Read Alladian JEREMIAH 43 Bible Online

JEREMIAH 43 - Alladian bible

JEREMIAH 43

¹Ami kídí teyodelo RUUTUM bí bíkke agomem Jeremiah kíng políkla; Jeremiah bí RUUTUM ke agomem pobirodem,

²Hoshaiah ke oo Ajariah lang Kareahke oo Johanan lang abíd ami miké kídíde Jeremiah me, “ ‘Nolu Ijipt amolo gíla duunyok mapeka,’ emla RUUTUM ngoluke Shédí bí nome lulígmang. No medung,” emla luto.

³Delok teyodelo bulu Jeremiahme, “Ngolume Babilon ami alaglo kolígla, bulu ngolum mokala demangkom abílpe Babilon elo umnyok dokupe ngolum imope emla Neriahke oo Barukh min nome rungkup líkdune,” emla potoku.

⁴Dekepeila Kareah ke oo Johanan lang sipaying ruutum kídí delang ami takamde, RUUTUM ke Judah amo delo duulangka, emla lulígnamdem tatmape ipéé terísukai.

⁵Delok ayanpe bulu Jihudi kídíke mitu-mingong kídídemte gíbola Ijipt amope gíboto. Bulukíng lekope angukon moolelok píídum sulangkula, Judah amolo dungkupe emla ikuna kídíemte bulu gítak suboto.

⁶Sikesok teyolote Babilonke maglíng ruutum Nebujaradan ke Gedaliahme gobonorpe parlíkpala, bíkke kaabom aralo duumonam roja lokke ami kídí, delokke abíd mime-milo, ome-oo kídí takam demlang Barukhme, delokke Jeremiah mete enboto.

⁷Bulu RUUTUMke agomem tatmape Ijipt amolo pííla, Tahpanhes emnam doolulo duungato.

⁸Tahpanhes delo RUUTUM bí Jeremiah me lulígto:

⁹“No Jihudi kídíke kaadungem bottegamna líídung ayoko laala, dekedem líísak lok pínam bedang gípomke rumkíng kédénglo Tahpanhes lokke Pharaoh rojake ekum angko bedang delo yulangka.

¹⁰Deme yupala, Ralyayalumna RUUTUM, Israelke Shédíbí podung emla sikepe polangka: So amoso ngokke agérem ibina, Babilonke roja Nebukadnejjarme melíkyé. Bí ashéla so elíng kumko teyongso bíkke roja palengem melíkla duuyé, delokke moolop teyoso bíkke tombuem hoyé.

¹¹Bí aala Ijiptem mimak iyabomla sipenem simoyé, abílpe umpenamem umyé, yoksalok pakapenamem pakayé.

¹²Bí Ijipt lokke uyu kídíke kumkeng ekum kídíem emepe rípakyé. Depe rípak geyéla uyu mimang kídíem patek sobom yéku. Kapekísa mér kaabomne egem poge dudí, deke kísape Nebukadnejjar bí tarí-tapa kamape Ijipt em bík amíllo pogela enyéku.

¹³Nebukadnejjarbí Ijipt lokke doonyiem kumko ekumdem, deke delokke gaang kídíem bénpak pakyin bila nyokmoyé.”