Read Alladian EJEKIEL 27 Bible Online

EJEKIEL 27 - Alladian bible

EJEKIEL 27

¹RUUTUM ke agome ngokkíng pííto:

²“Tanike ue, Turke legape pengé miriko lulangka.

³Siyéng asi gíyon sukolo duuna, delokke deddína siyéng robeng amolo pesi-koret igoona ami kídí duupompe ina, Turme Ruutum Shédí bí sipe ludung emla pobilangka: “E Tur, nokke gairuna kampodem, no míngkímsuto.

⁴Siyéng teyolo nok ekume kato, nome mosaana kídíde kamporuna jaji kope, nome mosing-isito.

⁵Harmon dííte lokke gaina siinang esiilok, siipang pala, nok amílem monato. Lebanonke sidar esinglok, nokke kedonna gaangem pínato.

⁶Bulu Ok esingem Bashan amolok laala rebatpe inato, Saipras amolok siinang esingem laala, nokke jaji tungguem monato. Dekedem sita iipanglok gatla ikapnato.

⁷Nokke jaji lokke jandidem, mooteng lokkai kangkéndope, morí-mojoknam Ijipt lokke ege-gasorlok sumla monato. Nokke abelo kyamlíknam gasor kídíde, Saipras among lok yaying yagé idope, kamporupe sumnam ege.

⁸Nokke rebadem ibona kídíde, Sidon kela Arbad doolung lokke; nok agíke kénnarung ami kídíde, jajiem yutbona amipe ito.

⁹Nokke esing monyo-ijina kídíde, gairupe iyilsuna, Biblos among doolung lokke. Nokke dukan delo, pesi-koret ina jaji takamke ami kídíe koret iketo.

¹⁰“Nokke sipaying amipe, Parsia, Lidia delokke Libya, ami kídíe yéto. Nokke suppi kídílo, buluke tamtemlang dumlubem tuyinto.

¹¹Arbad kela Helekke sipaying kídíe, nokke líísak etorem mipile, kaabomla yétíbomto. Nokke kedonna líísak ekum kídílo, Gammad lokke sipaying kídíe kaabomto. Nokke yapgo suppi kídí delo, bulu tamta kídíem tutíto. Bulu takam nome airupe kampomoto.

¹²“Ispein amolo no pesi-koret ila nokke gaina ekurang kídíem, bulu aremlok, baldínlok, pagranglok, delokke bogitam lok líkpésuto.

¹³No Grik amolo, Tuballo, delokke Meseklo pesi-koret ila, nokke ekurang kídíem bulu kelok pitol ekurang emlang abílem renato.

¹⁴Beth Togarmahlok nok ekurangem agér ina guré pelang mimak guré, delokke gadope renato.

¹⁵Rhodes amongke ami kídíe nokkíng pesi-koret ibosula, delokke siyéng robelo duuna ami takame nome sita iipang bila, yorana Eboni esinglok bila ito.

¹⁶Siria ami kídíe nokke pesi-koret ekurangem laala ali-ayéme reto. Bulu nome yayina Emarel elíng, yamugna ege, morí-mojoknam ege, kampope sumnam gasor, Korel elíng, kangorla yalína Rubi elíng atí-sirílok nok ekurang ayanpe bila yéto.

¹⁷Judah lang Israel kídíe nok ekurangem gehulok, ngullanglok, olib téllok, delokke aríkana ato-sirolok líkpésula reto.

¹⁸Damaskas amie nokke pesi-koret ekurang emlang ali-ayé kídíem, Helbonke apong lokla Saharke uullok reto.

¹⁹Grik kídíelang Dan ami kídíe Ujallok nokke pesi-koret ekurangem arempe, kassia, delokke kalamas esingpe líkpésula reto.

²⁰Dedan ami kídíe guré duupu atolok nome pesi-koret ibosuto.

²¹Arabia ami kídíelang Kedar amongke ruutum kídíe, nokke pesi-koret ekurangem, méro, mér kídí, sobén kídílok líkpésula agér ibosuto.

²²Sheba lokke pesi-koret ina kídíe, buluke lunggu, uun delokke gaina nampona ato-sirolok nokke pesi-koret ekurangem líkpésula pesi-koret ibosuto.

²³Haran, Kanneh, delokke Eden lokke doolung kídíelang Sheba lokke pesi-koret ina kídíe, Ashur delokke Kilmad lokke doolung kídíe nokkíng pesi-koret ibosuto.

²⁴Nokkíng buluke gai-gaina ege-badu kídíem, yaying yagéna gasor kídíem, kampo-kampope morí kala appun omlíknam ege kídíem, kamporupe sumlíknam karpét ege kídíem, gairupe kyanam sotkya kídíemlang enno kídíem bisula nok pesi-koret ekurang kídíem laapésuto.

²⁵“Nokke pesi-koret ekurangem, Tarshishlok jaji kídíe gebito. Siyéng asi raadalo bíísétrupe ekurang gena jajikope no ito.

²⁶Deddína sine-mone siyéng asilo, nokke rebat ina ami kídíe, nome yutgo bomto. Idola sanggoke asare nome siyéng aralo alop-asoppe idokupe nome dírmíkyéku.

²⁷Nokke pesi-koretlok mirem takamde, nokke jaji ami kídí, delokke yutbona kídí, nokke esing monyo kídí, pesi-koret ina ami kídí, jaji aralo duuna sipaying takam kídí, deke takamde, edílo jajide dírla iyédí, bulu takam siyéng asi aralo nyokyinlíkyé.

²⁸Dekepe iduem asi aralo siana ami kídí delokke ulo gogdudem, robeng lokke asi-among takame tayyinyé.

²⁹Rebat gagkína takamde, jaji yuttína tabude, buluke jaji kídíem megeyin pala, robelo dagla,

³⁰bulu yagorupe érla nok teyolo kabbom-rííbomyé. Buluke dumpolo metbu kuulíksula, demullo ketla longgooyé.

³¹Bulu dumíd ngíkutsula, nok legape ankí gasorem pogeyé, bulu yagorupe nome ankíbomla, ulo jérla kabbom-rííbomyé.

³²Buluke nok legape kapla-rííla idungem nom pengé miriko lubiyé: ‘Supakke siyéng asi aralo adud kaimape nyokkuna Turme, séko kíngda lupesulayén?’

³³Edílo nokke pesi-koret ekurange, siyéng asi takamlo yutgotodí, opín-buang takamke ato-siro míínam takamem no ipííbituai. Nokke mirem ekuranglok roja kídíem remkín motuai.

³⁴Supak no siyéng asi aralo, dírla doopakkai. No eeríruna siyéng asi aralo otokkai. Nokke ekuserang kídíelang, nokke ami kídí takame, nokkíng lekope siyéng asi aralo, nyoklík amkai.

³⁵Siyéng robenglo duuna takame, nokke tong-aryangem kaala mamam suyinkai. Buluke roja kídíete reyubla ngerpík gela, buluk migmo kídíe pesolok yadé geyinkai.

³⁶Opín-buang takamke pesi-koret ina tabunge, nokke akampe tong-aryang kapelo emla, yirí-pedípe mííyin gekai. No nyokkai, agín lokke agín legape no nyokkai.”