Read Alladian EJEKIEL 19 Bible Online

EJEKIEL 19 - Alladian bible

EJEKIEL 19

¹“Israelke roja oo annyi legape pengé sim lubi langka,” emla RUUTUM bí ngome lulígto:

²“Myomur simyo myobo kídí aralo, nonyike anede kape kísana myonekuai! Myomur simyo myobo aralo, bí agíke oo kídíem usaato.

³Bí ookondem airupe isaala, de ralnarung myomur simyokope ikai. Bí geta-bomta goonamem airupe iyilsula taniem donamem kénkai.

⁴Opín-buang kídíe bík legangem tatla, buluke arung koonamlo bím umto. Bulu bíme rakéélok kéébomla, Ijipt amolo gíboto.

⁵“De myomur simyo myonede, bík míínamem ipíng mangkai emla kaala, bí bíkke ookonem, ralnarung myomur simyo konpe isaatoku.

⁶Bí miga-miram aloola, myomur simyo kídí aralo, magoo-yilola igoto. Bíte geta-bomta goonamem iyilsula, taniem rekla dolento.

⁷Bí buluke líísak etor kídíem dírpak goola, buluke doolung kídíem lííruk biyin gooto. Asi amongelang delo duuna ami kídíe, bíkke ngírnamem pesola dan-geto.

⁸Delo, dei-degong amongke opín-buang kídíe, mirolpe bím rolabomto. Bulu, bík legape songkit kitla, bímte buluke aarunglo umto.

⁹Bulu rakéélok kéésat langkula, arem petíl aralo bím tumla, Babilon roja kelo bíme bomato. Delo bulu, bíme pateklo líkla, depe irongem bík ugdudem, Israelke díítum kídílo tayyimaato.

¹⁰“Nokke anede asi robelo díínam, onggur ane kísanakuai. De ayéem bojépe ééla aag mílí ituai, kapeila asie bojépe katuai.

¹¹Delokke aag kídíde yagorupe toltuai, de roja banggénpe ibatuai. De onggur anede yagorupe anne kala, aage ila, takame kaayindope, telokkai kedonruupe sisaatuai.

¹²Idola deme marbomna kídíke alage, appír daadiemte butaksula, amolo yoplettoku. Sanggodanke ereena asare deme sanmola, ayé kídíemte oyinletmoto. Agídak, aag-arakdak, de sanlangkula eme guka kayintoku.

¹³Supak deme ereena asi kamangko, yépol mooruk amolo lelíktungku.

¹⁴Emede aagdang kolok gulenla, aag kídíem gula, ayé kídílope gukut kutyinto. Supak delo tolla edíína aag kayimang, delokke roja banggénpete ibapenam kayimang. “Si pengé miriko, delokke sime pengé mirirupe luyar bompe aido.”