Read Alladian JEREMIAH 8 Bible Online

JEREMIAH 8 - Alladian bible

JEREMIAH 8

¹“Delo longe delo Judah kelang Jirusalem lokke roja kídí kelang migom mite kídíke simang along kídíemla kaaluna miri kídí kelang kumbona miri kídíke simang along kídíem, ago kídí lok laabínyé.

²Dekedem ai kampope yusing kunam ayanpe amolo doojéng dooyémoyé. Dekedem doonyi keralolang, poolo keralo, delokke taleng telokke takar kídí keralo dongkanmoyé. Kapeila bulu doonyi, pooloem, takar kídíem yagorupe erbomla, kumsula buluke agom-aangem tatpe-kénpe emla líímé-tagil ila yéto.

³Depeila bulume ngo nyokmoto idola nyokngong kídarde, supakke turkíla yéna atírumana siirum ami kídarsi turla yénamem pemílo sinameme matadung. Sikepe Maglíngke RUUTUM bí polendung.”

⁴“RUUTUM bí sipe podung emla Jeremiah no polangka: Edílo amikone olet yédí, bí gerep kumanía? Amikone bedangem gímemyém bí gílat sukumanía?

⁵Dekemílo kapeila Jirusalem bí, delokke ngok ami kídare gílat sukumane? Bulu yatko mílídelo gagdasula gílat sukupe míímang.

⁶Ngo tatjila tatdung, buluke aralo jonna agomem edílote pobo sukímang. Buluke aralo, ‘Ngo ingko koda itone?’ emla pobosula séko kom aapí míílat sukumang. Mimaklo guré duganam kísa mipile agí-agí bedanglok entí sudung.

⁷Talenglo denggoona delubore pettangete agíke moodíem kénsudung. Perong kídíe, pakarpaak kídíe, delokke tasik kídíete buluke moole-moolelo denggodíem kényin sudung. Idola ngok ami kídíe RUUTUM ke mííbomnamem atí kénmang.

⁸Noluke ara lokke kénna kídíe ayonem atpella metem rodem, ‘Ngolu kéndung, RUUTUM ke ayone ngolukíng kadung,’ emla nolu polayén?

⁹Noluke ara lokke kénna kídíe agom aroem míílalsula, etku-eda agomlo batjém kosula annyingdung. Bulu RUUTUM ke aro agomem mepak kolok bulu kelo íngkona gyan agom koda kayadan?

¹⁰Depeila ngo buluke mime kídí emlang asi-among kídíem angukon amilo ruulíkyé, améngona lok ila bottena loope mííta-hakta legape kaabo botígoodung, delokke mirie lang kaaluna miri kídíe lekope ami kídíem yatbosudung.

¹¹Bulu ngok ami kídíke aapí tarí kídíem arope ngotkap goomang. Edílo aapí eetetmape adíre kayédí delo bulu, ‘Aidung, aidung,’ emla yatgoodung.

¹²Ami kídare buluke belumnam agér kídíem annying sumanadí? Ma, bulu atí annying kamang, delokke annyinglok bulu migmuete kenyék gemang. Depeila bulu sina-nyokna aralo doomín geyé; edílo bulum iréé yékudí delo buluke yéyine. Sikepe RUUTUM ngo polendung.”

¹³“RUUTUM bí sipe podung: Ngo bulum aropakpe nyokmoyé. Ane kídílo onggur ayé kamayé, donam tapang ane kídílo ayé kamayé, delokke ane kídíete rukyinyé. Bulume ngokke binam ato-siro takamde buluke loge gínyokyéku.”

¹⁴“Ngolu kapei dumsula so duutídune! Kaju ngolu líísak etor torgongko doolunglo duknyokgela, delo nyokbosulaju! Kapeila ngoluke Shédí bí ngolum nyokdope rutubong, delokke emo líknam asiem tíídope bitubong, kapeila ngolu bík kangkolo paab ito.

¹⁵Ngolu aapí eetet moodíem matato, idola delok ayanpe reyubnamem kaapato.

¹⁶Miru kídíke guré mududem Dan doolunglo tatpangkai, buluke mimak guré mudud lok among takame epín gekai. Bulu asi-among takamem, doolung takamem delokke ami takamem nyokyin modope píngkai.”

¹⁷“RUUTUM bí sipe podung: Kaatola, ngo noluke keralo imet-ikot lamanam, yagorupe asum-aar kana tabíem melíkdak. Dekede nolum takam payinyé.”

¹⁸Ngokke ankí sim ngo agísue poyil sulamang, ngok aapí-aang arasi kidung.

¹⁹“Jayonlo RUUTUM bí duuyimanía? Jayonke Rojae kayimanía?” emla, ngok ami kídíke kapdud em tattola. RUUTUM bí buluke kapla lunamem luyan sudung, “Kapeila bulu, buluke mibo-miying uyu kídíem kumsu-joosula ngome marmokan?”

²⁰Ami kídíe sipe kapdung, “Ali-aam iyindíe gíkabong, díyu-loboe gíyinkai, idola ngolum ipítmang.”

²¹Depeila ngok ami kídídem ijéttoname, ngote aapíe míídírkai. Ngome peso-ríane igo bomla, ngo pengé lula kaptíkai.

²²Gileadlo kuséréng kamanía? delo daktor kamanía? Dekemílo kapeda ngok ami kídídem ipíkumane?