Read Alladian JEREMIAH 47 Bible Online

JEREMIAH 47 - Alladian bible

JEREMIAH 47

¹Gaja doolungem Ijipt lokke mimak iyang mangadape RUUTUM bí Philistain legangem Jeremiah me popato:

²RUUTUM bí sipe luto: “Kaatola línggíng dan telok asie goosang dung. De aside puumupe tokyé. Dekede amo takamem, doolung takamem, ami takamem delokke abíd-abíd kídí takamem eebomyé. Igul dope ami kídíe ulo jérlenyé, delokke amoso duuna tabunge kaplen-ríílenyé.

³Bulu guré dugdudem, kelong lodud em, miru kídíke adud-ayud em tayyinyé. Dekedem tatla abu kídíe aalat sulangkula ome-uem bokumayé; buluke alag kídíe lakbyayé.

⁴Kapeila Philistain kídíem nyokyin modí longe píídak, delokke bulum igulpena, Tur delokke Sidonme isékyé. Siyéng asi robeng Krete lok aana, Philistain kídí takamem RUUTUM bí nyokyin moyé.

⁵Ankílok, kapla-rííla Gaja ami kídíe dumídem ngíbín suyinyé. Ashkelon ami kídíe adud dudyimayé. E yiibelok mitu-mingong kídía, edít longe koda ankíla yétíyén?

⁶Nolu, ‘RUUTUM ke yokse! Edít longe koda patí gooyén? Menape sobuklo aalat sutokula, pago yimape asoope itokula,’ emla kapla roguyé.

⁷Idola edílo RUUTUM bí lulígtodí, edílo Ashkelon mela siyéng robenglo, duuna kídí teyolo padope, RUUTUM bí ukum líktodí, delo yoksade kape kísa apééla eetet yékun?”