolu silíkyé.

¹⁷Arorupe séko buludí Ijiptlo gíla belo duulík yéne, dekedem midu-mimage, dírí-kenoe, delokke kilii-ramlie iyabomla, ngokke ruulíknam ato kídíde ami atel kote meturmape, demangkom dukpísulang gemadope nyokyinmoyé.

¹⁸Ralya yalumna RUUTUM, Israelke Shédíbí sipe podung: Jirusalemlo duuna kídílo kapekísa ngokke aklíng emlang marnamem purlíktodí, deke kísa ngokke marnamem, noluke Ijipt belo gíyém noluke teyolo ngo purlíkyé. Nolu sim amo sim edílote kaapayimayé, delokke nolu ami takamke peso-rían ikepe, delokke amike lupu-lulé lukepe iyé.”

¹⁹Delo Jeremiah bí potem mínla poto, “E Judahlo duuna mitu-mingong kídía, Ijiptpe gímapeka emla RUUTUM bí nolum poto. Nolu sim arope míílangka, ngo silo nolum lutumdung.

²⁰Nolu ngome, RUUTUM ngoluke Shédíkíng kumdope lulígla, bíkke ponamem atel kote mepakmape igeyé emla roguto. De noluke legape imem botterunakope idung.

²¹Nolum ngo silo takamem popa bito, idola bíkke ngome, nolum popadope pobinamem nolu supakte tatmang.

²²Dekepeila sim arope míílangka: Nolu gíla duulík dope emla míngko delo midu-mimak loklang dírí-keno, delokke kilii-ramlilok nolu takame siyinyé.”