Read Alladian EJEKIEL 33 Bible Online

EJEKIEL 33 - Alladian bible

EJEKIEL 33

¹RUUTUM ke agome ngokkíng pííto:

²“Tanike ue, sim agom sim nokke ami kídíem pobilangka: Edílo ngo among yéta teyolo mimagem rungalíkyédí, delo ami kídíe miruke bedu-belengem kaabomdope emla ako parlíkla,

³de amide miru aabomnamem kaala, bikul mutla ami kídíem ansudope lutoryédí,

⁴dekepe iko ara delote bikul adudem amikone tatlate denge-poope yéla, edílo mimage pííla, dem amidem mokayédí, delo bíkke sinam edode bíkke agí dumpolo kasuyé.

⁵Bíkke sinamde agí imemsulo aasuyé; kapeila bí lutornamem atí mínggemato. Bí lutornamem aang kigela ansula ituamílo, bí dugpí sulate iyape.

⁶Idola kaabomnade miru kídíke aanamem kaadolate, lutornam bikuldem mutmang; dekepeila mirue pííla ami kídíem mokayémílo, dekena regolo ami kídíke sinam edoem kaabomna teyodelo ngo ruulíkyé.

⁷“Tanike ue, Israel erangke legape nome ngo kaabomnape ruulíkto. Depeila ngok agom ponamem no aipe tatgapla, ngokke lutor agomem bulum lubilangka.

⁸Edílo ngo, atímana amiko siyé emla lulenyédí, delo no amidem aapí míílat sudokupe lubimape ila, bíkke yénamem turmokumape paab amipe siyémílo, bíkke daie nokke teyolo aayé.

⁹Idola no atímana amidem bíkke atímana ségu kídí legape lutor bilate, de amide itíberokla, paab amipe ila siyémílo, bíkke daie nokkíng aamayé, delokke no agíem ipítsuyé.”

¹⁰“Tanike ue, Israel kídíem sipe lulangka: Nolu sikepe lubosudung, ‘Ngoluke imem-samem kelang paab kídíke tebege ngolum bekjém bomdung. Deke delok legape nolu aruk gedung. Ngolu kapekísa turla yéyén?’

¹¹Dekepe manbosunam legape bulum sipe polangka: Turyarna Shédípe Ruutum Shédí ngokke idu tetedelo paabna ami sinam dem ngo erbommang, idola bulu agí-agí paab bedalok aapí míílat sulangkula turkunam demmin ngo kaalídune. E Israel kídí, noluke aimana ségulok aapí míílat sutokula. Nolu kape silíngkan?”

¹²“Depeila tanike ue, nok Israel ami kídíem polangka: Edílo aina amie paab iyédí, delo bíkke aina agér itonam kídíde bím mopítmayé. Edílo atímana amikone paab agér iyimayédí, delokke aapí míílat suyékudí, delo bím edo sanket yimayé. Edílo aina amie paab iyékudí, bík yénamdem emmumpe mesammayé.

¹³Aina amikonem ngo turnamem bipe emla togesutuakom, de amide edílo bíkke ainam agérlo míídasula, paab agérem gérrep yékudí, delo bíkke aina agér inamem atelkokom ngo mínggeyimayé. Bí agíke paab agér legape sisuyé.

¹⁴Paabna amikonem, ‘No arorupe siyé,’ emla ngo agom lutuakom, edílo bí paab agér kídílok aapí míílat sulangkula, jonna delokke deena agérem ilangkula,

¹⁵abal nargape bondokpe menamem bilat sulangkula, pyoosi-pyoorumnam atoem bilat sulangkula, turnam bina ayonem igelangkula, atímana agérem iyimape ikunamko kayékumílo, de amide arorupe turyé, bí sikumayé.

¹⁶Kerangke bíkke paab imemnam takamdem, bík teyolo sanlík yimayé. Kapeila ingkuedí jonne delokke deene, dekeme bí ikaku, iname bí turyé.

¹⁷“Idola nok ami kídíe sipe ludung: ‘RUUTUM ke idong si jonmang.’ Idola buluke idong kídí demin jonmane.

¹⁸Kapeila aina deena amie bíkke deena bedalok gíyimape paab agér ikumílo, dekena agér ikunam legape bí arorupe sisuyéku.

¹⁹Idola atímana amide, bíkke paab agérlok aapí míílat sulangkula, jonna delokke deena bedalok gíyékumílo, bíkke dekepe agér ikukolok bí turnamem paayé.

²⁰Idola E Israel kídía, nolu, ‘RUUTUM ke idong si jonmang,’ emdu teteng. Idola mipil miyong noluke idong-yédong supe ngo íngkí-bengkíyéku.”

²¹Ngoluke mibo amolo yényokdo delokke toodí takying kolang taknyi lokke poolo íyingke longonana longe delo, Jirusalemlok dugpísuna amikone ngokkíng pííla, “Jirusalemem bénto,” emla lukan bido.

²²Ami delokke píímangada yume delokai, RUUTUM ke ralnarung duumín genamem ngo anpaasuto. Rohkon delo, ami delokke aamangada delo bí ngokke gommangem nappasok laabínla agom pomotoku.

²³Delo RUUTUM ke agome ngokkíng pííto:

²⁴“Tanike ue, Israel among lokke kumruk doolung kídílo duuna kídíe sikepe pobo sudung, ‘Abraham bí midum atelkuai, dekepe ilate bí asi-among tabusim yébomto. Idola ngolu mití-maglínge, dekepeila among sim ngolum yébomdope ruubitunape.’

²⁵“Dekepe bulu emgange, RUUTUM Shédí bí sikepe ludung, emla bulum lubilangka: ‘Nolu iyyi kadung adapekai adínem dodung. Nolu mimangem kumdung, nolu paka-níkkagoodung. Dekepe ina kídíde asi-amongdem yébomyénía?

²⁶Noluke yoksalo nolu míídasudung. Nolu belumrunam agér-anamem ibosudung. Mipil miyoope abír-ayo ibosudung. Dekepe ina kídíde amongdem yébomyé emla míídunía?’

²⁷“Bulum sipe lubilangka, ‘Ruutum Shédí bí sipe ludung: Ngo Turyarna Shédípe idutetedelo, kumruk doolulo dungkína ami kídar takamem yoksalok paka kayinyé. Doolu-sikolok mootengpe duuna kídíem monkír kídíe donyok nyokyinyé. Adi amolo, bupík-buríklo runyok gena kídíe kilii-ramlilok siyinyé.

²⁸Ngo asi-among deme siruk-mooruk amope imoyé, delokke buluke mííte subomnam ralnam kídíem nyokyinmoyé. Israelke díítum-díírum kídíde yagorupe mongku-moorukpe ila, delo sékote endung-gítoksula ilayimayé.

²⁹Edílo ngo dekedelo duuna ami kídíem itung-iréla, asi-amongdem siruk-mooruk amope imoyédí, delo RUUTUM bí ngo emla bulu kényinyé.’ ”

³⁰“Tanike ue, nokke ami kídíe nok legangem, buluke ekum kídíke lamgé kídílo, doolungke líísak etor kídílo lupo-manmo bosula ibosudung. Bulu, ‘RUUTUM kelok ingkona agom ekedí píídune, kaju gíla tatkí langkaju!’ emla buluke aralo pobosudung.

³¹Depe embosula buluke idong supe ami kídíde nokke agom lunamem tatpe emla alung-abampe béna bomdung. Bulu nom gargoo bomla, nok keralo duula idung, idola dekedem buluke yénamlo dem igemang. Buluke nappalok bulu míngkengem pokansudung, idola buluke aapí-aangde kaabo-tatbo, delokke paapu-dopu mílílo míítídung.

³²Arorupe luyékuem, no buluke keralo tatporuupe goomuk kala, mííbosunam miriem lubila, tapung batbila ila bulum ashéng-angam ibopeena kísape idung. Nok agom-aang takamem bulu tatyindung, idola deke delokke gompil atel koteng igekumang.

³³“Idola edílo nokke agom lunam kídíe takame arope apíílíkyédí dekede arope ilíkyé delomino buluke aralo kaaluna miriko yétuai emla bulu kénsuyékune.”