Read Alladian JEREMIAH 48 Bible Online

JEREMIAH 48 - Alladian bible

JEREMIAH 48

¹Moab legape: Israelke Shédí, Ralyayalumna RUUTUM bí sipe podung: “Neboke ami kídílo adír runge aayé; kapeila bíkke doolung kídíem nyokyin moyé. Kiriathaim doolungem umla, delokke edííruna líísak ekum emteng bénbila, annyingla akén yimayé.

²Moabme yidge yimayé, delokke Heshbonlo, ‘Kaju dem opín dem petnyok laju,’ emla miru kídíe, Moabke nyokku penamem ruubo suyé. E Madmen doolung nomte yokse monbomla, adud kaimadupe iyé.

³Yagorupe nyoknam adude lang kabdud-ríídude, Horonaim kíng lenkai, deme tattola.

⁴Moabme nyokmoyé, bíkke koo kídíe kaplenyé.

⁵Bulu kapla-rííla Luhith kíng reesayé, delokke nyoknam legape Horonaimpe bedang toknalo, kapdud-ríídude yagorupe iyé.

⁶Nolu agí-agí amílem dugpísula dugla, yépol among lokke pasum kope ilangka.

⁷Nolu agíke mirem lolang agér inamlo, míídíísutí kolok, nolumte abílpe umyé. Khemosh uyubí, bíkke miri kídí emlang migom kídíem lekope umnyok kosula duunyok geyé.

⁸Doolung atel kote turmadope, doolung takamem nyokmone pííyé. RUUTUM ke agom pokolok, dííte ponyuge béntuyé, delokke amo yiibe loorí yimayé.

⁹Moab bí yopnyok dope, bíme alapko laplík tola. Bíkke doolung kídíe rongngamyé, kapeila tani atel kote duuna kaimayé.

¹⁰RUUTUM ke agérem ikolo ríksonake teyolo, péname kakalangka. Agíke yoksem pana-níkna mape, sobuklo asoope gena teyolote, péname kakalangka!”

¹¹“Koo lokkai Moab de aiyope duudung, kaklak kon lokke ila kaklak konlo, píyel-písel sula imanam, dungkol atello duuna, apong kísa ila bí umnyok kosu kímang, Bíkke ngamnamde duuyarla edílote kuudí kamang.

¹²Idola RUUTUM bí polendung: Kaklaklok apongem pílenpena amiem, ngo melíkla, bíme kaklak lok pílenla, deme tongkut-toolutla, kaklak dem itpenla, idí longe píídak.

¹³Moab me nyokmola, bíkke gaina doolung kídíem mimakpe iyabomla irongem, Israele Bethelem míngke sukolok kape kísa annyingem paatodí, dekepe Moab kom Khemosh uyume míngke sukolok, annyingem paayé.

¹⁴‘Ngolu miramne, mimaklo itína, mííramnam miram mílíe,’ emla kape kísa no lukím sulayén?

¹⁵Moab me mimak aabomla, bíkke doolung takamem líípakyé. bíkke yaamé koo rungem paka kayinyé. Sikepe Maglíng ke RUUTUM emnam, amín gena Rojabí polendung.

¹⁶Moabke oletdí longe píínínkai, delokke tong-aryange menape pííyé.

¹⁷Séko bulu bím kéndudí bíkke dei-degonglo duududí, bulu takam píídumsula bíme polangka; ‘Angun-abéruna banggén kone, ralnarung roja banggén kone dírkai.’

¹⁸E Dibonke ami kídía! Noluke angun-abéna dungko delok oila, ereena, baasannam amolo duulangka. Kapeila Moab em nyokmone, nolukíte aala, noluke líísak kumgo sunam, doolung kídíem lííyin biyé.

¹⁹Mime-milope duunyok gena kídíem, Aroerlo duuna kídíe, bedanglo dagla kaadola, ‘Kape ikanada?’ emla íngkí langka.

²⁰Delo ‘Moab bí nyokkai, bí asin-amínkai, depeila kapla-rííla ilangka,’ emla bulu lubiyé. Moab ke nyogga legasim, Arnon korong robeng elo gogyipe goggo bilangka.

²¹Adi teyolo duuna doolung kídí: Holon, Jahjah, Mephaath,

²²Dibon, Nebo, Beth Diblathaim,

²³Kiriathaim, Beth Gamul, Beth Meon,

²⁴Kerioth, Bojrah, delokke anínlo lang mootelo duuna, Moab doolung takamlo kebang lubomname píngkai.

²⁵RUUTUM ngo sipe podung: Míngkím subomnam, Moab ke arengem dírpakto, bíkke alagem patuto.”

²⁶“RUUTUM me mirolpe roltímínsula Moab bí ití kolok, bíme tíngír sumotoka. Ami kídíe ngilka dope bí agí abat teyolo ketjém suyé.

²⁷Moab no kerape Israel ami kídíem lupu-luléla imatonía? No bulume doppyona alung aralok umnam kísa ségue ito.

²⁸“Moablo duuna kídía, noluke doolung kídíem mepakla líípík-lííreng kídílo dunggo tola. Bupík keralo asup supna pekí kísa nolu itola.

²⁹Moab ke yagorupe míngkím sula, kímterupe míísula, anmang rupe igoola, aapí-aang kídíe yagope usang goonamem ngo tatdung.

³⁰Buluke kímtelok marla inamdem ngo kéndung, idola de loorímayé, delokke buluke koyit sunamde ato agérlo aamayé. Sikepe RUUTUM bí podung.

³¹Dekepeila ngo Moab ami takam legape kabbidung, delokke Kir Heres ami legape kongín gedung.

³²Jajer doolung ami kídí empemílo pakyape Sibmah doolung ami kídí legape ngo kabbiyé. Sibmah doolung, no Sina Siyéng asiem maabola Jajer loope maalíkna rímang kísanako. Idola nokke siipí-siiyé kídíem nyokyin moto delokke onggur ayéte sankai.

³³Erapnam elang ashénge Moab lokke bagan delokke arík kídílok nyokkai. Ngo onggur kiiparlok onggur alangem biilen moyimape ito. Dekedelo adud-ayude kaduakom, dekede ashénam adud yimang.

³⁴“Kapdudem Heshbon lokke ila Elealeh lolang Jahaj loope, delokke Joar lokke ila Horonaim, delo Eglath Shelishiah loope tatkai. Nimrim korong asiete ongkai.

³⁵RUUTUM bí sipe podung: Moab amolo uyu ipak ila, uyu kumpomlo arí namponem romlíkla ina kídíem ngo itumyé.

³⁶“Dekepeila ngok aapíe Moab legapelang Kir Heres ami kídí legape gíímalo kape kísa tapung muddudí deke kísape ankí lenbidung. Kapeila buluke pangkum sunam mirem ekurang tabungde nyokkai.

³⁷Buluke mipile dumídem ngíbínsula, nammídem ngíyin sula alag kídíem tarí-tape kadope iyin sula ugílo ankí gasorem gin-yin sulíkkai.

³⁸Sékote mííyimanam benpak tonam kaglak kísa ngo Moab em bento, dekepeila ekum kooklo, doolung baampom takamlo kapnam-ríínam ankí-keno mílípe Moablo iyinkai.

³⁹Moab bí nyokyinkai, bí yagorupe kapkai, Moab bí annyingem lamku geka sukai. Ami takamke lupu-lulé lukepe Moab bí ila, dei-degolo duuna kídí takamke peso ríanpe kaada sukepe ikai. RUUTUM ngo polendung.”

⁴⁰RUUTUM bí sikepe ludung: “Kaatola! Moab among teyolo alabe taaya bomla pemí míyako yoptokdak!

⁴¹Luune kídí emlang líísak etor torgo sunam kídíem aabomla ikumbomyé. Delo longe delo Moabke maglíng kídíke aapí-aang kídíde okii kina mime aapí kísape iyinyé.

⁴²RUUTUM me míípu-míílénam legape Moab opínem nyokmoyé.

⁴³E Moab ami kídía, RUUTUM bí podung, reyubname lang kobung arunge, delokke etku-eda kídíe nolum toyadung.

⁴⁴Séko buludí peso reyubla duggeyédí bulu kobulo olíkyé. Séko bulu kobulok reesa yékudí, bulum etku-edae batríkyé. RUUTUM bí sipe ludung, Moab teyolo itung-irédí dítagem ngo langaayé.

⁴⁵Heshbon ke ugyumlo dunyok kuna kídíe atí ila suyimape daknyok gedung; Kapeila roja Sihonke dungangko Heshbon doolung dem, eme meyope dorla gubomkai. De Moab ke dumpongem gula, kímterupe lukím suna Moab ami kídíke tukku kídíem guyin bomyé.

⁴⁶E uyu Khemosh ke Moab ami kídía, nolu adír alooyé kapeila nolu siyinyé. Noluke ome-oo kídíem umnyok bomyéku; bulu abílpe mibo amolo duunyok gooyé.

⁴⁷Idola RUUTUM bí sipe podung: Yébom suyém ngo Moabme lekoda mirem moyéku; bíkke aidí longe pííyéku.” Sikepe Moab ke teyolo kebang agomem luyinto.