Read Alladian ANKÍ MIRI 4 Bible Online

ANKÍ MIRI 4 - Alladian bible

ANKÍ MIRI 4

¹Asirna uun kídare asir yimang, Kumkeng Ekum líísak kídare, bedu-bedanglo doojé-dooyéngkai.

²Uun kísa gairuna, Jayonke ome-oo kídíem, supakke pítonam kédéng peking kísape, tabunge bulum kaayinkaku.

³Ménsurung anete agíke ome-uem, anyun sunla ayadung; idola yépol mooruklo yégona, Ostrik pettang kísa, ngok ami kídíke aapíe tolkai.

⁴Bulu agíke ome-uem, tíílíng-kenomola, koo kídarde donam kogoolate, sékote bisupe emla míína kamang.

⁵Gai-gakong ruupe dona-tíína kídíe supak, bedu-bedalo, kenolok sipe idung. Tiina-ngamnalok usaaname, demul alempe supak dongkaku.

⁶Shédíke alaglok menang asak, nyoknamem paana Sodomke ami kídar kísa, ngok ami kídíe dempemílo pakyape itung-iréem pangkai.

⁷Roja oo kídíe gakírem pemílo angun yala, delokke tapamem pemílo, pun yala, buluke amíle rubi elíng kísa kampoe ila, delokke sapphir elíng kísa asirla ituai.

⁸Idola bulu supak, mekolem pemílo yora yala, bedu-bedang lote bulum kangkén yimang. Buluke asig-ayoe, asék kísa erengkai.

⁹Yoksalo sina kídare, dírí-kenolo sina kídíem pemílo gaiyangkai. Kapeila bulu donam-tíínam, paayimala eetet eetetpe, bulu siyinkai.

¹⁰Ngok ami kídarke nyokdo delo akii kenolok, agíke osunam ome-oo kídíemte dosula, ayasuna ane kídíe donam-tíínampe iyinsuto.

¹¹RUUTUM bí agíke marlíngem apíírupe melenla, Jayonlo emeko rílíkla, ato kaimadupe gukutmoto.

¹²Tani among sokke roja kídíelang mibo-miying ami mirol kídíe, Jirusalemke yapgoem bénla aalayé, emla sékote míímato.

¹³Idola dekepe ikai, kapeila Jirusalemke kaalu-kangorna kídíe, paab agér ila, bíkke miri kídíe, dengompe yésuna kídíem, asamrupe iyyi biimoto.

¹⁴Depeila de ruutum kídarde, mikmana ami kísa, bedu-bedalo memgola, bulu kelo paab iyyie yagorupe kalík kolok, buluke egemte ukkílína kote kamang.

¹⁵“Nolu deemana ami kídíe, gígéé langka,” emla ami kídíe bulum lukai. Bulume mibo-miying ami takame, “Gígéto, ngolum ukkí mapeka! Sim ami kídar sim duumo mapeka!” emla lugésula, bulu rego mipílo, opín-buang takamlo magongkai.

¹⁶Kapeila RUUTUM bí agísue bulume, mibo-minompe yégomola, buluke teyolo bí kaabom yimang. RUUTUM bí miri kídíem lang ruutum miro kídí teyolo, agom tadbi yimang.

¹⁷Ngolu agíete igulpena amiem, mata tatíla amigete mikma bomsukai. Igulpena angukon opín-buangem, toya-yatíla, yasam berokkai.

¹⁸Miru kídíe ngolum totíbomla, bedang kídí loteng ngolu gílen layimang. Ngoluke atímana longe pííla, yéyine píngkai.

¹⁹Ngolum monmín gena kídíe, pemíem pemílo menang yaneke. Bulu adi amonglo ngolum mon-goo bomla, yépol mooruk yiibe loteng, asoope tobomla ikai.

²⁰RUUTUMke ullennam ngoluke yékeng rojemteng, bulu umla, ngolum opín-buang kídí aralo kaabomna kaimang.

²¹E Edom lolang Ujlo duuna ami kídí, ashéla ngilmantola. Noluke lokom atung-arééyé pííyé. Nolukom amíl-amo araape annying yéku.

²²E Jayonke ome kídía! RUUTUM bí nolum mibo-minnompe, yagope yémomayé. Noluke adír longekom gíyin dakbong. Idola E Edomke ome kídía, noluke paab legape, nolumkom bí irééyé.