Read Alladian EJEKIEL 20 Bible Online

EJEKIEL 20 - Alladian bible

EJEKIEL 20

¹Mibo amolo duunyokdo dítak lokke dítak kíníd lokke poolo pilngo lokke looyingnana longe delo, Israel lokke miro ami ayoko ngokkíng aala, RUUTUM ke míínamem íngkíkape emla ngok keralo duungato.

²Delo RUUTUM ke agome ngokkíng pííto:

³“Tanike ue, Israel kídíke miro kídíem Ruutum Shédí bí sikepe podung emla polangka: ‘Nolu ngom íngkíkape aadunía? Ngokke turna Shédípe idutetedelo ngome íngkídope, nolume ngo imomayé. Ruutum Shédí ngo polendung.’

⁴“No bulume kebang lubiyén? Tanike ue, no bulum kebang lubiyén? Lubi pemílo buluke neku-buku kídíke belumrupe ségu-siang inam kídíem lupalangka.

⁵Ruutum Shédí bí sipe podung emla bulum polangka: ‘Ngokke Israelme ullendo longe delo Israel erangme ngo alage leedusula pésula, Ijipt amolo ngo lengkansuto. Alage leedusula bulume, “Ngomin RUUTUM noluke Shédí bí,” emla popato.

⁶Delo longe delo ngo, among takam lokke kampoyalumna amongpe ina, ingko amolodí gakíre lang ngullange biidudí, dekena ngokke matala irunam amonglo, ngo bulum bomayé emla togesuto.

⁷Delo bulum ngo, “Mipil noluke kaabonam belumnam mimang kídíem mepak- langka, delokke Ijipt amolokke mimang kídílo nolu deemape ibo sumapeka. Ngomin RUUTUM noluke Shédí bí,” emla pokanto.

⁸Idola bulu ngok mirolpe rollento, delokke ngok agom-aangem tatmato. Buluke kaabonam belumnam mimang kídíem bulu ipaksumato, delokke Ijipt amolokke mimang kídíem bulu mepak sumato. Depeila buluke teyolo ngokke aklíng-marlíngem ilíkla Ijipt amodeloi, buluke teyolo ngok marnamem ilíkpe mííto.

⁹Idola depe ngo imato. Kapeila depe imílo, de agér kídíde ngom atímana amín kamoyé, legade buluke duubí-duuyél bosunam Ijipt ami kídí tatkolote ngo bulume Ijipt amolok gílen boyéku, emla Israel amiem popato.

¹⁰“ ‘Depeila ngo bulume Ijipt amolok gílen bolangkula, yépol amolo gíboto.

¹¹Delo ngokke ngiitomem, delokke aipakpe igena kídíke turnam pangkeng ngokke ayon kídíem, ngo bulum luyilboto.

¹²RUUTUM ngomino bulume deemone emla, bulu míípa suyardope ngokkelang buluke pénsamlo daapong ibosunamke iyodpe Sabbath longeme nyolangka emla iyodkope leeto.

¹³Idola Israel ami kídíde yépol mooruk among delote ngokke mirolpe ito. Bulu ngokke ayonem betto, delokke ngokke lulígem tatmato. Dem lulígnam kídídem aipe igapna mipil-miyoolo turname kadungai, idola dekem bulu tatmape ngokke Sabbath binamem bulu deemamoto. Depeila yépol among delo ngokke marnamem bulu kéndope, delokke bulum nyokdope emla ngo míítuai.

¹⁴Idola ngo imato. Kapeila dekepe imílo bulume Ijipt amolok ngokke gílen bokunamem kaana mibo-miying ami kídí aralo, ngokke amíne loorímayé.

¹⁵Depeila miremna, ardana, kampo yalumna, ngokke bulum binam amodelo bulum, ngo bomang kupomayé, emla yépol amodelo ngo pésuto.

¹⁶Ngokke lulígem tatmape, ngokke ayonem igemanam legape, Sabbath em deemang monam legape, delokke deke ayanpe buluke uyu mimanglo buluke aapí-aange olíknam legape, ngo dem pésudem ito.

¹⁷“ ‘Idola ngo bulum ayang kaapalangkula yépol amodelo bulum moka kayin madope ngo míítoku.

¹⁸Delok ayanpe ngo buluke ome-oo kídíeme sim lutornam sim luto: Noluke neku-buku kídíke ayonem bommapeka, buluke idongem nolu imín gemapeka, delokke buluke mimang kídílo nolu deemang-amo iketsulík mapeka.

¹⁹Ngomino RUUTUM noluke Shédí bí. Ngokke idong lulígnam emlang ngokke ayon kídí takamem aipakpe igaplangka.

²⁰Ngokke Sabbath longedem deena longepe nyolangka. Kapeila de longede nolukela ngokke pénsamlo kangkén supenam iyode, delokke teyolo ngo RUUTUM noluke Shédí bí emla nolum mínggemoyé.

²¹“ ‘Idola delokke ome-oo kídí dete ngokke agom-aang tatmape ito. Bulum turnam bipena ngokke ayon kídí, delokke ngokke lulígnam kídíem bulu igemape mepakto. Bulu Sabbath em deemamoto. Depeila yépol amo delo ngokke marnamem bulu kaasula, bulum simodope emla ngo míítuai.

²²Idola dem ngo imato. Kapeila dekepe imílo, ngokke bulum Ijipt amolok laalenkuko mibo-miying ami kídí aralo, ngokke amíne loorímanape gíyé.

²³Depeila ngo yépol amodelo angukon ségupe pésutoku. Bulume tani amongke rego mipílo monnyokgoola, duunyok goomoyé, emla ngo pésutoku.

²⁴Ngo dekepe mííla ito, kapeila ngok lulígem bulu tatmato, ngok ayonem bulu mepakto, Sabbath em bulu deemamoto, delok teyolo buluke neku-bukuke kumnam mimang kídíem bulu kumsuto.

²⁵“ ‘Depe itíkolok ngo bulum aimana ayoneke pobila, delokke turnam bimana idongeke bito.

²⁶Buluke agí ipak-saamo sulo bulum ngo deemamoto, delokke buluke oge yalumnam oo kídíeme ipakpe iyinsumoto. Ngomin RUUTUM bí emla bulum lengkandope dekepe ngo bulum itung-iréto.’ ”

²⁷“Depeila E tanike ue, Ruutum Shédí ngo Israel kídíeme íngko kodí podune, deme bulume no pobilangka. Sikepekom, ngom mepaksula buluke neku-buku kídíe ngome ipusilééto:

²⁸Edílo ngokke biyé emla togesunam asi amolo ngo bulum bomatokudí, delo bulu kedonna díítum kídíem kaala, rotne esing kídíem kaala, deke delo bulu ipak igoola, arí namponem romgoola, asi-apongem amanpe bigoola ngom yagorupe marmoto.

²⁹Delo ngo bulum íngkíto: ‘Noluke kumpomlo gínamde íngkueda?’ (Silo loope deme Bamah[4] emdung.)

³⁰“Dekepeila ngokke ponam sim Israel kídíem polangka: Noluke neku-buku kídarke ayonpe, akampakpe paabem ila, buluke mimang kídarke méélamlo dugmín geyénía?

³¹Silolope nolu aman atelem bila, emelo noluke ome-uem romlíkla, akampakna uyu mimanglo ipak ila, nolu agíem deemang-amo ilíksudung. Dekepe ipala Israel nolu ngokkíng aalangkula ngok míínamem íngkídung. Turna Shédípe, Ruutum Shédí ngokke idutete delo, ngok legangem nolum ngo íímoyimayé.

³²Nolu sikepe míídung, ‘Tani amongke abíd opín-buang kísa, esing emla elíngem kumla yénape ngolukom ipe.’ Idola noluke míínam kídíde edílokom apíí mayé.”

³³“Turna Shédípe Ruutum Shédí ngo ila turdutete delo, ngokke lakbíng ralnamkíng, noluke teyolo yéboyé, delokke ngokke alage yamtardola ngokke aklí-marlínglok noluke teyolo ruubomyé.

³⁴Noluk teyolo ngo yagorupe aklíng lenla, ngokke alage yamtardola, ngokke lakbíng ralnamlok ingko-ingkona among kídílodí nolum yépit-yéyit goomotone, deke kídí opín-buang tabulok laadum suyinyéku.

³⁵Depe irongem nolum ngo, Opín kídíke Yépol Among, delo migmue geríksula kebang lubomla ajéng ibomyéku.

³⁶Ruutum Shédí ngo sipe polendung: Noluke neku-buku kídíem kape kísape Ijipt lokke yépol amolo, ngo kebang ibomla ajéng itodí, deke kísape ngo nolumkom kebang ibomla ajéng iyé.

³⁷Ngokke banggén rumkílo noluke gíyém, ngo nolum sapla kaabomyé, delokke daapong ayonem igedope nolum imoyé.

³⁸Séko buludí ngok mirolpe rollenyéne, bulume ngo laapakyé. Dekepe ikupena ami kídíde supage mibo amilo duula, deke delok ngo bulum laadum sudokukom, bulu Israel amolo ale tuamayé. Delomin RUUTUM bí ngo emla nolu kényin yéne.

³⁹“Ruutum Shédí bí sipe podung: E Israel ami kídía! Mipil-miyoope nolu gíla, noluke mimang kídíem agér ibitokala. Idola nolu sim kénsu langka, noluke dekepe irongem nolu ngokke agomem tatkupe aiyé, delokke noluke mimang kídílo aman bombila, ngokke deena amínem belumdope deemape imokumayé.

⁴⁰Kapeila Israelke gaiyalumna dííte, ngokke deena díítelo, Israel daadi takame ngome agér ibiyé. Delo ngo bulum toríksuyé emla Ruutum Shédí bí polendung. Delo ngo noluke deena ipagem, noluke aman kídíem, delokke noluke ali-ayé len-gena amanem mííyé.

⁴¹Noluke yépit-yéyit gongko among kídílok nolum goodumsula dekena kídí amonglok, ngokke nolum laayin lenrongkuem noluke romnam aman kídíeme ngo toríksuyéku, delo mibo-miying ami takame ngokke deenamem kaapayé.

⁴²Noluke neku-buku kídílo biyé emla ngokke togesunam among delo edílo ngo nolum laayin aayékudí, delo RUUTUM bí ngo emla nolu kényinyé.

⁴³Delo noluke belumrupe agér inam kídí takamem, delokke noluke deemang-amope igongnam kídíem nolu míípa suyinyéku. Noluke atímana agér itonam kídí legape nolu belumrupe mííyin suyéku.

⁴⁴Ngokke amínem mesiisunam legape, edílo ngo agér gérrep yédí, delo nolu RUUTUM bí ngo emla kényinyéku. Kapeila noluke atírumana, deemaruna, ajéng iperunam ségu kídíem kaalate, noluke ségulok ngo imayé.”

⁴⁵RUUTUM ke agome ngokkíng pííto:

⁴⁶“Tanike ue, no sokkodanpe migmue ila, sokkodanke mirupe agom ngiitom lula, sokkoke moonam kídí mirupe kaalu agomem lulangka.

⁴⁷RUUTUM ke lunam agom sim sokkodanke moonamem lupa bilangka. Ruutum Shédíbí sikepe ludung: Kaatola, ngo supak noluke teyo delo eme rílíkyé. De emede ereena emla yayina esing kídí takamem gukutyé. Telokkai írna eme meyode miyyimayé. De sokkodanlok gusala línggíng danlo guyé, delokke mipil-miyonge delokke pamkiem paayé.

⁴⁸Sékote imit layimanam emedem RUUTUM ngo rílíkto emla mipil-miyonge kaayinyé.”

⁴⁹Delo ngo poto, “E Ruutum Shédí, ami kídarsi ngome, ‘Bí luyiisunam ngiitom ekemin podune,’ emla podung.”