Read Alladian EJEKIEL 31 Bible Online

EJEKIEL 31 - Alladian bible

EJEKIEL 31

¹Toodí takying kolang taktelke poolo angum lokke kerayalum longe delo RUUTUM ke agome ngokkíng pííto:

²“Tanike ue, Ijipt lokke roja Pharaoh melang bíkke ami kídí takamem agom sim pobilangka: “Nokke gai-gakongrupe yénamem, séko kíngda lupesuyén?

³Assiriame kangkítola! Bí longeko, Lebanonke sidar esing kísa, kamporuna aag mílípe ila, moonam tabungem íklum bomla, yagorupe kedonla, doomug telope íksaala inakuai.

⁴Among arangke asie bím sisaamola, kédéng arangke koronge bím sisaamola, esing delokke sisangko delo asiem kamola, moonam delokke esing tabunglo asi biyinla ito.

⁵De airupe asi paala, abíd esing kídíem pemílo kedon yangkai. Esing delokke aag kídíde, bottela bodong dooyinkai.

⁶Atí atína pettang kídíe, aag kídí delo asup supyinto. Esing ugyum aradelo moonam taro kídíe, ome-oo ola iyinto. Miga-miramna opín-buange, esing ugyum aradelo apéé pééyinto.

⁷Esingde kedonrunge ila, bodoona aag mílípe ila, appír kídíde, kédéng arangke korolo pírtokla, kamporuna esingkope esingde ito.

⁸Shédíke bagan aralokke sidar kídíemte, esing delo ruupe sukanmato. Esing delok aag kanam kísape, ingkona esingete kamato. Esing delokke kampona kísa, Shédíke bagan aralo ingkona esingekom kampona kamato.

⁹Ngo esingdeme kamporudope, aag kadorupe píto. De Shédíke bagan iko, Eden baari lokke esing kídí takamke netíbomnam esingkope ito.

¹⁰“Idola supak esing delokke legangem Ruutum Shédí ngo sipe podung: De esingde yagorupe sisangla, doomug telokkai singkane, bí sisaa yayang míngkím suyayang irepkai.

¹¹Depe ikolok ngo bím míípak langkula, mibo-miying ami alag aralo, bíkke atímana ségu akorpe itung-irédope kolíkyé.

¹²Mikír aapí gena mibo kídarde deme teeletyé. Delokke dírna aag kídíelang amílde otír-oyirsula díítum-díírum, sine-moopang tabulo donggoyé. Depe irodem esing ugyum aralo dungaana opín tabunge ennyok-gínyokgeyé.

¹³Pettang kídíe yobala oletna esing delo arung rula, asup supla dungaayé, delokke monkír taro kídíe oletna aag kídí delo renggooyé.

¹⁴Depe irongem, deddípe asi kadagakom, ingkona esingekom, oletna esing delok kísa telokkai kedonruupe sisaala, doomug telokkai kedone ila, ina kaimayé. Tani kísa takamde siyin yéku, takamde siko-nyokko amolo tokyinyéku.”

¹⁵Ruutum Shédí bí sipe podung: “Ingkona longelo siko amolo, de esingde tokyédí, delo kédéng aralokke asi kídíem ankí-kenoem lengkannana iyodpe ngo eelummoyé. Ngo korong kídíem yagope tokmo mape itumla, asi kídíem biilen momayé. Esingde sinam legape Lebanon díítelo ngo kaamuem langaala, moonamke esing tabudem ere moyinyé.

¹⁶Edílo ngo deme sina amolo melíkyédí, esing delokke odude opín-buang takamem taron kísa ngegong sumoyé. Eden baari lokke esing takamelang Lebanon lokke gai-gaina, arang amolok asi tíína esing takame, esing delokke oletnamem kaala ashéng alooyé.

¹⁷Séko buludí esing delokke ugyumlo duutuane, opín kídar aralo esing delokke makpépe ituadí, dekedete esing delo lekope sina ami kídílo duubo sudope ago arung aralo tokbosuyé.

¹⁸“Eden lokke esing kídí aralok sékome nokkíng pope suyén? Sékoda nokke kísa gai-gakongruupe, angun-abé ina katon? Idola siko-nyokko amolo supakke duuna Eden lokke esing kídílo lekodope nomte tokmoyé. Midu-mimaklo sina ami, delokke dínbíng iyodsumana ami kídí pénsamlo, nokom kedamínyé.” Ruutum Shédí bí sipe podung: “De esingde Pharaoh roja lang bíkke ami kídí takame.”