Read Alladian EJEKIEL 11 Bible Online

EJEKIEL 11 - Alladian bible

EJEKIEL 11

¹Shédíke Aide ngome jongonbomla Kumkeng Ekum lokke sanggodanke lamgédelo, ami kídíem ruutum pe yégebona Ajjurke oo Jaajaniah mela Benaiahke oo Pelatiahme, delokke amieke midum íying annyi kolang midum pilngoko kaato.

²Shédí ngome poto, “Tanike ue, si ami kídí si aimana ségueke rubosula luune so atímana agom luyileke pogobodung.

³Bulu sikepe pobodung, ‘Ekum kídíem modíku moodíe píínín kumangada. Luune si oying kengkeng dama kísanako, delokke ngolu delo ara delo keebumnam adín kísa idung.’

⁴Depeila bulum lupaknam kaalu agomem polangka. Tanike ue, kaalu agomem polangka.”

⁵Delo RUUTUM ke Aide ngokkíng aalangkula bí ngome sim podope lulígto: “RUUTUM bí sipe podung: E Israel kídía, noluke agom lunam kídí emlang aapílo míínam kídíem ngo kéndung.

⁶Nolu luune so deddína amiem mokala, sokke bedu-bedang takame simangpe bííyinkai.

⁷“Dekepeila Shédí ngo nolum sipe podung: Aroe, si luune si sikena dame, idola adín kídar si ingkue? Noluke mokatonam simang kídí simangía? Depeila, luune sok nolum ngo monpakyé.

⁸Nolu yoksem pesodunía? Iname noluke mirupe ngo yoksem bomayé.

⁹Ngo nolum luune delok monlenla, mibo-miyingke alag aralo ruulíkla nolum itung-iréyé.

¹⁰Israelke among rísulo ngo nolum kebang ibomla, mimaklo nolu siyínyé, delo nolu, ngo RUUTUM bí emla kényinsuyé.

¹¹Delo si luune si noluke legape damape imayé, delokke nolu dama delokke adínpe imayé. Ngokke kebangem, Israelke among rísulo baabomyé.

¹²Delo nolu ngome, ngo mino RUUTUM bí emla kényéku, kapeila nolu ngokke ayonem mesiibosumang, delokke ngokke lulígnam ludongpe igemang. Idola sok ayanpe, nolum dunggoobomna mibo-miying kídí lokke ségu-siyangpe nolu yémín gekai.”

¹³Dekepe ngokke kaalu-kangor agom podungem, Benaiahke oo Pelatiah bí sikai. Delo ngo migmue amongdanpe ila gubadola, ulo gogla poto, “E Ruutum Shédí, Israello turkína ami mipilem no mokakayin yénía?”

¹⁴RUUTUM ke agome ngokkíng pííto.

¹⁵Bí ngom sipe luto: “Tanike ue, supakke Jirusalemlo duuna kídíe nomlang, nokke edung-erang umnyoknam, delokke abíd-abíd umnyoknam Israel ami kídí teyolo sipe podung, ‘Bulu RUUTUM ke keralok mootengpe yédung. Sim among sim ngolum min yébomdope bitune.’

¹⁶“Dekepe emgalok, Shédíbí sipe podung emla lubi langka: Ngomino Israel ami kídíeme, among mooteng lokke mibo-miying opín takamlo monnyok líkne, delokke among moole tabulo pitgonglíkne. Idola buluke yényok gongko among kídílo, ngo buluke yédasukepe anyong oolko duuyé.

¹⁷“Depeila Shédíbí sipe podung emla polangka: Ngokke monnyok líkko mibo among kídí takamlok, ngo bulum laadum suyinyéku, delokke Israel amongem bulum biyéku.

¹⁸Bulu takam píílat suyin langkula, belumnam mimang kídí emlang ebínrupe kaanam moi-muang kídíem among sok laabín bínyin yéku.

¹⁹Ngo bulukelo aní aapí emlang aní aidem ruulíkyé. Ngo buluke líídung kísa tolna aapíem bulu kelok laabínla agom-aang tatna aapíem ruulíkyé.

²⁰Delo bulu ngokke agom luyilnam kídíemlang ayon kídíem aipakpe igeyéku.

²¹Idola séko bulu belumrunam moi-muangem, delokke mimangem kumsudune, buluke teyolo ngo itung-iréyé. Buluke deemana agér igang legape ngo bulum iréé-sinyo yéku. Sikepe Kedonyalumna RUUTUM ngo podung.”

²²Delo Sérubim kídíde alabe taalenla, kelong kídí delo lekope yopreptoku. Delo buluke teyodelo Israelke Shédíke angun-abée kato.

²³RUUTUM ke angun-abéde luune delok yoprep langkula, sanggodanke díítum teyodelo uato.

²⁴Shédíke Aidke kaarí-kaanyo delo, Aidde ngome horepbomla Babilonlo umnyokla duuna kídí aralo bomadokupe kaasuto. Delo ngokke kaarí-kaanyo kaanam dete nyokkaku.

²⁵Depe irodelo RUUTUM ke lengkannam kaarí-kaanyo legadem umnyokla duumonam kídí tabudem poyinbito.