Read Alladian EJEKIEL 30 Bible Online

EJEKIEL 30 - Alladian bible

EJEKIEL 30

¹RUUTUM ke agome ngokkíng pííto:

²“Tanike ue, Ruutum Shédíbí sikepe ludung, emla pobilangka: ‘Ulo jérla polangka, uloi reyubnam longe píídak.

³Opín kídíke nyokdí longe, doomug etkyakdí longe, RUUTUM ke longe pííníndak.

⁴Ijiptke teyolo yokse pííbomyé, Ethiopia amolo ankí ulo jérdíe píídak. Ijiptlo deddína simange dooyinyé, bíkke miremem rotbínyé. Bíkke dungkeng aane gaang kídíeme dírpakyé.’

⁵“Delo mimak delo Ijipt kíng lekope Ethiopia, Libya, Lidia, Arabia, delokke ngok ami kídíete lekope nyokmín geyé.”

⁶RUUTUM bí poto, “Ijiptke makpé kídíde lekope oletyé. Bíkke míngkím ralnamde kaimayé. Migdol lokke ila Aswan lope mimaklo nyokyinyé. Sikepe Ruutum Shédí bí lulendung.

⁷Buluke amode mongku-mooruk among kídí aralo mongku mooruk amope iyé. Buluke doolungde kumruk doolungpe iyé.

⁸Edílo ngo Ijipt amongem eme rílíkla, bíkke makpé kídíem ijétyédí, delo RUUTUM bí ngo emla bulu kényinyé.

⁹“Delo longe delo ngo asi jajilok ngokke kotokiem lulígla atí kénmana Ethiopia amiem mamam sudupe pokanyé. Bulu Ijiptke nyoknamdem talla nyokdí longe píngkai emla kénsuyé.

¹⁰“Ruutum Shédí bí sipe podung, Ijiptke miremdem ngo Babilonke roja Nebukadnejjarme melíkla nyokyinmoyé.

¹¹Bí lang bíkke mikírruna sipaying kídídem Ijipt amongem nyokpak modope bomayé. Bulu Ijiptem mimak iyabomla amongdem simangpe bíímoyé.

¹²Ngo Nail korongke roojik takamem ere moyin geyéla, atímana amilo amodem kolígyé. Mibo miying miru alag aralo among demlang delokke ato-siro kana takamem nyokyinmoyé. RUUTUM ngo sipe polendung.”

¹³“Ruutum Shédí bí sipe podung: Ngo mimang kídíem nyokyinmoyé, delokke Memphiske mimang kídíem kamoyimayé. Ijiptem yébona roja kaimayé. Ijipt among takamlo peso-ríanem kayinmoyé.

¹⁴Ngo Ijiptke sokko Pathros amongem moorukpe imola, línggíngke Joanem emepe ríla, delokke Thebesme itung-iréyé.

¹⁵Ijipt lokke gaiyalumna lííreng etor torgoonam Pelusiamme ngokke marnamem kénmoyé. Thebeske miremem líímoyé.

¹⁶Ngo Ijiptme eme rílíkyé, Pelusiam adír along geyé, Thebeske líísak etorem bénpakyé, doolung dem asi puumupe pupakyé.

¹⁷Helio-polish keelang Bubastis doolung lokke yaamé koo takame mimaklo siyinyé, delokke abíd ami kídarem abílpe umyinyé.

¹⁸Edílo ngo Ijiptke míngkímsunam ralnamem, delokke miga miramem bénpakyédí, delo Tahpanheske teyolo kaamue ibomyé. Ijiptem doomuge etkyakbomyé, delokke bík doolung kídar lokke takam amiem abílpe umnyokyé.

¹⁹Edílo ngo sikepe Ijiptem itung-iréyédí, delo RUUTUM bí ngo emla bulu takam kényinyé.”

²⁰Toodí takying koolang taktel lokke kerayalum poolo lokke longe kínídnana longe delo RUUTUM ke agome ngokkíng pííto:

²¹“Tanike ue, Ijipt lokke roja Pharaohke alagem ngo itírto. Dem supakpete géédokupe ngotbumla, demangkom ato kolok ngotlíksula, yoksa bomla raldokupe isukumang.

²²Depeila sikepe Ruutum Shédí ngo ludung: Ngo Ijiptke roja Pharaohme mirupe ikai. Ngo bíkke aina alag demlang dírna alag annyi pakdem pakyape dírmíkyé, delokke bík alag delok yoksem oletmoyé.

²³Ngo Ijipt ami kídíem tani amosokke rego mipílo monpan-monran sugolíkyé.

²⁴Delo ngo Babilonke roja lokke alagem ralmola, edíímola ngokke yoksem bíkke alaglo laklíkyé. Idola Ijipt rojake alagem ngo dírmíkyé, delo bí uloi-aya emla miru keralo siyé.

²⁵Arorupe ngo Babilon rojake alagem ralmoyé, idola Ijipt roja lokke alagem ralmadope iyé. Edílo ngo Babilon rojame ngokke yoksem bisula, bí Ijiptdanpe yoksem leelenyédí, delo RUUTUM bí ngo emla bulu kényinyé.

²⁶Ngo Ijipt ami kídíem tani amongke rego miyoolo monpan-monran sula, bulum yépit-yéyitmoyé. Delo bulu RUUTUM bí ngo emla kényinyé.”