Read Alladian ANKÍ MIRI 2 Bible Online

ANKÍ MIRI 2 - Alladian bible

ANKÍ MIRI 2

¹Kape kísai RUUTUM bí marlínglok Jayonme, kaamodope doomuglok éélumtone! Bí Israelke angun-abéem teyong telok amonglo eltokto. Bíkke marlíngdo longe delo, agíke ale tukeng Kumkeng Ekum emte kénsuyimang.

²Judah lokke doolung kídíem, atí ayang kamape RUUTUM bí nyokyinmoto. Among tabungem daktum bomna yapgo kídíemte bényinto. Bí among yéta kídí emlang, roja kídíem annying moyinto.

³Israelke ralnam takamem, bík marlínglok nyokyinmoto. Miru kídí lokke aabomduem, bí igulmape kaarulíkto. Takamem guyamna meyo eme kísape, bí Jakobke teyolo ila, ampeng-amleng tabung emte guyinto.

⁴Miru teyolo yokmo pugar líknam kísa, bí ngoluke teyolo ruulíkdung. Ngoluke ashéng bomnam takam teyolo, bí miru kísape ila moka kayinto. Jayonke ekum mipílo bík marnamem, eme dorna kísape doryin líkto.

⁵RUUTUM bí miru kísape ila, Israelme nyokmoto. Bí Israelke roja ekum tabungem nyokmola, maglíng dungko takamem nyokyinmoto. Judahke legape bí, kapnam-ríínam delokke, pengé lunamem bojémoto.

⁶Bíkke duupomem bí gíídang lokke tami duupom kísape bénpakto. Bíkke moodí-moodílo doman doko kídíemte benyin bito. Israelke gíídí-siipe kídí emlang, Sabbath kídíemte RUUTUM bí kénsu moimato. Bíkke agí margí kolok rojelang mirí kídí eteng ankang along sukai.

⁷RUUTUM bí agíke Kumkeng Ekumem mepaksula, delokke deena rungguemte kaasuyimang. Jirusalemme dunggobomna yapgo kídíemte, bí miru kídíem bénpakmoto. Adeng-apelo ngomdud kísa, miying ami kídíe, RUUTUMke ekumlo ngomla-rííla ikai.

⁸Jayonem gargoona yabgoem bénpak rudope emla, RUUTUM bí míílento. Aipakpe bénpakdope bí, ennolok soldula sapgoto. Dekepeila líísak ekum kídíelang, yabgo kídíe nyokkaku.

⁹Yapgo eyab kídí eteng kédéng aralo dírlíkla, deke delokke arem kídíete dírsin-dírmínla iyinkai, Roje lang miro kídíe, mibo amonglo abílpe yéyinkai, delokke idong yéyon kídíeteng kaimang. Kaalu-kangorna miri kídíeteng, RUUTUM kelok aro immang kote paayimang.

¹⁰Jayon lokke gaam miro kídíe, tukkulo demul ilíksula, amíllo ankí-gasorem polumsula, asoope duuyinkai. Jirusalem ome kídíe, agí-agí dumpongem ngemgíp gípyinla duuyinkai.

¹¹Kaptíla ngok amigsi mikkongkai, ngok aidsi ramnam mílípe ikai. Ngokke ami kídíe nyokyin kolok, koo aménelang ojing kídíe, doolung sokke bedu-bedang, kídíso akén-ayén yimape, kigí-ramgíla ikolok, ngok aapí-aangsi ankílok akén geyimape idung.

¹²Bulu tíílíng-kenolok, buluke ane kídílo kapbisula, bedu-bedang kídílo panam-níknam, ami kísa bulu olet-osétgoola, buluke ane alag keralo eetet-eetetpe siyangla bulu ikai.

¹³E Jirusalem, nom ngo séko kíng ruupesula, kape kísa nom ngo emyén? Nokke kísa sékote ankína kamang. Ngo ingkona agom lokyi nome ngiipene? Nokke atung-aréé si siyéng asi lokke eerínam kísa eerí aloodung. Sékoda nome mopíyékun?

¹⁴Nokke kaalu-kangorna kídíke, agom-aang kídarde menameke. Nome abílpe ummadope, nokke paabem bulu pokan bimato. Buluke polu-poor agom kídíde, imem sumona yadna agomeke.

¹⁵Nokke bedalok gína kídíe, nome kaapu-kaaléla kaala, nokke yangkunamem, dumponge mamang kitla, ngilpu-ngilléla, “Siyaya kampona doolunge, tani amongke ashéng bomnamíaya?” emla lupu-luléé bomkai.

¹⁶Nokke miru takame, buluke nappange, koka-yapakla ila, iipange kotekla, nome, “Ngolu bím métto, sikena longemmin ngolu kaape emla turbomtone,” emla luyé-lulékai.

¹⁷Kerapekai lurung-porungnampe, RUUTUM bí agí agomem mesiisula, bík míínampe ato takame ikai. Nome ayang atí kamape bí nyokmoto. Nok teyolo miru kídíe ipusiléédope imoto. Miru kídíke ralnamem bojéyamoto.

¹⁸Ami kídíke aapí-aange RUUTUM kíng kabbisudung. E Jayonke yapgo kídía! Longe-yohpe nok miksie, korong kísa bíddak langka. Nok amigem apéé momape, kapyar langka.

¹⁹Yoh ruubuungem gerep reptí langkula, RUUTUM ke keralo kaptí ayartoka. Doolung lokke bedu-bedang takamlo, kenolok sipe ina koo aména kídí legape, nok aapí-aangem taayasula, RUUTUMke ayange buluke teyolo kadope rogu-gutítoka.

²⁰“E RUUTUM, kaala míngkítoka! Kapei no bulum siddípe iréétone? Agíke olenla isaasunam ome-oo kídíem, mime ane kídíe dosuyénía? Nokke deena Kumkeng Ekumlo rojemlang, miri kídíem mokanamde ibadunía?

²¹“Mijing koope bedalo sila dooyindung. Mimum-yaamé kídíem miru yoksalok paka kayinto. Nok mardí longelo bulume ayang kamape no siyinmoto.

²²“No ngok miru kídíem, ngokke dei-degolo, reyub bomnam doboem dodope tomtung. Nok mardí longelo sékote runyok gelamang. Ngokke ayala isaanam ome-oo kídíeme, miru kídíe siyinmoto.”