Read Alladian EJEKIEL 10 Bible Online

EJEKIEL 10 - Alladian bible

EJEKIEL 10

¹Ngo Sérubim kídí lokke dumpong kídí teyolo pírílna míílongem kaatoname, sapphir elíng lok pínam paleng kísanako míílong teyong delo kaato.

²Shédí bí asirna ege gena amidem, “Sérubim kídí delokke rumkíng lokke kelong kídar pénsam delo gílangka, delokke nok alag annyi delo bíínako guna mekolem delok laalangka. Delokrongem, luune delo mekol kídídem eljér goolangka,” emla poto. Ngo bím gídope kaato.

³Ami delokke gíangdo delo, Sérubim kídíde Kumkeng Ekum delokke kookdan delo dagdo, delo doomug alemko arangke ayaako deme bííbomto.

⁴RUUTUM ke angun-abée Sérubim delok lenla Kumkeng Ekum delokke eyab delo aalíkkai. Delo doomugde Kumkeng Ekum dem bííbomla, arang yangke ayaakode angunlok totong arang ito.

⁵Delo Sérubim kídílokke alap lapdudde Ralyayalumna Shédíke adudpe mando.

⁶Delo edílo RUUTUM bí asirna ege gena amidem kelong kídí pénsam delok mekollem laadope lulígtodín, amide gíala kelong kídí delokke akonlo dagato.

⁷Delo Sérubim akone agí alaglok bulukelo kana guna mekol delok anyongko laala, asirna ege gena ami delokke alaglo melíkto. Amide mekol dem laala gílentoku.

⁸Sérubim kídarde alap rumkílo tani alag kísaneke geyindo.

⁹Takame akam pakpe kaanam kelong appi koteng ngo kaato. De Sérubim miyoodelo ako dada abedelo kado. Kelong kídíde are kanarung Kirsolit elíng lokke asirnam kísa asirdo, delokke kelong miyoode akamsula, kelong aralo kelong kísape ido.

¹¹Edílo Sérubimde beleng yédín, bulu bilkup-billat sumape, buluke gípe míngkodanpe lekope gíyamdo.

¹²Buluke amíl, lamku, alap delokke kelong kídídem amig mílíe bííbomdo.

¹³Si kelong si, ngokke kerangpe kaatonam kaarí-kaanyo delo kaanam kísado.

¹⁴Sérubim miyoode migmo appiko gedo. Kerayalumde rubo migmoko, annyi nanade tani migmoko, angum nanade myomur mikmoko, delokke appi nanade pemí migmoko.

¹⁵(Bulu takam ngokke Kebar koronglo Sérubim kaanam kísa ido.) Edílo bulu asarlo gyangonyédí,

¹⁶delokke beleng yédín, kelong kídíde bulukíng belemíndo. Bulu yoppe emla alap kídíem taaya yémteng, kelong kídíde bulukíng lekope imín gedo.

¹⁷Edílo Sérubim kídíde tekíng dokudín, kelong kídí deteng tekído, delokke edílo Sérubim kídíde yopdodín, kelong kídíde bulukíng yopmín gedo, kapeila Sérubim delo buluke aide kato.

¹⁸Delokrongem, Kumkeng Ekum delokke eyab delok RUUTUM ke angun-abée gílenla, Sérubim teyo delo dagto.

¹⁹Bulu, buluke alap kídíem taayala, among delok, ngokke kaadungem, yoprepkai, delokke kelong kídí deteng bulukíng yopmín gekai. Delo bulu, Kumkeng Ekum delokke sanggodanke eyab teyodelo dakkai, delo Israelke Shédíke angun-abée buluke teyo delo kato.

²⁰Ngo bulum, ngokke Kebar koronglo, Israelke Shédíke rumkínglo kaanam Sérubim kísape kaado.

²¹Miyoode mikmo appi, alap appi, delokke tani alag kísa kaaname, alap miyoo rumkíng delo kado.

²²Buluke mikmo kídíde ngokke Kebar koronglo kaanam kísapakpe ido. Bulu takame jonnampe gído.