Read Alladian EJEKIEL 14 Bible Online

EJEKIEL 14 - Alladian bible

EJEKIEL 14

¹RUUTUM ke míínamem kénpe emla Israel lokke miro ayoko ngome luposupe ngokkíng aato.

²Delo RUUTUM ke agome ngokkíng pííto.

³“Tanike ue, si ami kídar si, mimang kumkolo buluke aapí-aangem bisukai, delokke dekede bulume paab imokai. Ngokkelok bulu agom paayé emla míídunía?

⁴“Depeila bulum luposudola polangka: Ruutum Shédíbí sipe podung: Edílo Israel amikone agíke aapí-aanglo mimangem duumola paab kapala, kaaluna mirikolo, ngom matala gíyédí, delo RUUTUM ngo agísue bím poyansuyé.

⁵Buluke mimang kídí legape, ngom mepaksula ina Israel kídíke aapí-aangem, laalat sudokupe ngo sikesim iyé.

⁶“Dekepeila, Israel kídíem sikepe polangka: Ruutum Shédí bí sikepe podung: Míílat sulangkuka, noluke mimanglok gílat sulangkuka, delokke noluke belum-bekamruupe inam agér kídíem mepak langka.

⁷Edílo Israelkone demangkom, Israel aralo duuna mibokone, ngokkelok angupe ilen langkula, bíkke aapí-aanglo mimangem duumola, bíkke mikmo keralo tubesunana atímana atoem melíksula ipala, ngom íítape kaaluna mirikolo aayédí, delo RUUTUM ngo agísue bím poyansuyé.

⁸Bím ngo akmínsuyé, delokke amike lukeng-pokeng nanakope bím imoyé. Bíme ngokke ami kídí aralok ngo laabínyé. Delo ngomino RUUTUM bí emla no kényé.

⁹“Kaaluna mirikonem kaalu-kangor menam agomko pomotumílo, RUUTUM ngo dem amidem pomodung. Dem amidem ngo, Israel ami aralok nyokmoyé.

¹⁰Kaaluna miri delang bím íngkí lupona amide lekope ngokke ajéngem paabosuyé.

¹¹Sikepe imílo Israel ami kídíe ngokkelok mootepe yépit-yéyit goona, delokke bulu agí paablok agíem deemang-amo ilíksuyimayé. Bulu ngokke amipe iyé, delokke ngo buluke Shédípe iyé.” Sikepe Ruutum Shédí bí polendung.

¹²RUUTUM ke agome ngokkíng pííto:

¹³“Tanike ue, among yétakone ngom míngkesumape ila paab iyémílo, delo ngo agíke alagem yamtarbomla, buluke donam-tíínam paapeko bedangem itumla, ngo dírí-kenoem melígla, tanidak tarodak lekope nyokyinmoyé.

¹⁴Dekepe ibomko amodelo Noahlang Daniel,[3] delokke Job bulu midum angume duunamko kadokom, buluke agí deenam kootírsue, bulum petom mopítsuyé.” Sikepe Ruutum Shédí bí polendung.

¹⁵“Demangkom delo among yétadelo, ami kídíem rekka kayindope monkír kídíem ngo melíkla, bedu-bedalo amie gílayimadope igongko aralote,

¹⁶bulu midum angumde duunamko kamílokom, Ruutum Shédí ngokke, turna Shédípe idu tetedem, bulu midum angum dete buluke ome-oo kídíem mopít sulamayé. Bulu agísu petomem ipítsulayé, delokke de among yétade mooruk amongpe iyé.

¹⁷“Demangkom delo amodelo ngo midu-mimagem imola, atírumana mimak ekurange tanidak tarodak takamem petyinla idope ilíkla,

¹⁸dekepe idung aradelote si midum angum si duudakkom, buluke agí-agí yénam petom kékonlo, abíd ome-oo kídíemte bulu ipítlamayé. Ruutum Shédí ngokke turna Shédípe idutetedem, bulu agísu petomem ipít sulayé.

¹⁹“Demangkom delo amodelo ngo kilii-ramliem melíkla, ngokke marlínglok tanidak tarodak, deddína iyyiem lííla siyinmodope ido aralote,

²⁰Noahlang Daniel, delokke Job bulu delo amodelo duudo emdokom, Ruutum Shédí ngo turna Shédípe idutetedem, bulukom buluke ome-uem mopítlamayé. Buluke deenam kootírlok bulu agísu petomem mopít sulayé.”

²¹Kapeila Ruutum Shédíbí sikepe ludung: “Jirusalem teyolo, atírumana ajéng appiko ngo ilíkla; midu-mimagem, dírí-kenoem, monkír kídíem, delokke kilii-ramliem, tanidak tarodak, nyokyin modope imoyé.

²²Dekepe igongko aralote agíke ome-uem ipísula singong-sisong amie ayoko kayémílo, edílo dekede nok keralo aayédí, buluke yédu-yétok ségu-siyang kídíem kaala, edítko bulu atímana amipe ila sikena itung-iréem panggído, delokke Jirusalem teyolo ngokke adír langaanamde ibado, emla no kaala mííyé.

²³Delokke ngokke ato-siro inam takamde iperuunam igíng rungko emla no kaala, nok aapíe eetetyéku.” Ruutum Shédíbí sikepe polendung.