Read Alladian EJEKIEL 38 Bible Online

EJEKIEL 38 - Alladian bible

EJEKIEL 38

¹RUUTUM ke agome ngokkíng pííto:

²“Tanike ue, Magog among lokke Meshek kelang Tubal opín kídíke rojape ina, Gogme nok mikmoe gekaasudola lulangka.

³Bíme lukaadola sipe polangka: Ruutum Shédí bí sipe podung: Meshek kelang Tubalke roja Gog nokke mirupe ngo ikai.

⁴Nom ngo peldu-peltokla nokke sokkor delo rakéé kéélíkla, nomlang nokke guré kídíem, guré sipaying kídíem, mimak leemo gela, kattamem, delokke bottena tamtaem tugela, yoksem kiddung-kittoksula ina nokke sipaying maglíngem pulenyé.

⁵Parsia lokke, Libya lokke, Ethiopia lokke maglíng takame tamkung bomla, mimak dumlup gela bulukíng yémín gedung.

⁶Deke delo lekope Gomerla bíkke miram maglíngelang, línggíng yalum telokke Beth Togarmahke maglínge lekope yébosula, nokkíng deddína opín-buange kadung.

⁷Menape irung-sarungsula, leemosula nokke lulígem taddobope ilangka.

⁸Deddína dítak irongem nome mimak leemo modope gogyéku. Mooruk amope ituana Israel dííte kídílo, tani among rego kéényunglok langaang langkula eetetpe dungkuna, midu-mimaklo itípala aigampe yélenkuna amongko, yépenam longelo no mimak iyabomyé. Bulum deddína opín aralok laalen langkula, bulu supak dengomrupe duudungku.

⁹Nolang nokke maglíng de deddína mití maglíngem gíbola mimak ipe aayé. Dekede gumnam asar kísape aabomla, among tabungem doomuge dakkap bomnam kísape ibomyé.

¹⁰“Ruutum Shédí bí sikepe podung: Dekena longe pííyém, Gog no atírumana aangem gela airumana ilieke ilenyé.

¹¹No sikepe emsuyé: ‘Ngo líísak etor torgoosumana doolung kídíem mimakpe iabomyé. Atí líísak etor kamape arem yapgo kamape duula, atí kénsumape, dengomrupe duuna ami kídí teyolo, mamam sudope ngo mimak aabomyé.

¹²Ngo papak-payakla, línggoola, tani among rego mipílok ami langaa langkula, nyokkuna doolung kídíem ai-kamporupe dungaabom langkula, deddína taroe kalangkula parkuna, tani takamke endung-gítokko raadangpaklo dungkuna kídí teyolo, ngok alage ugayé.’

¹³Delo Sheba lokkelang Dedan, delokke Ispein among lokke ami kídíe nome, ‘No papak-payakla, línggongdope nokke sipaying maglíng kídíem goodum sudunía? No among kídíke uun kídíem, baldín kídíem, taro kídíem delokke ekurang arem lunggu kídíem, lííla dekedem bomlangkula enyékunía?’ emla bulu ííyé.

¹⁴“Dekepeila, tanike ue, kaalu agom sim Gogme potoka: Ruutum Shédí bí sipe podung: Delo longe delo ngokke Israel ami kídíke dengomrupe duudungem, no dem kaala gílen bomyénía?

¹⁵Línggíng mootengo telokkai sanamyimanam sipaying maglíngem tokbola, guré kídílok dugtokbomla, nokke duupom delok tokbomyé.

¹⁶Among takamem daklup bomna doomug kísape no ilangala, ngok ami Israelme mimakpe tokbomyé. E Gog, longe kídíe pííyém, ngokke amongem mimak iyabomdope ngo nome langaayé. Dekepe iyém nokkíng kaadasula, tani takame ngokke deenamem kaapayé, delokke ngo deene emla takam keralo nokkelok ngo lengkansuyé.

¹⁷“Ruutum Shédí bí sipe mandung: Kerang longe kídí delokkai, ngom agér ibina, Israelke kaaluna miri kídarke nappalok potí bomnam amimangía no? Buluke longe ara delo deddína dítak kokai, Israelke mirupe nome ngo langaayé emla kaalula bulu potíto.

¹⁸Ruutum Shédí ngo sipe podung: Ingkona longelo Israel amongem Gog no mimak iabomyédí, delo longe delo ngo yagorupe marlenyé.

¹⁹Yagorupe marla ngo lulendung. Delo longe delo Israel amolo botterupe taronko tonyé.

²⁰Ngokke keralo, asi aralokke engo kídíe, asarlo denggona pettang kídíe, among so eggoona ato-siro kídíe, moonam lokke simon-sili tabunge, delokke tani amongso yékína tani takame peso kootírlok danyin geyé. Dííte kídíe bénletyé, dííte ponyuk kídíe díryinyé, delokke líísak etor tornam takamde oletla amolo dooyinyé.”

²¹“Ngo Gogke mirupe yoksem langaayé, delokke atí-atína aimangem ngok dííte kídílok laalenbomyé. Sikepe Ruutum Shédí ngo lulendung. Mipil miyonge mirupe ibosula, pamín-níkmínsula iyé.

²²Ngo Gogke teyolo kilii-ramli loklang midu-mimaklok kebangem bangabomyé. Ngo bík teyololang bíkke sipaying kídí teyolo, delokke deddína bíkke mití maglíng opéé teyolo yagorupe pedongem omola, tapíem gemola, eme líídorem otokmoyé.

²³Sikepe ila deddína opín-buang kangkolo, ngokke deenam emlang ngokke miga-miramem lengkansula ngo agísuem lengkansuyé. Delo bulu takame, RUUTUM bí ngo emla kényinyé.”