Read Alladian EJEKIEL 32 Bible Online

EJEKIEL 32 - Alladian bible

EJEKIEL 32

¹Toodí takying kolang taknyi lokke poolo íying kolang annyi lokke kerayalum longelo RUUTUM ke agome ngokkíng pííto:

²“Ijipt lokke roja Pharaohke legape no pengé miripe lula, sim lubi langka: No opín-buang daadi takam aralo, myomur simyo kísanakuai. No korong asi kídíem, nokke alelok deemamola, asi kídíem demulpe imola, asi eeríkolo byanggoona, sormonkope ikai.”

³RUUTUM Shédí bí sipe ludung: “Hanam yimanam mití-maglíngem ngo aabola, ngokke esaplok nome kuulumla, bulume robelo nome holenmoyé.

⁴Ngo nom amolo elletla, deddína kebu-pettang, simon-sili kídíeme goodum suyin geyéla, nok amíldem domoyé.

⁵Nokke yaana amíldem, sine-moopang, díítum-diirum kídíem, ngo béndumsula ikapyé.

⁶Nokke iyyiem ngo purlenla, dííte kídílo, korong kídílo tonggolíkyé.

⁷Edílo nom ngo nyokmoyédí, delo ngo talengem ikapyé, delokke takar kídíeme polum nyokmoyé. Doomuge doonyiem dakkapyé, delokke pooloete angun biyimayé.

⁸Ngo taleng telokke angun takamem ngunmo yimape igeyéla, tani amongem kaamo moyé. RUUTUM Shédí ngo depe polendung.”

⁹“Ngo kénkímanam mibo-miying opín kídílo, nokke legí-sigangem edílo ngo pokan gooyédí, deme tatla deddína maglíng opín kídíke aapí-aange adír geyé.

¹⁰Nok teyolo ngokke agér inamem kaala, deddína opín-buange mamam sugeyé. Edílo ngokke yokseme kityédí, deddína roja kídíe pesolok dan-geyé. Nokke oletdí longedelo bulu takam agí-agí yénamsu legapete yagorupe pesogeyé.

¹¹“Ruutum Shédí bí Ijipt rojaem sikepe ludung: Babilon lokke roja yokse nome aabomyé.

¹²Opín takam aralokke mikír yalumna opín delokke maglíng kídíke yokse, nok ami kídí takamem pakayé. Nokke mííte subomnam ami kídíemlang ato-siro tabungem nyokyinmoyé.

¹³Asi sirung kako takamlo nokke simon-sili takamem petyinyé. Asi kídíem demuldope ina tanidak tarodak atí kaimayé.

¹⁴Ngo nokke demulna asi kídíem deemo langkula, korong asi kídíemte remelpe biiyin moyéku. Sikepe RUUTUM Shédí ngo polendung.

¹⁵Edílo ngo Ijiptme atí kaimana mooruk amope imola, delo duuna takamem nyokyin moyédí, delo bulu RUUTUM bí ngo emla kényinyé.

¹⁶Ijiptke legape lutornam agom kídísi pengé mirikope iyéku. Opín takamke mime kídíe, Ijipt kepelang bíkke ami kídí legape ankí-kenola pengé miripe lugeyé. RUUTUM Shédí ngo sikepe lulendung.”

¹⁷Toodí takying koola taknyi lokke kerang pooloke looying kolang longonana longelo RUUTUM ke agome ngokkíng pííto:

¹⁸“Tanike ue, miga- miramna opín takamke tokpom, siko-nyokko amolo tokpena Ijiptke mití maglíng legape kapla-rííla ila,

¹⁹sim polangka: “ ‘No abídem pemílo, gaiyalumne emla míísudunía? No siko-nyokko amolo tokyé, delokke dínbíng iyodsumana kídílo lekope doobosuyé.’

²⁰“Yoksalok pakanam kídílo Ijiptlok ami kídíe doomín geyé. Bulum takam paka kayindope yokse irung lenkai.

²¹Ago arung aralok kerangke miram maglíng kídíe Ijipt melang bíkke makpé kídídem sikepe luríksuyé: ‘Bulukom tokkai, delokke mimaklo mokanam, dínbíng iyod sumana kídílo lekope bulukom doomín gekai.’

²²“Agíke mití maglíngem doobola Assiriabí delo duudung. Midu-mimaklo mokanam takame bím gargoola lekope doobosudung.

²³Turla yéko amolo peso-ríandope igoola, mimaklo sina sipaying maglínglo lekope bí doobosula, buluke ago kídíde eeríyalumna siko-nyokko amolo duung.

²⁴“Elamkom agíke sipaying kídílo lekope agolo doobosula, delo duudung. Bulu takam mimaklo siyinne. Turna amolo peso-ríandope igoona kídí bulu, dínbíng iyod sumana kídílo lekope siko-nyokko amolo doobosukai. Ago gorunglo annyingla tokna kídílo bulukom lekobosukai.

²⁵Bíkke agoem gargoola bíkke mimaklo sina maglíng kídí takame bíkkíng lekope dooyin bosukai. Bulu takam dínbíng iyodsumana, mimaklo siyinna kídíe. Mimaklo sina abíd kídílo lekope annyingem paala, sila dongkuna kídípe bulu ikai. Turdungem bulu takame peso-ríandope yéyintuai.

²⁶“Mesheklang Tubalteng agí-agíke sipaying kídíem doobola, agolo dooyindung. Bulu dínbíng iyodsumane, delokke mimaklo mokanam kídí tetenge. Bulute, buluke turdungem daadie peso-ríandope yétuai.

²⁷Buluke turla yédungem de miram kídíde daadiem peso-ríandope yéla, buluke paabe buluke along kídílo buluke ajéng arepe dooyinsukai. Depeila buluke dumpong rumkílo yoksem melík suyinla, tamtaem amíllo polum suyinla, dínbíng iyod sumanake siko-nyokko amolo tokyinna kídílo lekope Mesheklang Tubal, delokke buluke maglíng sina kídíete dooyin manía?

²⁸“E Pharaoh, nomkom dírmíkla, dínbíng iyodsumana, delokke mimaklo sina kídílo lekope note siko-nyokko amolo doomín geyé.

²⁹“Edomkom bíkke roja kídí lolang mite-migom kídílo lekope delo doodung. Bíkom miram agérlo amín kanarungkuai, idola bíte supak mimaklo sina, dínbíng iyodsumana kídílo, siko-nyokko amolo lekope duung.

³⁰“Sidon ami kídíe lang línggíng lokke roja kídí takame delo lekope duung. Longeko bulukom yagorupe ralnam lengkansula daadiem peso-rían motuai. Idola bulute supak dínbíng iyodsumanalo annyingla, mimaklo sina kídílo lekope doobosukai.

³¹“Midu-mimaklo sila doona kídí takamem kaanamde Pharaoh roja kelang bíkke maglíng kídíke legape aang píípe kaasik suname.” Sikepe Ruutum Shédí bí polendung.

³²“Turna takame peso-rían dope ngo Ijiptke Pharaoh rojame imotung. Idola bímla bíkke sipaying maglíng emte mimaklo sila, dínbíng iyodsumana kídílo lekope siko-nyokko amolo doobosudokupe midu-mimaklo siyinmoyéku.”