Read Alladian EJEKIEL 36 Bible Online

EJEKIEL 36 - Alladian bible

EJEKIEL 36

¹RUUTUM bí poto: “Tanike ue, Israelke dííte kídílo sim kaalu agom sim pogoolangka: ‘E Israelke dííte kídía, RUUTUM ke agomem tattola:

²Ruutum Shédí bí sipe podung: Miru kídíe sipe embosudung, “Airudo! Konnying-mennying kaike dííte kedonna kídísi ngolu kepe ikai.”

³Depe emgape Ruutum Shédí ngokke kaalu agom lunam kídí sim pogoolangka: Israel kídí nolum rego mipílo kumrí-donggong miru opín kídare mimak iala umla, Israel dííte kídíem líítígoola, Israel nolume lupu-luléla, takil sukkatla itínam legape,

⁴E Israelke dííte kídía, Ruutum Shédíke agomem tallangka: Ruutum Shédí bí dííte kídar nolum, díítum kídí nolum, kobung-korung, yiibe among kídí nolum, kuruknam kumruk mooruk doolung kídí nolum, dunggoobomna opín kídíke lupu-lulénam kídí nolum,

⁵Ruutum Shédí bí podung: Ngokke martíklok nolum dunggoona opín kídíem, delokke akonrupe Edomme lutaksula ludung. Bulu ngilpu-ngillé dola, delokke míípu-mííléla ngok amongem doojét aabomto, delokke arík kídíem rotyin aato.’

⁶“Dekepeila Israel amolo kaalu agom sim pogoolangka: Dííte kídíem, díítum kídíem, kojik-korik kídíem, delokke among yiibe kídíem, Ruutum Shédí ngokke nenam marlíng agom lunamem polangka; kapeila si opín-buang kídísi Israel kídíem yagorupe ipusilééla iréé-sinyola ingéng aloopakkai.

⁷Dekepeila Ruutum Shédí ngo alage leedu sudola pésula ludung: Nolum dunggoobomna miru opín kídí sikom iréé-sinyoem paayéku.

⁸“Idola Israel dííte kídílo esing kídíe anne kalen yéku, delokke noluke legape ayé éébiyéku. Ngok Israel ami kídía, nolu agí ekumlo aasuruyéku.

⁹Ngo noluke makpépe idung. Noluke amongem aal gurlangkula ali-ayéme ledokupe ngo arorupe imoyéku.

¹⁰Israel tabungem itaksula mipil nolum ami parmoyéku. Doolung kídíem mosaalangkula kumruk kídílo amie duuyinyéku.

¹¹Tanidak tarodak nolum alung abampe imoyéku. Nolu kerangkem pemílo jéyayéku. Kapeila kerang longe kísa ami duumo langkula, RUUTUM bí ngo emla kényéku.

¹²Ngok Israel ami kídar nolum noluke agí amolo aalatsuyin molangkula duuyin moyéku. De noluke agí amongrupe isuyéku. De noluke ome-oo kídíem dírí-keno kabiyimayé.

¹³“Ruutum Shédí ngo sikepe podung: Asi-amonge amiem dosula opín kídíem ome-oo kamomape aréé modung, emla ami kídíe emdung.

¹⁴Idola supaklokke ila amode ami kídíem dosuyimayé, delokke ome-oo kídíem líímoyimayé. Ruutum Shédí ngo sipe polendung.

¹⁵Lupu-luléna kídíke agom kídídem asi-amongde tayyimayé, delokke ngilkana ami kídíem kaasuyimayé. Asi-amongde ome-oo kídíem edílokom lííyimayé, delokke Israel opínem looríyimadope iyimayé. Ruutum Shédí ngo polendung.”

¹⁶Lekoda RUUTUM ke agome ngokkíng pííto:

¹⁷“Tanike ue, Israel kídíke agí amolo duusudungem buluke ségu, delokke buluke agér-anam kídíde, buluke among kídíem deema moyinto. Ngokke amig keralo buluke deemade poolo moodílo mime lokke deemang koodang kísape ito.

¹⁸Bulu asi-among delo iyyi líímínsula, buluke mimang kumnam agérlok asi-amodem deemamola ikolok buluke teyolo ngokke aklíngem lengkanto.

¹⁹Bulum ngo mibo miying ami kídí gooralo, delokke tani among sokke rego mipílo yépan-yéran sunyokmola yényok moyinto. Buluke agér inam delokke ségu kídíem kaabomdola, ngo kebang baabomla dekepe ito.

²⁰Bulu ingko-ingkona amolodí yényok-daknyok gootone, dekedelo ngokke deena amínem deema mogoto. Bulume miying ami kídíe sikepe lukaato: ‘Bulu RUUTUM ke ami kídíai, idolate bíkke amongem bulu mepakla magoodung.’

²¹Dekepeila, buluke magongko mibo opín kídílo, buluke ngok deena amínem deemang atak kamonam legape ngo ankídung.

²²Dekepeila Ruutum Shédí bí sikepe ludung, emla Israel kídíem pobilangka: E Israel kídía, ngokke kebang lutonam agér kídí sime noluke legape imayé, idola noluke magongko mibo opín kídí aralo ngok deena amínem deemang atak kamonam, ngok deena amín legapemin ngo idakne.

²³Noluke mibo opín bulukíng deemamonam amín, ingko amín emdí nolu mibo miying opín takamlo suana atokope imotodí, dem ngokke botteruna deena amíndem bulu takam kíng lengkanyé. Delo bulu takam RUUTUM bí ngo emla kényinyé. Ruutum Shédí ngo polendung: Nolu kelok ngokke deenamem mibo-miying ami takame agí amiglok kaayin sudope ngo iyé.

²⁴“Kapeila nolum ngo mibo-miying ami takam gooralok laalen lenyinyéku. Nolum ngo among yéta takamlok goodumsula, noluke agí among sulo langaayéku.

²⁵Noluk teyolo ngo deena asiem purlíkyéku, delo nolu deeyinyéku. Noluke deemang amo takam loklang noluke mimang kumla belumpe yénamlok ngo nolum arbínyéku.

²⁶Ngo nolukíng aní aapíemlang aní aidem ruulíkyéku. Noluke elíng aapídem laabín geyéla, agom tatkuna aapí-aangem ruulíkyéku.

²⁷Ngokke ayonem, delokke lubinam idongem aipakpe igap dokupe, ngokke Aidem nolukíng melíkyé.

²⁸Noluke neku-bukulo ngokke tolíknam amolo nolu duuyéku, delo nolu ngok amipe iyéku, delokke ngo noluke Shédípe iyéku.

²⁹Noluke deemang akang takamem ngo arkutyé. Ngo ali-ayé jédope ruulíkyé, delokke dírí-keno kamoyimayé.

³⁰Dírí-keno kala, mibo-miying ami kídílo lakpyo tokang goola, annying kaimadope noluke arík kídí, bagan kídí takamlo oying-ogé, ali-ayé, siipí-siiyé kídíe bojémomodope ngo utepooro rulíkyé.

³¹Dekepe iyékuem, nolu agí-agíke atírumape, paab agér mílílo itíla yétonam longe kídíem míípa sulangkula, noluke dekena belumrunam, loorírumape inam kídí legape agí-agíke angkengem kítsula, ankírupe bursula yéyinyéku.

³²Ruutum Shédí ngo podung: Noluke legape ngo sikepe ikumang emla nolu kénlangka. E Israel kídía, noluke ségu kídí legape annying sula mínggíp sutola!”

³³Ruutum Shédí bí sipe podung: “Ingkona longe lodí ngo noluke paab takamem arbínyékudí, delo ngo noluke nyokngum tonam doolung kídíem ami dungaamoyéku, delokke gaina doolungpe leemoyéku.

³⁴Amie bedalo endakla agér kamana mooruk amongpe kaanam kídíem moone molangkula aríkpe iyinmoyéku.

³⁵Dekedem kaalangkula ami kídíe sipe embosuyéku: ‘Si among kídísi ato agér kamana mooruk amongkuai, idola si Eden baari kísape ikaku. Nyokngum tonam, bénletkuna doolung kídíete gai-gai líísak etor torlangkula kamporupe ikaku.’

³⁶Dekepe iyékuem, nolum gargoobomna mibo-miying ami kídíe RUUTUM mai líípaktonam doolung kídísim isaatungkune, delokke arukpe doona kídíem agí kadope sisaa motungkune, emla kényinyéku. Ruutum Shédí ngo polendung, delokke ngo dekerupe imoyéku.”

³⁷Ruutum Shédí sipe podung, “Lekoda ngo Israel kídíke rogunamem tatbila sim ngo ibiyéku. Ngo Israel ami kídíeme mér abam kísa imolangkula,

³⁸gooru-sobén alung-abam kísa imolangkula, toodí-toodí lokke gíídí-siipelo Jirusalemlo ipak ilíkdope amanpe alung-abam bomnam taro kídí kísape parmoyéku. Dekepe kumrukpe ikunam doolung kídíem milu-mibampe paryin moyéku. Delomin RUUTUM bí ngo emla bulu kényin yékune.”