Read Alladian JEREMIAH 50 Bible Online

JEREMIAH 50 - Alladian bible

JEREMIAH 50

¹Babilon among delokke ami kídí legape kaaluna Jeremiah kíng RUUTUM ke agom lulígname:

²“Opín-buang daadi tabunglo, agom atel kote mepak mape, ‘Babilonem umto, Bél uyubí annyingkai, delokke Marduk uyubí yagorupe pesokai. Bíkke mimang kídíe, murti kídíe yagorupe peso-ríanla annying alongkai,’ emla agomem pogoola, jandiem tuurepla gogyipe goggo langka.”

³“Línggíngdanlok miru opíne Babilonem mimakpe aabomla among takamem líípakyé. Tanidak tarodak duknyok geyinla ami atel kokom duuna kaimayé.”

⁴“Dekepe idíku longe delo, RUUTUM bí podung, Israel elang Judah amie lekope kabbosula RUUTUM buluke Shédíme matayéku.

⁵Bulu Jayonpe enkupeko bedangem matala, delokdan buluke migmoe ila, agínpe mitpan suyipemanam daapongko buluke RUUTUM kíng lekope ibosupala Jayonpe enyéku.

⁶Ngokke ami kídíe díítelo, kaabomna kamape yényok sugona mér kísa ikai. Kapeila bulume yébona kídíde yémemboto. Dekepeila bulu agíke duupom-dakpomem kénsuyimape dííte mopang amolo magongkai.

⁷Buluke miru kídíde, ‘Ngolu imemmang, kapeila bulum arope yébona, buluke abu kídíke míídasula ibomnam, buluke RUUTUM ke mirolpe bulu ila paab ito,’ emla bulum paarík suna kídíe bulume dobomkai.

⁸“Israel ami kídí nolu, Babilon ke among loklang Babilon doolunglok dugnyok gelangkuka. Kerayalumpe gílen gena sobén kísa ilangka.

⁹Kapeila línggíng amongdan telok, miga-miramna opín ekenem magpéépe ibo sumopala Babilon teyolo mimak iyamoyé. Bulu, buluke opéé-opéépe gíala Babilonem umyé. Buluke epugde edílote abakmana apta gona, alag araape aalat sukumana ami kísaneke.

¹⁰Depeila Babilonem lííyé, delokke líína kídíe, buluke aang píípe lííyé. Sikepe RUUTUM ngo polendung.”

¹¹RUUTUM bí sipe podung: “Babilon ami kídía! Nolu ngokke amiem líítíto. Nolu sébomla ali-aamem dogoola gaina rubíl kísa, demangkom ashélok ulo jérna guré kísa ito,

¹²idola noluke agísuke doolung botteruna demte ipusiléé yéku. Noluke ane Babilon bí opín kídí tabung aralo amé yalumna opínkope ilangkula, ereena yépol amope iyéku.

¹³RUUTUMke aklílok bíkkíng séko amiete duuna kaimayé, delokke kumruk alope iyéku. Bíkke akor ayorem kaana kídíde peso-ríanpe mínggela bíme lugeyéku.

¹⁴“Iyyi epuk bomna kídía! Noluke ruubom pekolo rua bomlangka. Epuk atel kote mesiimape Babilon kíng aplík langka. Kapeila bí RUUTUM ke mirupe paab ito.

¹⁵Rego miyonglok Babilon me ngombom langka. Supak alag leedu sula agíem kolík sukai. Bíkke líísak ekum kedonna kídíe oletkai. Bíkke líísak etore bénkai. Babilon bí kape kísa ami opín teyolo itodí dekepe bíkke teyolo nolukom edo ralangkuka. Kapeila buluke teyolo RUUTUM ke iyan sudíkue pííla, bím edo radungku.

¹⁶Babilon lo siipí-siiyé lemo yimapeka, delokke ali-ayé koteng isi-sasi kunam kamoyimapeka. Mimak iyang bomnam legape, mipil miyonge agí-agí kumle-moolelo gíyin suyéku.”

¹⁷RUUTUM bí sipe podung: “Myomur simyoe monpitnam kísape Israelbí, yépit-yéyit goona mérpe idung. Kerayalumpe bíme donade Assiriake rojade, delokke méélamyalumpe alongem rektírnade Babilon ke roja Nebukadnejjar bí.

¹⁸Dekepeila maglíngke RUUTUM ngo sipe podung: Kapekísa ngo Assiriake rojem itung-iré tokudí, delok kísa Babilon ke rojem lang bík amongem ngo itung-iréyéku.

¹⁹Idola ngo Israelme agí amolo yésudokupe, Karmel dííte lolang Bashan yiibelo dengompe yébosudokupe langaayéku. Israel bí Gilead delokke Ephraim adi amolo akii kidarla duuyéku.

²⁰RUUTUM ngo podung: Dekena longe kídí delo Israel aralo imem-harem atí kaapa yimayé, delokke Judah arang loote paab emnam tatpa yimayé. Kapeila ngokke mitu-mingong mipek menam kídíem asampe ngo ayayé.”

²¹RUUTUM bí polendung: “Merathaim among demlang Pekod dem mimak iyabomlangka. Ngokke lulígnampe ato takamem ila bulume monmín gela moka kayin langka.

²²Yagorupe nyoknam adude lang mimak adude among tabunge muuyamdung.

²³Tani amosime gíítumpe demgone supak agísue dírmíkla dongku. Opín kídí aralo Babilon bí rongngam alongkai.

²⁴E Babilon, no ngome akmín sutí kolok nome ngo etkulok nome kénmomape batto.

²⁵RUUTUM bí gíníng-yoksa mepomem iyala, bíkke marlílok ekurang kídarem laalenkai. Kapeila Babilon ami teyolo Ralya yalumna Maglíngke RUUTUM bí agér ipenamko kakai.

²⁶Mootelok miru kídí nolu Babilon me aabom langka. Buluke kumsung kídíem línga bilangka. Aam toopom kísape líínam ato-siro kídíem kumlangka. Mitel kote memape apíírupe bíme nyokmo langka.

²⁷Babilon ke gooru rubo takamem moka kayin langka. Bulume itung-iréla idírdí longe píngkai.”

²⁸(RUUTUM ke Kumkeng Ekumem líínam aduem RUUTUM ngoluke Shédíke, Babilon ami teyolo iyan sukunamem Jirusalemlo Babilon loge mopísula dugangkuna kídare airupe popadung.)

²⁹“Yokmo apna kídí takamem, Babilonme mimak iyabomdope gogyi líklangka. Midum atel kote dugnyok lamadope Babilonme gargoola dunggo molangka. Bí kapekísa itodí, bíkke atímang inamem edo ralangkula iyan sulangkuka. Kapeila bí Israelke ngome kímte-remterupe ikísula ito.

³⁰Dekepeila RUUTUM ngo lulendung: Babilon ke yaamé kídíe bedanglo dooyinyé. Bíkke sipaying kídíe delo longe delo adud kaimayé. RUUTUM ngo polendung.”

³¹“Ralya yalumna maglíng ke RUUTUM ngo polendung, aapí bokéna Babilonke ami kídí, ngo nolum kangkidung. Nome itung-irédí longe píídak.

³²Aapí bokénade tupsula oletyé, delokke bíme sékote horep yimayé. Ngo buluke doolung kídí tabunglo eme ríyin goola emede bulum guka kayinyé.”

³³Ralya yalumna RUUTUM bí sipe podung: “Israel kela Judah ke ami kídíem iréé alongkai. Bulum ruutum bomna kídíe bulume gílen mokumang.

³⁴Idola bulume ipítna bí miga-miramnako, Ralya yalumna RUUTUM de bík amíne. Buluke legangem bí kaabila, bulume ai-kamporupe buluke amolo duumoyé, idola Babilon ami kídíe adírem paayé.”

³⁵RUUTUM bí polendung, “Babilon lolang Babilon amolo duuna takam legape, buluke mite-migom, kénna-paana ami kídí legape yokse aabomla bulu siyé.

³⁶Yatgona kaaluna miri kídar takamem, yokse aabomyé, bulu bopolpe iyéku. Miramna sipaying tabunglo yokse aabomla bulu takam peso-rían alooyé.

³⁷Buluke guré kídílo, gaari kídílo yokse aabomyé. Bulukelo duumín gena mibolok renam sipaying kídílo, yokse aabomla, bulu atí ralnam kaimana amipe iyinyé. Buluke kumsung takamem lííyinyé.

³⁸Dírí kenoem amolo langaala, korong asi kídíete ooyinyé, kapeila Babilon amode, mimang kako amonge, delokke mimang amongde reyubla tumgeyé.

³⁹“Dekepeila Babilon dem yépol mooruk lokke monkír kídíe lang sipaying kídíe delokke pettun kídíe yébom yéku. Yénam tabu loope tanie delo duubom yimayé.

⁴⁰RUUTUM ngo sipe podung, Sodom melang Gomorrahme, delokke abe-arelo duuna doolung kídíem kape kísa ngo nyokyin motodí delok kísape Babilon lote ilangkula tani atel kote delo duuna kaimayé.

⁴¹“Kaatola! Deddína roja kídíe dumsula, mimak leemo geyinla, miram runa opín kídíe amo sokke kéényung regolok gídum sula, deddína sipaying maglínge, línggíngdan telok tokdak.

⁴²Bulu gíníng yoksa kídíeme gagrepkai. Bulu ayang kamana mikír amieke. Buluke guré dugdude siyéng asi muudud kísa. Bulu mimak ipe emla irep lenkai.

⁴³Buluke legí-sigangem Babilonke roje tatto. Bí tatla, bíkke alage lakbyang kai. Okii kina mime kísa adíre bíme dobomkai.

⁴⁴“Jordan korong robeng nyomrang pasum loge neyi-neyang ardarupe kakolo gílenna myomur simyo kísape ngo aala, Babilon ami kídíem buluke doolung kídílok lomlen dope imoyé. Delo ngokke ullennam ami bí among dem ruutumyé. Ngokkíng sékome lubísuyén? Séko ngom dakrík sulayén? Ingkona ruutume ngom aklayén?

⁴⁵Depeila Babilon doolung teyo lolang ami kídí teyolo ingkoko ngo ipe emla rulendudí dem tatgap langka. Buluke koo kídí emteng hobomyéku, delokke takame yagorupe peso-ríanyé.

⁴⁶Edílo Babilon me umla bí olet yédí, delokke adud lok tani amonge beleng geyé, delokke ulo gogdudem opín takame tatyinyé.”