Read Alladian EJEKIEL 26 Bible Online

EJEKIEL 26 - Alladian bible

EJEKIEL 26

¹Dítak íying kolang atel lokke poolo delokke kerayalum longe delo RUUTUM ke agome ngokkíng pííto:

²“Tanike ue, Turbí Jirusalemme, ‘Opín takamke yapgoe oletkai, bíkke eyab kídíe ngok legape oyayayin bikai, delokke bí supak kumruk doolungpe ikai, iname ngo supak lokke miremyéku, airudo!’ emla pokolok,

³Turke teyolo Ruutum Shédí bí sipe ludung: Tur nok teyolo ngo kangkikai. Nome mimak iyabomdope deddína opínem ngo langaayé. Dekede siyéng asie kapekísa agíke siparem taamodudí, dekepe iyé.

⁴Bulu Turke yapgo kídíem bényé. Bíkke língkum ekum kídíem bénletyé. Ngo bíkke béntung-bényungna elíng doona kídíem tíkut-tílutla atí kaimana, lííreng mílína kísape imoyé.

⁵Bí siyéng asi aranglo doolangkula, amike esap kuupompe iyéku. Ruutum Shédí ngo lulendung. Bí opín-buang takamke língkepe iyéku.

⁶De ami kídíde moopí aralo duuna bíkke ami kídíem yoksalok moka kayinyé. Delo bulu, RUUTUM bí ngo emla kényéku.

⁷“Ruutum Shédí bí sikepe ludung: Turme mimakpe iyadope, ngo takamke roja, Babilon lokke roja Nebukadnejjarme langaayé. Bí línggíngdan telok sanam yimanam maglíngem, guré gaari kídí emlang guré sipaying kídíem aabola Turme mimak iyabomyé.

⁸Turke moopí amolo duuna doolung takamke amie mimak ila siyinyé. Miru kídíde arung koola, yapgo mola buluke tamteme nolukíng tamkap aabomyé.

⁹Bíkke yapgo tuptírnamem bomala, noluke yapgo kídíem, líísak etor kídíem delokke noluke kedonna líísak ekum kídíem bénbomyém.

¹⁰Bíkke guré kídíde sanamyimape aabomla, buluke pemuge nolum ungkap bomyé. Líísak etorem bénla, ami aabomnam kísape, edílo bí noluke yapgo kídí delo pííyédí, delo bíkke mimak guré dugdude, gaari adude yagorupe muula nokke líísak etor kídíde, adud kídar deloge petírgela belenggeyé.

¹¹Guré kídí lokke arem lepyo kídíde, noluke doolung bedang takamem tuang bomyé. Noluke ami kídíem bí yoksalok pakala, noluke edííruna elíng gaang kídíde amolo oletyinyé.

¹²Bulu noluke gaina sérang kídíem lííla, noluk líísak etor kídíem bénla, gai-gaina ekum kídíem bényinla, língkum elíng kídíem pyapan-pyaransula, siipang kídíem yoppan-yopransula, deke takamem siyéng asilo elyinlíkyé.

¹³Ngo noluke miri-bari adud kídíem kamoyimayé, delokke harp tapung muudud kídíem nyokyinmoyé.

¹⁴Esap kuuna kídíe esabem loreepompe idope, ngo Tur nome pekut-pelutna líírengkope imoyé. Nome ngo edílokom doolungkope imoyikumayé. Ruutum Shédí ngo sipe lulendung.”

¹⁵“Tur nome Ruutum Shédí bí sipe ludung: Nokkíng edílo, nokke oletyém, nokke ami kídíem paka-níkkala ami kídíke ulo-aya emla gogyédí, deke aduddem talla siyéng robenglo duuna takame pesolok dan-gemayénía?

¹⁶Delo siyéng robenglo duuna opín kídíke roja kídíe agí-agíke roja palengem mepaksuyinyé. Bulu agí-agíke roja lukdorem bítbínsuyé, delokke morí-mojoknam lunggu kídíem tubínsula, pesolok dan-gela amolo duuyin anggeyé. Nokke nyoknamem bulu kaala, yagorupe pesola dantígeyé.

¹⁷Delo bulu nok legape sim pengé miri sim luyé: “E amín kanarung doolung, kape kísai no sikane, doolung nokke ami kídíe, siyéng asi takamem yébomtuai. Nokke jaji kídíem siyéng asilo yunyok nyokyinmoto. Siyéng robelo duuna takamem, nokke ami kídíe irít-iketla iyintuai.

¹⁸Supak nokke nyokdí longe so, siyéng robelo duuna takame, kaala pesolok dan-ge geyindung, nokke nyokkunamem kaala, siyéng lokke moopí amonge, ami takame mamam suyinkai.”

¹⁹Ruutum Shédí bí sipe ludung: “Tur nome ami kaimana nyokkuna kumruk doolung akampe, byakruknam doolungpe imoyéku. Eerína siyéng asiem ngo nome eelummoyé.

²⁰Konnying-mennyingke ami kídíem metoklíkko, siko among arung delo, bulukíng leko bosudope nom ngo metoklíkyé. Agínpe nyoktíko, ingkolodí kerangke sina takame yéyindune, dekena sutkin kédéng among aralo nom ngo melíkyé. No edílokom turna kídíke yéko among so kaamín geyimayé, delokke no aalat sulang kumayé, demangkom nom among yétakope hanyimayé.

²¹Ami takamke reyubruupe kangkesunam atokope nom imoyé. No edílokom kaimayé. Ami kídíe nome matayé, idola nome edílokom mapaayimayé. Ruutum Shédí bí lulendung.”