Read Alladian EJEKIEL 22 Bible Online

EJEKIEL 22 - Alladian bible

EJEKIEL 22

¹RUUTUM ke agome ngokkíng pííto:

²“Moka-níkka mílípe itína luune doolung sim no íngkí-bengkíyén? Bíkke belumruupe agér inam takamem bíme pobeng bilangka.

³Ruutum Shédí ngokke lunamem luune doolungdem pobilangka: No deddína agí amiem mokasunam legape, delokke uyu mimangem kumsunam legape nokke yérí longe píngkai.

⁴Nokke paka-níkka gootínam legape no atímangkai, delokke no agí alaglok písunam mimangem kumsula agíem deemang aloomokai. Depeila nokke longe píngkai, delokke nokke yéyindíe angkai. Sok legape ngo nome opín-buang takamke ngilpu-ngilléla, lué-luléla ikepe imoto.

⁵Ayonlok yéyimanam legape anín kelang mootenglo duuna asi-among takame nome ngilpu-ngilléla ikai.

⁶Kapeila Israelke miro kídí tabude agí-agí ralnamem míngkímsula, ami petgong kolo erap alongkai.

⁷Luune doolung delo sékote agíke edung-erangke agom-aang tatbosuna kaimang. Mibo amiem nolu yatdung. Mime-meyéng emlang ane-abu kaimana ome-oo teyolo nolu ipusiléédung.

⁸No ngokke deena moolop kídíem ansula, míngge-sagge kaimang, delokke Sabbath emteng nyoyimang.

⁹Nokke ami kídí ayokone moka-níkka goodope, menam agomlo lutígoodung. Ayokone díítelo ipak ilíktonam adínem dogola notii agér igodung.

¹⁰Ayokone agí abuke mimem ketbosula, ayokone dormo ayonlok deemape hannam koodang moodílo mimeme ibbo-dobosula,

¹¹abír-ayo ibosula, ayokone agíke nyamengem, delokke bírme penem deemang-amo igoobosula,

¹²nokke ayokon amie abal legape ami mokagoola, edo abal biko teyolo unta lutemla, angukon Israel amilo dekepeila mirem goola ngome kénsuyimang.” Sikepe Ruutum Shédí bí polendung.

¹³“Noluke aimape paapek paatígoola, noluke gooralo iyyi líítí mínsunam legape, ngokke alage laktumdola nolum dííyé.

¹⁴Noluke aapí edíngde duuyaryénía? Ngokke nolum dekepe iyém, noluke alage tolya sulayénía? RUUTUM ngo ludung, delokke dekepe arope iyé.

¹⁵Ngo nolume mibo opín takamlo, delokke among takamke rego mipílo monpit-monyityé. Noluke deemang-amoem ngo kaimadope iyé.

¹⁶Edílo ngo nolume mibo amolo yépit-yéyit moyédí, RUUTUM bí ngo emla nolu kényinyé.”

¹⁷RUUTUM ke agome ngokkíng pííto:

¹⁸“Tanike ue, Israel ami kídíde, ngok keralo agér atí bimana amipe ikai. Baldínem mepomlok yolbínrongem, hoyél-hosélsula doona arem, tam, pakrang delokke bogitam kísana amipe bulu iyinkai.

¹⁹Depeila Ruutum Shédí ngo bulum ludung: Bulu atí agér bimana are kaimana amipe iyinkai.

²⁰Depeila kapekísa rombínko mepomlo arem kídíem, tam kídíem, pagrang kídíem, delokke bogitam kídíem yoplíkdudí, delok kísape ngo bulum takam Jirusalemlo laayin aayé. Delo kapekísa ato kídardem yolmodudí, deke kísape ngokke aklíng-marlínglok bulum takam yolmoyé.

²¹Aroe, bulum takam ngo Jirusalemlo laadum suyinpala, buluk rumkílo eme parlíkla, ngokke marnam loge bulume yoldope iyé.

²²Kapekísa baldínem yoldudí, dekekísa bulume eme gupom Jirusalemlo yolyinmoyé. Delomin bulu RUUTUM ke marnamem pangkai emla kényin suyéne.”

²³RUUTUM ke agome ngokkíng píítoku:

²⁴“Tanike ue, Israel kídíem sipe lulangka: Noluke amode deeyi berok yimang, depeila ngo, aklíngla amongdem itung-irélenyé.

²⁵Doolung miro kídíe rekkanam simang teyolo uugmínsuna myomur simyo kísa ila, ami kídíem mokagoola, deke delokke ekurang, abal kídíem lííla, deddína mimeme meyéngpe iyinmokai.

²⁶Miri kídídete dormo ayonlok yéyimape, ngokke deena ato kídíem atí-sirí kopeteng mííyimang. Bulu deena-deemangem kangu-kaara suyimang. Bulu deena ato-siro emlang deemana ato-siroem kaapan sudope luyil yimang, delok teyolo bulu Sabbath longemte nyoyimang. Dekepe ikolok Israel ami kídíe ngome aang oge yimang.

²⁷Rekkanam simoneme puké-puyéla, dopan-doransuna sipyang pyabaam kísa among ruutum kídíete ikai. Bulu miremdope ami mokagoodung.

²⁸Líísak etorem suunlok molkap peenam kísa, dekena paab kídíem kaaluna miri kídíete rumnyokdung. Buluke kaarí-kaanyo kaanam kídí dete menam mílíe, delokke kaalu-kangor agom kídar dete yatna agom mílíe. Ruutum Shédíbí ngolukíng podung emdung, idola ngo bulukíng agom polík mangai.

²⁹Ami kídíe yatgoola, línggoola itígoodung. Bulu opan aréénem ipusilééla, mibo-miying kídíem mílo-hakpo ilum-míílumla idung.

³⁰“Ngokkelang buluke pénsamlo, etorko torké bidope, delokke ami kídíkepe pénsam raadape dakbila, ngo ami kídídem nyokmo madope ibopena amiko matalate maramsuto.

³¹Depeila buluke teyolo ngok marnamem melíkyé. Buluke atímana agér igape, ngok marnamde emepe bulum guka kayinyé.” Ruutum Shédí bí sipe lulendung.