Read Alladian EJEKIEL 18 Bible Online

EJEKIEL 18 - Alladian bible

EJEKIEL 18

¹RUUTUM ke agome ngokkíng pííto:

²“Israel amolo ami kídar lokke sikepe ngiitom porung agom potínam si ingkuedí? “ ‘Ane-abu kídíe kuuna onggurem doto. Idola ome-oo kídíke iipange iikumkai.’

³“Ruutum Shédí bí sipe polendung: Ngokke turna Shédípe idu tetedem, sim ngiitom porung agom sim Israel kídí aralo edílokom pobosuyimayé.

⁴Kapeila turna mipil aidde ngokke. Ane-abuke aid delang koo aidde, takamde ngokke. Ingkona aide paab itodí, de aidde sisuyé.

⁵“Jonnampe yésula, aina amipe ila deena amiko kado emmílo,

⁶bí Israel kídíke uyu mimang kídíem kumsumape, demangkom lutum bomnam kumkeng ekum kídílo ipak ilíknam ato-siroem doma-tíímape ila, akonke mimem deemang-amo ibosumape, demangkom deemang kodang moodílo ibbo-dobosula imape,

⁷bí amiem yatgoola imape, demangkom línggoola imape, bíkke narpoonamem ai-kampope dordíem dorlangkula, kenonem donam bisula, amíl araanem ege-galuk bisula,

⁸bí paapek paatemdope amiem abalem edope bila imape, bí atímana agérem ilíína amikope imape, kelíng-kebang lote raada-pénsam pakpe agom-aangem lubila ina amiko kayémílo,

⁹dekena amide ngok lulígem tatne, delokke ngok ayonem atelkote mepakmape igene. Dekena amide deene, delokke bí turyé.” Sikepe Ruutum Shédí bí polendung.

¹⁰“Dekena deena amide, ooko yagorupe migu-miyakla, mikírla amiem paka-níkkakolo yétígoola,

¹¹bík abue dekena agér atí imatuakom, de koode lutumnam kumkeng ekum kídílo ipak inam ato-siroem dogoola, akonke mimem deemang-amo ibosugoola,

¹²opan-arénem yattígoola, líítígoola, untape lanamem bilat suyimape, mibo amike kumpomlo gígoola belumnam mimang kídíem kumsugoola,

¹³paapek kadope abal edo bila itígoona, dekenako kado emmílo de oode turyénía? Ma, bí turmayé. Sikena belumnam agér takamem bí itígong kolok bí siyérung. Bíkke sinam daide bíkke dumpong teyolo kasuyé.

¹⁴“Sikena milí-hodong oo si, ookonko kayon remé sudo emmílo, delokke de oode abu lokke paab agér inam tabungem kaayin-kényin dolate, abu yékampe yémape,

¹⁵Israel kídíke uyu mimang kumkolo kummín gemape, demangkom lutumnam kumkeng ekum kídílo ipak inam ato-siroem dogo-tínggoomape, akonke mimem deemang-amo ibosumape yéla,

¹⁶demangkom amikonem itung-iréla imape ila, línggoomape dengompe yésula, edo narla untape menamem agíke supe mesumape bilangkula, keno-aréénem donam bila amíl araanem ege-galuk bila,

¹⁷atímana agérem ilíímape ila, paapek kadope amilo abal edo bila imape, ngokke lulígnam takamem tatbila, delokke ngokke ayonem atelkote mepakmape igela ina oode, bíkke abue paab mílílo itígootuakom, de oode abu paab legape simayé. Idola bí turyé.

¹⁸Idola bík abude yattígoola líítígoola, ami takam teyolo paab agér mílílo itígoona bí, agíke paab legape arorupe siyé.

¹⁹“Idola nolu sikepe íngkídung: ‘Abuke paab inam daieme oode kape gebosumayén?’ De oode raadang pénsam aapí gela, ingkoedí aine, dekeme ila, ngokke ayonem bí atelkote mepakmape aipakpe igap gekolok bí turyé. Bí abuke daiem gebosumayé.

²⁰Paab itína aidsudemin agíke isutonam paab legape sisuyéne. Abu dekom oo delokke dai paabem gebosumayé. Deena amike deena agérde bík teyolo amanpe isuyé, delokke atímanake atímana agérde bík teyolo ajéngpe isuyé.

²¹Idola atímana amide bíkke atímanam agér inam tabulok aapí míílat sulangkula, ngokke ayon kídíem aipakpe atelkote mepakmape igap langkula, ingkuedí aroe delokke deene, dekeme matala igeyékumílo bí sikumape arorupe turyéku.

²²Bíkke imemnam kídí lokke atelkokom bík teyolo edo sanket líkyimayé. Bíkke deena agér gérkunam legape bí turla yéyéku.”

²³Ruutum Shédí bí sikepe íngkídung: “Atímana ami sinamlo ngo ashébomdunía? Ma, delok ayanpe buluke atímana bedalok míílat sulangkula, ngokkíng aalangkula buluke turkunam demmin ngo erbom duune.”

²⁴“Idola deena amikone bíkke deena bedalok gísumape paab ilangkula, atímana amike itonam belumnam aimana agér ikumílo bí turyénía? Bíkke deenam agér ituanam kídí lokke atelkokom míngge yimayé. Bíkke aipe míngkesula yékumanam dai legapelang bíkke paab agér ikunam ajéng legape bí siyérungku.

²⁵“Idola nolu sikep ludung: ‘RUUTUM ke inam si aimang.’ E Israel ami kídía, tatgaplangka. Ngokke inam kídísi aimanía? Noluke inam kídísia aine? Noluke dena aimane.

²⁶Deena amikone deena bedalok gíkumape paab iyékumílo, bí siyé. Bíkke paab agér ikunam legape bí sisuyéku.

²⁷Idola atímana amikone bíkke atímana agér ikolok bí aapí míílat sulangkula aina bedang loklang deena bedalok bí yéyékumílo, bí agíke yénamem mopítsuyéku.

²⁸Kapeila bí agísue kerangke atímanam agér itonam kídíem míngíng sulangkula, atírumape míísu langkula paab iyimangkai. Depe bíkke ikunam legape bí sikumayé. Bí turyéku.

²⁹Depeilate Israel ami kídíe sikepe luduteteng: ‘RUUTUM ke inam si aimang.’ E Israel ngok inam kídarsi aimadunía? Noluke inam kídar demin aimadune.

³⁰“Depeila Ruutum Shédí ngo Israel kídí nolum podung: Noluke mipil-miyongke ségu-ségupe ngo mipil nolum kebang lubomyé. Míílat sulangkuka. Noluke atímape inam agér kídí delok menape gílat sulangkuka. Depe ikumílo noluke paab kídíde nolum oletmokuna atope ikumayé.

³¹Noluke imemnam tabudem menape mepak sulangka. Aní aid emlang aní aapíem gelangkuka. E Israel kídía, kape nolu emmumpe sipene?”

³²Ruutum Shédí bí sipe podung: “Arope míílat sulangkula turlangkuka, kapeila ngo séko memkom nyokmo límang.”