Read Alladian JEREMIAH 44 Bible Online

JEREMIAH 44 - Alladian bible

JEREMIAH 44

¹Ijipt amolokke, Migdol, Tahpanhes, Memphis delokke Pathros doolung kídílo duuna Israel ami kídí teyolo, RUUTUM ke agome Jeremiah kíng pííto:

²“Ralyayalumna RUUTUM, Israelke Shédíbí sipe podung, ‘Judah lolang Jirusalemlo tong-aryangem ngokke langaanamem nolu takam kaato. Buluke atímana agér ikolok silo dekede kumruk-moorukpe ila dungkai.

³Nolu lang, noluke buku kídíe, delokke bulu sute kénkímanam uyu kídíem bulu kumsula, arí namponem nyotlíkla ngome yagorupe marmoto.

⁴Ngo buluke keralo, “Sikena belumnam agérem imapeka. Sikeme ngo kangkidung,” emla ngom agér ibina kaaluna miri kídíem moodí-moodílo melíkla lutímoto.

⁵Idola bulu tatmato, delokke arope míngkína kamato. Bulu, atímana bedalok aapí míílat sukumape, uyu kídíem kumtí sula yétíto.

⁶Depeila ngokke marnamem yagorupe purlenla, de emepe ila Judah doolung kídí lolang Jirusalem teyolo gula, dekedem siloke noluke kaapanampe kumrukpe iyin moto.’

⁷“Depeila Israelke Shédí, Ralya yalumna RUUTUM ngo sipe podung: Kape nolu Judah amolo mitu-mingong kope duumape sikeso mime, milo, ome-oo, delokke mitu-horépe duula, noluke agí teyolo tong-aryangem boma sukane?

⁸Noluke dungangko Ijipt amoso uyu kídílo nampona arí nyotla, ngom kape marmokan? Dekepeila nolu agísue sisula tani among keralo amike lupu-lulé lukepe ila, amike pébo suyémte, noluk amínem mínkela pékengpe nolu iyé.

⁹Nolu Judah lokke roja, delo buluke rani kídí lokke lang noluke buku kídíke, nolu agísuke, delokke noluke ome-oo kídíke, noluke mime kídíke Judah amo lolang Jirusalemlo atírumanam agér inam kídí takamem nolu kénsumanía?

¹⁰Silo loope bulula nolu aapí-aange remyak langkula míímap sulangkula, ngome peso-rían dola míngke sulangkula, ngokke ayon mebinamem, idong ikan namem, noluke buku kídílo luyilnam kídí takamem igela imang.

¹¹Dekepeila Israelke Shédí, Ralya yalumna RUUTUM ngo nolum ludung: Ngo Judah amongem apíípe nyokmola, noluk teyolo tong-aryangem langaape berok lenkai.

¹²Ijipt so duuperung emla míína mitu-mingong tokna kídíem ngo laapakyé. Bulu omík-orope Ijipt amoso, midu-mimaklok, dírí-kenolok nyokyinyé. Bulu repe-sinying keralo lupu-lulé lukepe, pémín pékolo pékeepe, peso-ríanla amín poda sukepe iyé.

¹³Jirusalem em itung-irénam kísape Ijipt amoso duuna takam nolum midu-mimak lok, dírí-kenolok, delokke kilii-ramli lok ngo itung-iré lenyé.

¹⁴Judah lokke mitu-mingonge Ijipt so gínyokne, sékokom turla yémayé, Judah amope gílat sulang kumayé; bulu yagorupe aang otuakom mibo minnompe yéna miko minyike kékonlo sékote Judah amope gílat sulang kumayé.”

¹⁵Delo agí mime kídíe uyu ipakdung emla kénna milokong kídí delang delo dagna mime kídíde, delokke Pathros lolang abíd Ijipt amolo duuna lokke delo gídum suna milungde, Jeremiahme poto,

¹⁶“Ngolu RUUTUM ke amínlok nokke supakke ngolum ponam agomdem tatmayé.

¹⁷Ngolu iperung emla ngoluke míísunamdem iyérung. Ngolu Teyong amongke Rani uyu mime dem arí nampona romlíkla, ipak ila, bíkke mimang keralo asi-apong ilíkbila iyérung. Judah doolung kídí lolang Jirusalemlo kape kísa ngoluke abu kídíe, delokke migom-mite kídíe itodí depe iyérung. Depe iduem ngolu doname kala, edíí-siríla ebín-ebon atí kamato.

¹⁸Idola edílo ngolu Teyong amongke Rani uyu mime dem kumsu-joosu yimape, arí nampona romlíkla, asi-apong ipak-hamo ilíkla iyimape itodí, delokke ila, ngolukelo midu-mimage kala, dírí-kenue kala, ngolu atí kayimape nyokyin lenkai.”

¹⁹Delo dagmín gena mime kídíete potem mínto, “Edílo ngolu Teyong amongke Rani uyu mime bíme asi-apong lok ipak ila, bíkke mimang kera delo nampona romlíkla, bíkke mimang kísape kék ettíng mola iyédí, dekedem ngoluke milo kídí takame aipe kaalík manía?”

²⁰Delo Jeremiah bí bíme luposuna milo mime dumsuna kídídem poyansuto,

²¹“Judah doolung kídí lolang Jirusalemlo nolulang noluke abu kídíe, noluke roja kídíe lang migom-mite kídíe, delokke rego mipí lokke ami kídíe uyu ipak ila arí nampona romlík namdem RUUTUM bí kénmang, delokke kénsuyimang emlangía míídune?

²²Noluke dekepe belumrunam, atírumanam agér inam kídídem, edílo bí kaala hakjém gelayimape ikadí, delo kapekisa noluke amonge amike pémín suyém pékepe ila, yébomna ami atí kaimape ila, siruk-mooruk amope silo melo ikadí, nolu dem kaasumanía?

²³Nolu uyu ipak ila, arí nampona nyotgoola, RUUTUM ke agomem tatmape, bíkke ayonem igemape, bíkke idongem ibommape, bíkke lulíg polígem agom tatbimape ikolok sikena atung-aréé, tong-aryange nolukíng píngkai.”

²⁴Delok teyodelo mime kídíem potak sula ami kídí tabungdem Jeremiah bí poto, “Ijipt amolo duuna Judah lokke ami kídí takama, RUUTUM ke agomem tatgaplangka.

²⁵Sikepe Ralyayalumna RUUTUM, Israelke Shédí bí podung: Nolulang noluke méng kídíe, ‘Ngolu Teyong amongke Rani uyume, asi-apong, ipak-simo ila, ngoluke togesunam agompe iyérung,’ emla noluke séguem lengkan sukai. Iname, noluke míínampe noluke togesula pésunamdem mesiisula ilangka.

²⁶Idola Ijipt amoso duuna Jihudi takam nolu, RUUTUM ngokke ponamem tatgaptola: Turyarna Shédí ngokke turdu tetedem, ngo ngokke botteruna deena amínlok sim pésula nolum ludung: Ijipt among sokke rego miyonglo duuna Jihudi ami kídíe ngok amínem mínla pésula, demangkom ngok amínlok amkísula idope, ngo imoyimayé.

²⁷Noluke ainam legape kaayimape, atímanam legape kaatí bomyéku. Ijipt lo duuna Jihudi ami takame midu-mimaklok, delokke dírí-kenolok siyinyé.

²⁸Mimaklo singoola Judah amolo píílat sukupenade boséngooyé. Delo Ijipt amoso duupe emla dugnyok tokna Judah ami mitu-mingong kídíde, ngok agomedí, demangkom buluke agomedí aro yayéne, deme kénsuyé.

²⁹“Ngokke noluke teyolo iperung emla togesunam agom si aroe emla kaanana, delokke itung-iréla nolume ikupenamem aroe emla kénnana iyodko nolum lengkanyé.

³⁰Judah lokke roja Jedekiahme mokape míína bíkke miru, Babilon lokke roja Nebukadnejjar ke alag aralo ngo kapekísa melíktodí, dekekísa pakpe Ijipt sokke Pharaoh roja Hophrame, bím mokape emla matana bíkke miru kídíke alag aralo ngo bíme melíkyé.”