Read Alladian EJEKIEL 35 Bible Online

EJEKIEL 35 - Alladian bible

EJEKIEL 35

¹RUUTUM ke agome ngokkíng pííto:

²“Tanike ue, Seir Díítumdanpe [5] nokke mikmoe gekasudola, kaalu agom sim podola lulangka:

³‘Ruutum Shédí bí sipe ludung: E Seir Díítum, ngo nok mirupe ikai. Ngok alage lengondola nom ngo rongngamna mooruk amope imoyé.

⁴Nokke doolung kídíem ngo kumruk doolungpe imogeyéla, asi-among dem yépol mooruk amope batmoyé. Delomin no RUUTUM bí ngo emla kényéne.

⁵“ ‘Konnyi-mennying kekai no Israel teyolo kangki kitíla, Israelke yéyin yalum tong-aryang longe kídílo, Israel ami kídíem paka-níkkamola yagorupe irééto.

⁶Dekepe igape, Ruutum Shédí ngo Turyarna Shédípe idutete delo, dem nome ngo iyyi líímín sukolo ruulíkyé, delokke dekede nome mondantete bomyé. No iyyi líínamem akmanam legape iyyi líínam daie nome mondantete bomyé.

⁷Ngo Seir Díítumme yépol moorukpe batmo langkula, sékote enyon-gíyonsula delok iyimadope iyé.

⁸Ngo nokke díítum kídílo, midu-mimaklok sina ami kídíke simangem bíísétdope imoyé. Dekede nokke yiibe kídílote, delokke kobung-korung kídílote dooyinyé.

⁹Nokke doolung kídíem tani-taro atíe duubomyimadope imola, mongku-mooruk amope iyarmoyéku. Delo no RUUTUM bí ngo emla kényéku.

¹⁰“ ‘Judah lang Israel opín annyi silang bínyike asi-amongde ngokkepe iyé,’ emla RUUTUM ngo delo duulateng no poto.

¹¹Dekepe pogape, Ruutum Shédí ngo Turyarna Shédípe idutete delo, no kape kísa bínyike teyolo kangki-kangakla, aklíla, nela itodí, deke ségu paklok ngo nome edorayéku. No kapekísa bínyike teyolo itodí, dekepe ngo nom ibomdungku emla bínyi kényé.

¹²Dekepe ibom yékuemmino, Israellok díítum kídíke mirupe nokke lupu-luléla lunam kídíem, RUUTUM bí tatto, emla no kénsuyékune. Kapeila no sipe manto, ‘Among kídídem yépol mooruk amope imotung, delokke deme ngolu dobom dokupe ngolukíng ruulík tungku.’

¹³No ngokke mirolpe delokke agíke gomkorem ansumape ngok teyolo atírumana gomkéem lutíto. Dem ngo tayyinto.

¹⁴Sikepe Ruutum Shédí ngo ludung: Tani amonge ashédungem nom ngo rongngamna moorukpe imoyé.

¹⁵Kapeila ngokke agí amisupe ruusunam Israelke moorukpe iangdelo no ashéto! Depeila ngokom nom depe iyéku. E Seir Díítum, nokom moorukpe batyéku. Arope Edom among takame moorukpe iyinyéku. Delo RUUTUM bí ngo emla mipile kényinyé.”