Read Alladian JEREMIAH 51 Bible Online

JEREMIAH 51 - Alladian bible

JEREMIAH 51

¹RUUTUM bí sikepe podung: “Kaatola! Ngo Babilon emlang bíkke ami kídíem delokke Leb Kamei ami kídíem nyokmo dope aidko rurepdung.

²Ngo mibo amo lokke miru kídíem Babilon lo melígla bulu bíme dokappe kabbínla amongem líípakla, bíkke tong-aryadí longe delo rego mipílok miru kídíe bíme adír biyé.

³Babilon ke sipaying kídíem yogmo apdí kamomapeka delokke mimak leemo gedí kamomapeka. Bíkke milokong yaamé kídíem atel kote turmomape petyin langka.

⁴Bulume Babilonlo paletla, takame agí-agíke gíídang lamgé kídílo oletyé.

⁵Kapeila Israel melang Judahme, bínyike Shédí Ralyayalumna RUUTUMbí mepakmang; bulu deddína imem-haremem Israelke Deena bíkke keralo ituakom.

⁶“Babilon lok dugnyok getokula! Agí-agí yénamem dugpí sugetola. Babilon ke paablo agíete simín gemapela, kapeila, si RUUTUMke edo radíku longe; bíkke paapenamem RUUTUM bíkke bidíkue.

⁷RUUTUM ke alaglo, Babilon bí uun batikuai. Tani amongem bí tíngír sumoto. Opín buang daadie bíkke apongem tííla, bulu takam tíngír suyinkai.

⁸Babilon bí menang asak lomnampe oletyé, delokke nyokpakyé. Bík teyolo kabbomla ilangka. Bí aigam dokupe kuséréng emte matalangka.

⁹Babilon ke magpéé kídíe podung, ‘Ngolu Babilon me ipíkupe iramto. Bím ipílayimang. Kaju bím ngolu melangala agí-agí among supe ensu langkupe. Kapeila bík teyolo Shédíke kebang lubomname doomug kísa kedonpe gyasala taleng telokai sangkai.’

¹⁰“Ngoluke dormope yénamem RUUTUM bí aroe emla lengkankai. Iname kaju, RUUTUM ngoluke Shédíke inamem Jayon me lupadope gílaju.

¹¹Yokmoem yarjoto, tamtem laarepto. Medes ke roja kídíem mogug líkto. Dekepe igade bí Babilon me nyokmope míídung, delokke bíkke Kumkeng Ekum líínam edoem buluke teyolo rakupe idung.

¹²Babilon ke etor abe kídílo dagdola jandiem tusa toka! Delo kaabomla dagbomna kídíke teyolo sipayinge bojéyadope amiem bojéyangko laalík toka. Tobomla aabom langka. Kapeila Babilon ke ami kídí teyolo, RUUTUM ke kebang agom lurek supe bíkke míínamem Babilon ke teyolo irepyé.

¹³Deddína korong asi teyolo, deddína mirem ekurang teyolo duuna Babilon nokke longe píngkai. Nome papakdí longe píngkai.

¹⁴Ralya yalumna RUUTUM bí agísulok sikepe pésudung: Pemír-mírbam kísape, deddína miru amiem Babilon nokkíng bíngamoyé. Bulu togog gogla nok teyolo duga bomla nome ikumyé.”

¹⁵“RUUTUM bí agí pauar lok amosim píto. Bíkke kénnamlok tani amosim pílento. Bíkke mííjing kolok talengem atag moto.

¹⁶Bíkke lulíg kolok taleng lokke asie mírlendung. Bí among kéényung regolok doomugem gyasa modung. Bí pedonglo yaariem garmola, bíkke kumsung kídílok asarem laalendung.

¹⁷Tani mipilde aro kénnam kamang, delokke ségu kamang. Uun pína kídíde, uun mimang pínam kídí deloge annyingem pípaa sudung. De mimang kídíde turmang delokke yatne.

¹⁸Dekede aro agérlo aamane, míípak pename. RUUTUM ke buluke teyolo kebang lubom yékuem, bulu takam nyokyinpene.

¹⁹Idola Jakob ke Shédí bí bulu kísa imang. Ato takamem bí pílen-rulenne. Israel emte agí amirupe ullensune.” Ralya yalumna RUUTUM, bík amíne.

²⁰RUUTUM bí sipe podung: “Babilon no ngokke gíítume. No ngokke mimak ekurange. Nokke lok ngo opín takamem dírmíknadung, delokke among yéta takamem nyokmodung.

²¹Nokke lok ngo guré dugbomna kídíem, guré-gaari kídí emlang dugbomna kídíem dírmíknadung.

²²Nokke lok ngo mimem, milokongem, mineme, kooeme, mimumem, yaaméem mokanadung.

²³Nokke lok ngo kaabomna emlang mér kídíem petnadung, arík ina emla nangol hona rubo kídíem petnadung, nokke lok ngo gobonor kídí emlang mite-migom kídíem mokanadung.”

²⁴RUUTUM bí sipe polendung: “Jayon ke teyolo Babilone lang bíkke ami kídíke atímape inam kídíke edoeme, ngo noluke amig kangkolo laayéku.

²⁵“Tani amongem nyokmola itígoona dííte nokke teyolo ngo kangkidung. RUUTUM ngo nome ludung: Ngok alage nokke ponyugem gagdola, bénletmola eme gukutnam díítepe nome ngo imoyé.

²⁶Nokke dííte elíng deloge sékote ekum gaangpe gatlenna kamayé, kapeila agín legape rongngam alooyéku. Sikepe RUUTUM ngo podung.

²⁷“Among so jandiko tuusa langka. Opín-buang takamlo bikul mutgo langka. Babilonem mimak idope opín kídíeme irung molen langka. Sim among yéta kídísim goga langka: Ararat, Minni delokke Ashkenajme; maglíng ruutumko bík mirupe parlíklangka; pemír mírbam kísape guré kídíem melík langka.

²⁸Medes kídíke roja kídí emlang buluke gobonor delokke mite-migom kídí, delokke buluke rumkílo duuna takamem Babilonme mimak idope iru sumolangka.

²⁹Babilon amongem líípakla midum atel kote kaimadupe idope emla RUUTUM ke míínamem ipíídope ikolok amongsi taronpe ton-gedung, kigela beleng gedung.

³⁰Babilon maglíng kídíde mimak imín suyimape buluke líísak ekum aralo asoope dungkai. Bulu ralnam kaimala mime kídí kísa ikai. Buluke arem yapgoem dírpakla buluke dungko kídíem emepe rílíkto.

³¹Babilon doolungde airupe miru alag aralo angkai emla dak kídíe rojem pokan bikai.

³²Miru kídíe korong kongko berengem bomkai delokke líísak ekum kídíem emepe rílíkkai. Babilon sipaying kídíe pesolok akén-ayén yimangkai.

³³“Maklíngke RUUTUM Israel ke Shédíbí sikepe podung: Kiiparlo dolot ínam kísa miru kídíe Babilon amiem íbomkai. Aam gaddíem gadnam kísa, bulume gaddí longe píngkai.”

³⁴Babilon ke roja Nebukadnejjar bí ngolume méyyinto. Bí ngolume akén-ayén moyimape, araana togu kísape imoto. Bírem métnam kísa bí ngolum métla, ngoluke ngamnam kídílok bík akiiem kiidar mopala; ngolume abatpe batpaktoku.

³⁵“Ngoluke teyong lolang ome-oo teyolo, itung-irénam edoe Babilonke dumpolo kaka langka,” emla Jayon amie, delokke, “Ngoluke teyolo iyyi líínam are, Babilonlo duuna kídí teyolo kaka langka,” emla Jirusalem ke amie lulendung.

³⁶Depeila RUUTUM bí sipe ludung: “Kaatola! Ngo nolum mopítyé, delokke nolum iréénam edoem rabiyéku. Ngo Babilon kídíke sirung kídíem lenmo yimape ila sirung kídíem oojin moyé.

³⁷Babilonde kumruk pasumpe ila ménsurungke yépompe ilangkula ami atel kote duuyimape, ami takamke reyubrupe kaada sukengpe iyéku.

³⁸Babilon ami kídíe myomur simyo kísa ugla, myomur simyo koo kídí kísa ngíryéku.

³⁹Buluke dolí-tíílí lenduem ngo bulum donamem domoyé; bulu ngilla-soola darngo suyimadupe ipyar dope, ngo bulum tíngir sumoyé.

⁴⁰“Kape kísa mér kídíem delokke bénbo kídíemla mérbo kídíem paka kolo gíbo dudí, deke kísa ngo bulum paletkolo gíboyé. Sikepe RUUTUM ngo lulendung.”

⁴¹“Tani gíídaso kímterupe lusuna Babilon me umto. Depeila tani takam aralo Babilon bí reyub runampe ikai.

⁴²Siyéng asi lokke puumue eesa bomla Babilonem eelum bomyé.

⁴³Babilon ke doolung kídíde rongngam along langkula tani atel kote delo duuna kaimayé delokke sékote delo gígona kaimayé.

⁴⁴Ngo Babilon ke uyu Bél me, agíke donam atoem batlen sudokupe imoyé. Ingkona opínete bíme kumsuna kaimayé, delokke Babilonke líísak etore bényé.

⁴⁵E ngokke ami kídía! Nolu delok lenla, agí yénamem dugpí sugelangka. RUUTUM ke yagorupe markolok dugnyok gelangka.

⁴⁶Delo amo delo atí-sirí legang taddokom nolu aapíe améla pesomapeka. Dekena atí-sirí legangem, atímape inam legangem, ruutum kídí teerengke mimak imín sunam legangem, sinying ako tatla, lunnying ako tatla, nolu tatyaryé.

⁴⁷Babilon ke mimang kídí teyolo ngokke alag píídí longe píídak. Among tabungde annyingyé delokke ami kídí tabungem petyinyé.

⁴⁸Delo Babilonke oletnamem kaala talengela amonge delokke delo aradelo duuna takame ashéyé; kapeila Babilonme nyokmopene mimak iyape línggíngdan telok tokyé.

⁴⁹Tani amo sokke deddína amiem Babilone simoto, delokke Israelem Babilone simonam legape Babilon ekom sikupe aiyé. RUUTUM ngo sipe podung.”

⁵⁰Babilonlo duuna kídí legape RUUTUM bí podung: “Nolu sinamlok mopísuto. Supak gílen langka. Dooya mapeka. Nolu ekum lok mooteng amolo duuduakom ngokke legangem mííbomla Jirusalemem míípa sulangka.

⁵¹‘Ngolu annyingna amipe iyinkai. Ngolu atí igul bosu layimang, kapeila ngoluke Kumkeng Ekum lokke deena moolop kídarem mibo amie aabomkai,’ emla nolu podung.

⁵²Idola RUUTUM bí sipe podung: Babilon kídíke mimang kídíem itung-iréla, asi-amode tarí kinamlok ulo goggedope ngokke bulum idí longe píídak.

⁵³Babilon bí taleng teloope resala kaadu sunam líísak ekumem molíkla iduakom, bím nyokmo kupenem ngo melíkyé.”

⁵⁴RUUTUM bí sikepe podung; “Tattola! Babilon lok ami kídílok, botterupe nyokkunam kapdud-rídude lendung.

⁵⁵Ngo adud-ayud kaimadope asoope idokupe Babilonem nyokmoyé. Miru maglínge sipar botteruna kísape aabomla, ngomla mimakpe aabomyé.

⁵⁶Bulu Babilonme nyokmope aabomdung, Babilon ke sipaying kídídem umyinla, buluke iyyi kídíem díryinyé. Kapeila ngo edo rakuna Shédí ko, delokke Babilonke paabanampe ngo iyé.

⁵⁷Ngo buluke kénna-paana ami kídí emla migom-mite kídíem, gobonor kídíem, sipaying kídíem tíngír suyin mopala, daryi kumadope ipyarmoyé. Sikepe Ralya yalumna RUUTUM emla amín gena Roja ngo polendung.

⁵⁸Babilon lokke biisamla edííruna líísak etor kídíde amolo dooyin yéku. Bíkke kedon runa eyab kídí dete, emelok gunyok kosuyéku. Atí agér kamana agér mílílo, ami kídíe inga sulíkla, buluke agér tabungde, míkkípe gyapak yéku. Sikepe Ralya yalumna RUUTUM ngo polendung.”

⁵⁹Judah lokke Jedekiah rojake dítak appinape roja iduem, Jedekiah kíng lekope Babilon elo gíbosuna, rojem kaadung-kaatokna Mahseiah ke oten delokke Neriah ke oo Seraiah kíng, Jeremiah bí agomeke Babilonlo duuna Jihudi kídílo políkto.

⁶⁰Delok teyolote Babilonlo tong-aryang atímange aapenam legang emlang Babilon ami kídí legí-sigangem tídbumnam kitab kolo atkum geyéla Seraiah kíng bilíkto.

⁶¹Deme bilík dola Seraiah me Jeremiah bí, “No edílo Babilon elo pííyédí, so atnam agom kídísim ami kídar keralo pori rikan bilangka.

⁶²Depe rikan bipala no sikepe kumlangka: ‘E RUUTUM si agínpe rongngamna yépol amope iyar dokupe, so tani taroe atel kote turla yébom yimadope, sim among sim no nyokmoyé emla no agísue lusuto.’

⁶³Edílo no kitab sim pori riyin yédí, kitab so elíngko éélíkla Euphrates koronglo yoplík langka.

⁶⁴Depe ipala sipe pélík langka: ‘Sikepe RUUTUM ke Babilon ke teyolo tong-aryangem bomala, bíkke ami kídíke olet yékuem, Babilon bí lekoda gerep kuyimape jiilumla duuyar langka,’ ” emla políkto. Jeremiah ke agom kídarem so poyinto.