Read Alladian EJEKIEL 34 Bible Online

EJEKIEL 34 - Alladian bible

EJEKIEL 34

¹RUUTUM ke agome ngokkíng pííto:

²“Tanike ue, Israel kídíem kaabomna kídíem sim lutornam kaalu agom sim pokandola lulangka: ‘Ruutum Shédí bí sikepe ludung: E Israel mér kídíem kaabomna, nolu ankí-adír alooruyé. Nolu agíkesu petomem kaasula, mér kídíem edílokom aipe kaabommang.

³Nolu gakírem tíídung, mér amídlok ege sumnamem gedung, gairuna mérem pala dodung. Idola nolu edílokom mér kídíem aipe kaabom kímang.

⁴Nolu adírna amiem kanggul bosula, kina-ramna amiem ipíbosulangkula, tarí gena kídíem gayin ngotkapla, gínyok-poksokna kídíem mata langkula, demangkom mangu-marusuna kídíem goodum-goorumsula ikímang. Dekedelok ayanpe nolu buluke teyolo mito-huarpe yébola, bulum yédír along bodung.

⁵Depeila aipe kaabomna kamang kolok, bulu elo-belo yépit-yéyitla igongkai. Edílo bulu yépit-yéyit amkadí, delo bulu monkír kídarke donam-tíínampe ikai.

⁶Ngokke mér kídíe díítum-díírumlo, sine-moopalo tumgoosukai. Bulu tani among rego mipílo yépitgongkai. Sékote bulume matana, delokke kaatagoona kamang.

⁷“ ‘Dekepeila mér kaabomna kídía, RUUTUM ke agomem tatlangka:

⁸Ruutum Shédí ngo Turyarna Shédípe idutetedem, ngokke mér kídíe kaabomna aro kamape, bulum laanyok-laasokne idírbomla, monkír kídíke doke-tíngkepe iko teyolote ngokke mér kaabomna kídíe, aipe an-gap bommape, ngokke mér kídíem kaanam ayanpe, bulu agísuem kaasunam legape,

⁹E mér kaabomna kídía, RUUTUM ke agomem tattola:

¹⁰Ruutum Shédí ngo sipe ludung: Ngo mér kaabomna noluke mirupe ikai. Mér kídíke adírnam daiem, noluke teyolo edorayéku. Nolu agísue dola-tííla kaasu layimadope mér kídíem, nolu kelok ngo langkutyéku. Noluke nappang kídílok ngok mér kídíem ngo mopítyé, delokke nolu buluke teyolo dola-tííla ilayimayé.’ ”

¹¹“Kapeila Ruutum Shédí bí sikepe podung: Ngo agísue ngok mér kídíem kaatasula bulum kaabomyé.

¹²Edílo kaabomne yédungem mér kídíe yépan-yéran sudagakom, aipe goodum sudungkudí, dekepe ngokke mér kídíem ngo kaabomyé. Kaamo pelang doomumpe iko, ingko-ingko amolodí, bulu yépit-yéyitla yégoodudí, dekepe yégong kolok ngo bulume mopítyéku.

¹³Ngo buluke yéko mibo opín, among yéta takamlok goodumsula, buluke agí among sulo laayin aayéku. Ngo Israelke adi amonglo, sine-moopang amolo dota-tííta molangkula, buluke notko takamlo yéyin moyéku.

¹⁴Ngo bulume ardana tami kakolo, delokke Israelke gaina kedonna adi amolo naggo molangkula yégoomoyéku. Bulu airupe nagpenam tami kakolo ketgoong langkula, Israelke miremna íími kako kedonna adi amolo dogo-tínggoola yéyéku.

¹⁵Ngokke mér kídíem ngo agísue kaasi-tatsila isuyéku, delokke bulum remelkolo ketgoomoyéku. Sikepe Ruutum Shédí ngo polendung.”

¹⁶“Gínyok-gísok goonemte ngo matalangkula, delokke yépan-yéransuna emte goodum sulangkula iyéku. Tarí-tape gena kídíem ngo ai-kampope gayin ngotlíkla kina-ramna kídíem ipíla iyéku. Idola yagorupe ngella ralna kídíem ngo nyokpakmoyé, kapeila ngo pénsam-raadang lok kebang lubina mér kaabomnako.

¹⁷“E ngok mér kídía, noluke legape Ruutum Shédí ngo sipe ludung: Ngo mér akonkelang mér akonke pénsamlo kebang lubiyé. Ngo mérbo kídíemlang sobén kídíke pénsamlo kebang lubiyé.

¹⁸Ayokon nolu gaina tamiem naklate atíngmanía? Noluke naktung-nakngong tami kídíemkom noluke ale kídílok kape tujém-tuyémkan? Nolu deena asiem tíídula tíngong kídíem kape deemul mokan?

¹⁹Ngokke mér abíd kídíe, noluke tujém-tuyémnam tamiem domín gela, noluke demul monam asiem tíímín gela iyénía?

²⁰“Dekepeila noluke teyolo Ruutum Shédí ngo sipe ludung: Kaatola, ngo agísue ngelna mér kelang soona mérke pénsamlo kebang lubiyé.

²¹Kapeila nolu kitek-ramtekla, soona mér kídíem gorduulok nelpakla, noluke arenglok tuppakla, dekedem elo-belo yégoo mokan?

²²Depeila ngokke mér kídíem ngo mopítsuyé. Bulume itung-iré moyimayé. Ngo mipil mérem kebang lubila, ainemlang atímanem ipansuyé.

²³Ngo buluke teyolo, ngom agér ibina Dabid kísana, aina mér kaabomnako melíkyé. Bí bulume airupe kaasi-tatsila iyé. Bí bulume airupe yébola, bulume kaabomnape iyé.

²⁴RUUTUM ngo buluke Shédípe iyé, delokke ngom agér ibina Dabid kísana bí buluke aralo rojape iyé. RUUTUM ngo sikepe polendung.

²⁵Ngo bulukíng aapí eetetmona daapongko iboyé. Ngo among deme monkír kídílok mopítla, ngokke mér kídíe dengomrupe, arík kídílo yégoola, delokke moonam kídílo ibgoola ilayéku.

²⁶“Buluke teyolo ngo utepooroem ruubiyé, delokke ngokke deena díítumlo bulum dunggong bomdope imoyé. Ngo moodílo teyong amongke aapamem metoklíkyé. Utepooro aapame bulukelo kayaryé.

²⁷Esing kídíe airupe ayé ééla, arík kídíe airupe ali-aamem kabila, mipil miyoope agí-agíke kumle-moolelo aapí-aang eetetrupe yéyin suyé. Edílo ngo, ngokke ami kídíem yéébomna ikoliem taabínbila, bulum abílpe ina kídíke alaglok mopítla iyékudí, delo bulu RUUTUM bí ngo emla kényin yéku.

²⁸Mibo-miying ami kídíe, bulum itung-iréla, delokke monkír kídíe bulum rekkala dola iyimayé. Bulum sékote irít-iketna kaimape apít-arape bulu yéyin yéku.

²⁹Ngo ardana, moone kédéng kako amongem bulum biyé. Dekepeila ngo buluke amolo dírí-keno kamoyimayé. Mibo-miying opín kídíe bulume lupu-luléla, ngilkala ina kaimayé.

³⁰Delo Israel ami kídíde ngokke amie, delokke ngo buluke Shédíe, delokke ngo bulum mopít bomdung, emla mipil-miyonge kényinyé, delokke kaayinyé. Ruutum Shédí ngo sikepe polendung.”

³¹“Nolu ngokke donam binam mér abame, ngokke ami kídíe, ngo noluke Shédíe,” Sikepe Ruutum Shédí bí polendung.