Read Alladian EJEKIEL 24 Bible Online

EJEKIEL 24 - Alladian bible

EJEKIEL 24

¹Dítak konang lokke poolo íying lokke looyingnana delo, RUUTUM ke agome ngokkíng pííto:

²“Tanike ue, siloke longe sim no atsilangka, kapeila siloke longe so Babilonke roje, Jirusalemme mimak iyabomkai.

³Ngokke mirol ami kídíem sim, Ruutum Shédí ngokke luyiisunam ngiitom sim lubilangka: “Peking deme líísiklo atlíkla, delo asiem bíídope purlíklangka.

⁴Peking delo gairuna adín tarongem keelíklangka. Laktík adín emlang letík adínem, delokke along remyakna kídíemte, keeyél sulíklangka.

⁵Gaiyalumna mér adínlok keelangka; peking rumkíng delo esingem replík langka. Delokke eme parlíkla adíndak alongdak nyudope keelangka.

⁶“Ruutum Shédí bí sikepe podung: Pettígoona doolung luunede ankang aloosuyé. De luunede arbín kímanam, akang alempe ina peking kísanako. Adíndem alop-alop laalenla atel koteng kaimang.

⁷Kapeila luune delo mokanam iyyidem kédénglo olík momatung. Depe ituamílo kédéng aralo rumnyokyai. Delok ayanpe lííreng teyong kolo deme doojéngmoto.

⁸Iyyidem nyokmomadope, edorayan sudokupe, delokke marlíng madope ngo lííre delo doojéngmoto.”

⁹“Ruutum Shédí bí sikepe podung: Pettígoona doolung luunede ankang aloosuyé. Ngo agísue eme parnana esing kídídem replíkyé.

¹⁰Esingem bojéko langaato! Ememe muddorlíkto! Adín kídídem keenyuto! Mosolang kídíemte itemlíkto! Along kídíeme gukutmoto!

¹¹Depe irodelo araana pekingdemte mekol írna teyolo melígla yalí líísi idope gumotoka. Depe imílo, peking delokke deemang akang takamem gukut rongkuem, dormo ayonlok deeyéku.

¹²Idola depe inam takamde agérlo aayimang, kapeila eme lokteng deemang akang kídídem gukut layimayé.

¹³Kapeila nokke abír-ayo agérde nome deemamoto. Ngo nome deemodope ikílate no deema dadakai. Ngokke aklíng-marlíngem no pangkumatete deloope no deengkumayé.

¹⁴Ruutum Shédí ngo agomem poto. Ngokke agér idíe píngkai. Ngo imape imayé. Ngo emmumpe ayang yimayé, delokke ngo bursukokom kakumayé. Ngokke agér itonam ségu-siape nom ngo itung-iréyéku.” Ruutum Shédí bí polendung.

¹⁵RUUTUM ke agome ngokkíng pííto:

¹⁶“Tanike ua, nokke mííbosunam amidem lakbíng kítnam atellok ngo laabínyé. Idola no ankíla, kapla-rííla imapeka.

¹⁷No adud kamadope kaplangka, idola sinakepe yagorupe ankí-keno mapeka. Nokke ege-dumlubem edíípe ngotlík sulangka, delokke leyug gemape, leraape gímapeka. Nokke migmoem polumsula, demangkom gíímanake donam dokampe dola imapeka.”

¹⁸Rodan deme ngo ami kídíem pobosuto, yumedan dem ngok mimede sikai, delokke ngom lulígnam tuubupe ngo ito.

¹⁹Ngokke depe inamem kaala, ami kídíe ngome, “No kape dekepe idun? Ngolukelo legangko katak sudunía?” emla íído.

²⁰Delo ngo ami kídíem poto, “RUUTUM ke agome ngokkíng pííla ngome sipe podo:

²¹No Israel kídílo ‘Ruutum Shédí bí sipe ludung emla lubi langka: Nolu Kumkeng Ekum delokke ralnamdem míngkím subomdung. Nolu deme kaalísudung, delokke gairupe míísudung. Idola deme deemamoyé. Noluke Jirusalem delo ome-oo turna kídíem mimaklo siyin moyé.

²²Delo Ejekiel bí kape kísa itodí, dekepe nolukom iyéku. Nolu mikmo polumsumape, gíímangnake donam dokampe domayé.

²³Noluke dumelem dumpolo gela alelo leyugem gela, ankí-kenomape kapla-rííla imape iyé. Idola noluke paab legape nolu yaayinyé, delokke ulo-ayai emla noluk arasulo lutíbosuyé.

²⁴Delo Ejekiel bí noluke iyod kangkeng kope iyé. Kapeila bíkke ikam pakpe nolu iyinyéku. Edílo dekepe iyékudí, delo Ruutum Shédí bí ngo emla nolu takame kényinyé.’

²⁵“Delokke tanike ue, ingkona longelodí, ngo buluke aralok Kumkeng Ekum ralnamdem, buluke ashédem, buluke kaalíng bomnamdem laabínyédí,

²⁶delo longe delo mimaklok dugnyokgena amiko aala nolum legangem pokanbiyé.

²⁷Delo longe delo noluke adud-ayud agom lumape inam ségue kaimape, noluke nappang kídíe kokala bulum agom luríksuyé. Depeila Ejekiel no, buluke kangkolo iyodkope iyé, delokke ami kídíe RUUTUM bí ngo emla kényinyéku.”