Read Alladian ANKÍ MIRI 3 Bible Online

ANKÍ MIRI 3 - Alladian bible

ANKÍ MIRI 3

¹RUUTUMke marnam banggénlok demnamem kaana amie ngo.

²Bí ngome angunlo yémomape, monpakla kaamolo yémotung.

³Loodí kítpe, iyém kaimape bík alage mirolpe, ngok teyolo demtíkai.

⁴Bí ngokke adín simla asig sim, menape sanmokai delokke, ngok along kídíem díryin mokai.

⁵Dug-adír míngkén suyimanam aralo bí ngome metung.

⁶Sikana ami kísape, ngomkom kaamoko aralo duumotung.

⁷Ngo dugnyoksuge lamadope, bí ngome etorpe torgootung. Bí ngome íkolilok yéétung.

⁸Igul legape ngo pokansula, kabbisula, idagakom bí ngok kumnamem tatbimang.

⁹Bí ngok bedangem bekermola, ngok gípekuem líídunglok jotumtung.

¹⁰Situm lokke tobomnam kísape, delokke myomur lokke sutbomnam kísape bí ngom idung.

¹¹Ngok bedang gítínglok sobom langkula, ngok amíl sime alop-aloppe ipala ngome mepakdung.

¹²Bí ngome bíkke iyyi epuk apyil sukepe idung.

¹³Bíkke gatbungke yokmolok ngok aapí-aang sim payyardope apdung.

¹⁴Ami takamke ngilpu-ngiltakpe ngo ikai. Bulu longe ruubuungem ngome ngilkangkai.

¹⁵Bí ngome kosana alanglok, delokke kosana donam-tíínamlok, yéétula domo-tíímodung.

¹⁶Bí ngok iipangem elíng líítamlok tummíkla, demullok ngok migmuem ilumla akang modung.

¹⁷Aapí eetet emnamem ngo kényimang, amílke ashéng-angamem ngo kaayimang.

¹⁸Dekepeila ngo sipe emtíkai, “Ngokke angun-abée kaimang, delokke RUUTUM kelo mííbomnam takame nyokkai.”

¹⁹Ngokke magong-gígongla duk-adírem míítí genamsi kosaruna emo kísanako.

²⁰Ngo dekedem míípang paatíla, ngo agíe mínggíp sudung.

²¹Idola sim agom sim ngo míípang suyém, ngok aapí-aange ekerdungku:

²²RUUTUM ke asamruna, delokke nyokyimana, ayange agínpe duuyardung.

²³De rokom ngargo kísa yaying ayardung, delokke doonyi sanam kísa berok aloodung.

²⁴Depeila ngo sipe emdung, “RUUTUM bí ngokke ato takamsue, depeila bím ngo míída suyaryé.”

²⁵RUUTUM kíng míídasuna kídí delo, bík ainame kadung.

²⁶RUUTUMke turnamem aapíe hakjémla, asoope toyanamde airuname.

²⁷Tanie yaamé dungadape, sikena hakjémem geyil sunamde ainame.

²⁸Edílo tanilo ankí-kenoe pííyédí, delo bí adud kamape aapíe hakjémla, yégap bompe aido.

²⁹Mínggípsula yégepe aido, kapeila longeko mííbomname apíídíe kayépe.

³⁰Kémtalok pina amidem kémta konemte gebilangka, delokke lupu-luléem donggap gelangka.

³¹Kapeila RUUTUM bí ayane, bí mepak ayarmayé.

³²Dug-adírem bí bomadokom, bí ayangem lengkanyéku. Bík ayangde nyokyimana ayange.

³³Kapeila bí anki-kenoem erbommang, demangkom tanilo dug-adíre aanamdem ashébommang.

³⁴Ankí-adír pateklo ngoluke aide duuyém, RUUTUM bí kéndung.

³⁵RUUTUMke keralo, tanike panggíngem paamomape inamdem RUUTUMbí kéndung.

³⁶Raadang pénsamlok kebangem lumape inamdem, RUUTUM bí asoope kaaru-kénrula iyénía?

³⁷RUUTUMbí tolíkmadem, ato-siro kídíe, agí-agíe isudope sékote ilamayé.

³⁸Kedon Yalumna bíkke nappalok, aine lang aimane lendung.

³⁹Tanike agí paab legape atung-aréé paasunamdem, kape RUUTUMke teyolo ebín-ebonpe lubomyén?

⁴⁰Ngoluke yékor-yéyor kídíem kangkí-tatkí sukípala, ngolu RUUTUM kelo aalat sulang kuju.

⁴¹Ngoluke aapí-aangem teyong telo duuna, Shédí kíng lengkansula sipe kumlaju:

⁴²Ngolu nokke mirolpe ila paab ito, depeila no ngolum asampe mepakmato.

⁴³Nok marlílok no agíem polumsula, no ngolum monbomla mokato.

⁴⁴No agíem marlíng doomuglok yétlumsula, ngoluk kumname nokkíng píímato.

⁴⁵No ngolum tani among araso, mibo minnompe yégo mokai.

⁴⁶Ngoluke miru takamke nappange, koka-bekyala ngolum lupu-luléé alongkai.

⁴⁷Ngolu bíírík-hamgomana, nyokkuna bedanglok gíla, yirí-pedípe pesonam yénamem yékai.

⁴⁸Ngok ami kídíem apíírupe nyokmonam legape, ngok amigsok miksie korong kísa bídkai.

⁴⁹Ngok miksi si bídyin yimape bídyaryé.

⁵⁰Teyong among telok RUUTUMke kaatok suma tetengem miksi si kayaryé.

⁵¹Ngokke doolung sokke mime kídíke legangem kaayém, ngok aapí dugsi yago yangkai.

⁵²Ngome akgíng-sigíng kamape akna miru kídíe, pettangem appe emla maabomnam kísadung.

⁵³Bulu ngome kobung arunglo ellíkla, kobung nappadem, lííbyang kolok kingkaptung.

⁵⁴Asie ngome eelum bomla, ngok sinamde píngkai emla ngo míísuto.

⁵⁵E RUUTUM, arung aralok nom ngo kumsudung.

⁵⁶Edílo ngo kapla kumsula, nome roguyédí no tatdung.

⁵⁷Ngokke nom gogyém no anínlo aala, “Pesomapeka,” emla ngom podung.

⁵⁸E RUUTUM, no ngok legangem kebang ibomla, ngok yénamem no ipítto.

⁵⁹Ngok teyolo atímang inamem E RUUTUM, no kaato, iname ngok legangem, no dagge bilangka.

⁶⁰Ngok mirue ngom akla, ngok teyolo deddína lusi-luo kebang baanamem no kéndung.

⁶¹E RUUTUM, buluke lusi-luo lunamem no tatto, delokke ngok mirolpe kebang baabomnamem no kénto.

⁶²Longe ruubuungem ngok legang mílílo, bulu potíbosula, ngome atímangem iketpe ruutí bosudung.

⁶³Bulum kaatola! Bulu duudo lateng delokke dagdo late, ngok teyolo lupu-lulé miriem lutí bosudung.

⁶⁴E RUUTUM, buluk agér inamem kaala, bulum ingéé daklangka.

⁶⁵Buluke teyolo no péla, bulum anka sumolangka.

⁶⁶RUUTUM nokke taleng rumkíng araso, bulume nok marnamlok mon-go bomla, nyokyin molangka.